Matendelelu 9:4 - O Mikanda Ikola

⁴ Kioso-phe kia-nda ku a muanga kuala Jihova Nzambi ienu, enu anga a mi bhua ku mesu, ki muile ni miẋima ienu, muixi: Jihova ua tu mono tu athu ambote, kiene kia tu tudila mʼoxi iii phala i kale ietu, ki kiene; maji o ituxi ia ifuẋi iii, iene-ku ia bhangesa Jihova ku a kaiesa-mu.

Matendelelu 9:4 ပူးပေါင်းရင်းမြစ်များ

Dimatekenu 15:16

O ku muiji ua kauana-phe kiá, kiene kia kà bhongoloka dingi mʼoxi mumu, kuma o kizongelu kia kubhukumuka kua Mamodi kiluua ki tenena.

Izekiiele 36:22

Kala kiki-phe, o dibhata dia Izalaiele tangela-diu, uixi: O Jihova Nzambi uambe kiki: Ki mukonda dienuʼenu, ki nga mu bhangela kiki, enu mu muiji ua Izalaiele, tata, maji mukonda dia dijina diami di kôla, di mua sembamesa mu kaxi ka akua jixi, mu mua di tela enu.

Izekiiele 36:32

Jihova Nzambi ua ki tange, uixi: Ijiienu-na-kiu muene kiambote, kuila o kiki ki nga mu ki bhangela mukonda dia henda ienuʼenu, kana! Sonhi ji mi kuate muene, mu tandanganhe mukonda dia jinjila jenu, enu mu muiji ua Izalaiele, tata!

Ijila 18:3

Enu ki mu fikise o imbamba ibhanga akua Ijito, ku muakexe; kana ue kufikisa o imbamba ibhanga akua Kanana, ku mua lungu, ku nga-nda ku mi tula; o jingonge jâ ki jene ji muenda ni kukaiela.

Loma 11:20

Kiene! Maji lembalalenu kuila ene a a batuile-ku mukonda dia kukamba kuxikana, enu-phe mua xala ku mudiva mukonda mua xikana. Kienʼ iki ki ki mi bhekele kukala ni ukumbu. Inda kalenu ni uôma.

Loma 11:6

Kuma o kusola kuê kua tundu ku kiadi, ki ku tundu ku ikalakalu i bhanga athu. Mukonda se o kusola kua Nzambi, kua tundile ku ikalakalu ia athu, o kiadi kiê ki ki eji kukala kia kidi.

I Kolindo 4:4

Kuma ki ngejiia kikuma ki ngala na-kiu. Maji ki bhene ngó bhu ngi lungila. U ngi tokuesa muène Ngana.

I Kolindo 4:7

Eie nanhi muène ua kubhangesa kuila akuenu oso u a tunda mu unene? Ngana Nzambi ki muène ua kubhana ioso i uala na-iu? Abha-phe, phala-hi eie u di zangeleka, kala o ioso i uala na-iu, Nzambi ki muène ua ku bhanaiu?

Matendelelu 12:31

Jihova Nzambi ienu ki mu mu bhange kiókio, kana; xinganekenu kuma ima ioso ia ufusa ia ibhila Jihova, ia di zemba na-iu muene, iene ia bhanga jinga ene kioso kia bheza jinga o jinzambi jâ. Katé ni tuana tuâ tua mala, ni tuana tuâ tua ahatu akexe ku tuoha mu túbhia, mu kusatela jinzambi jâ.

Matendelelu 31:27

Kuma eme o kubhukumuka kuenu nga ku ijiia, ni kuhinana o jixingu ku muene na-ku. Tala, sumbala eme hanji ni muenhu muʼaxaxi kenu, mua zoka, mua zoka kiá ni Jihova; kuambe dingi se ngafu-ami kiá!

Matendelelu 8:17

Sumba muà kela mu miẋima ienu muixi: Mu nguzu ietu ni kusuina kua maku metu, muene mu ejiia o umvuama uoso uenhú.

Matendelelu 9:24

Xi! Kífua tunde kiá bhu kizuua ki nga mʼijiia, katé ni lelu, enu Jihova Nzambi mua mu bhukumukina muene kienhiki.

Matendelelu 9:5

Ka ki bhangela mukonda dia kuuabha kuenu, mba mukonda ua mi mono ni muxima ualùngu kua muene; kana. Maji o ituxi ia ifuẋi iii, iene-ku iabhangesa Jihova Nzambi ienu ku mi kaiela-u; mbé o kuxikika o kikutu kia lokela Jihova Nzambi ienu ku jitata jenu, a Mbalahamu, ni Izake ni Jakobo.

Matendelelu 9:7

Xinganekenu, ki ki mi jimbe ki muakexi mu kulokalala njinda ia Jihova Nzambi ienu mu kikangalakta; tunde mu kizuua ki mua tundu mu Ijito, katé bhu kididi bhu muezʼabha, mua di bhanga jinga mu axibhaki a hatu, bhu pholo ia Jihova.

II Timote 1:9

Kuma muène ua tu bhulula, iú ua tu ixana ni kixanu kikôla, phala, tu kale tu mundu uê. O kiki ki kia kaiela mu imbamba i tu bhanga etu, maji kia kaiela mu kikanenu kiê-Muène, ni mu kiadi kiê. Muène o kiadi kiki ua tu muesa-kiu mua Kristu Jezú, tundé xahulu, ku dimatekenu.