Matendelelu 3:22 - O Mikanda Ikola

²² Kana ku a kala-phe ni uoma; mbata Jihova Nzambi ienu, muene ua kà mi luila o ita.

Matendelelu 3:22 ပူးပေါင်းရင်းမြစ်များ

II Malunda 13:12

O kiki-phe Nzambi uala ni etu ku pholo ia ita, kumoxi ue ni jinganga jê, ala mu kuxika jikoloneta, phala ku ta nzongo ia kúlua nʼenu, enu mu anʼa Izalaiele! Ki mu lue-phe ni Jihova, Nzambi ia jitata jenu, kuma ki mua-nda kuzediua.

II Malunda 20:17

Mu mvunda iii, enu ki mua-nda kubhânga; mu sukila ngó mu kanga, hé muʼimana, nda mu mone kiá o ubhulukilu ua-nda ku mi bhana Jihova, eie Juda ni Jeluzaleme, ki mu kale ni uoma bha mu sasumuka; mungu muene ndé-nu mu kutakana-nâ, mbata Jihova ua kà kala ni enu.

II Malunda 20:29

O uoma ua Nzambi anga u tulukila ku thandu dia mautuminu moso mu jixi jeneʼojo, kioso ene kievu kuila Jihova ua bhângela Izalaiele ku jinguma jê.

Nehemiia 4:20

Bhu kididi bhuoso bhu muivuila mbungu ia xiki, bhene bhu tu di bhongoluela; o Nzambi ietu muene ua kà tu bhângela o mvunda.

Jisálamu 44:3

Kuma ixi ka i tambula ni xibhata iâ ene, lukuaku luâ ene ki luene kua a bhana o uzonda; maji o lukuaku lué, ni nguzu ié, ni kubenha kua pholo ié, mukonda eie ua a kala ni kiadi.

Makatukilu 14:14

Jihova muene ua-nda ku mi bhangela, enu di xibhienu ngó.

Makatukilu 14:25

Anga u mbonjomona o malola ku makalu mâ, katé aia ni ku a kukila bhoxi, akua Ijitu anga a zuela, exi: Tu lengienu o pholo ia Izalaiele; kuma Jihova uala ku a bhangela, iú u a mu bhondeleka akua Ijitu.

Dialuilu 21:34

Jihova anga u ambela Mozé, uixi: Ku mu kale ni uoma, kuma nga mu bhana bhu maku mé, ni mundu uê uoso, ni ixi iê; u mu bhanga kala ki ua bhange Sihone, sobha ia Mamodi, ni mbanza iê ia Hexebone.

Matendelelu 1:30

Jihova Nzambi ienu, uoso ua-nda ku mi tuamenena, muene ua-nda ku mi bhangela o mvunda, kala kia mi bhange mu ima ioso ia bhange kiá, ki mua di muena ku mesuʼenu mu Ijito;

Matendelelu 20:1

Kioso ki u tunda mu kuia kúlua ita ni jinguma jé, anga u mona jikabalu, ni makalu, ni makuenze mabeta kuvula eie ndenge, kana ku a kuatela uoma; mbata o Jihova Nzambi ié, uoso ua ku katula kʼoxi ia Ijito, ua ku bande.

Matendelelu 20:4

Mbata o Jihova Nzambi ienu muene uala kuia nʼenu mu kúlua ita ni jinguma jenu, phala ku mi bhulula.

Matendelelu 3:21

Mu thembu ienhoio nga tendelela ue Josuué, ngixi: O mesu mé ma ki mono kiá, kioso kia bhange Jihova Nzambi ienu, ku jisobha jiiadiʼiji; Jihova ua kà bhanga ue kienhiki ku mautuminu moso, ku mua kà bhita.

Matendelelu 3:23

Kienhókio ue Jihova nga mu diondela o kiadi kiê bhenhobho, ngixi:

Josuué 10:42

Jisobha josuʼojo Josuué ua ji kuatela-bhu kiá muene ni jixi jâ, mu kithangana kimoxi, mbata Jihova Nzambi ia Izalaiele muene ua kexi kuluila Izalaiele o ita.

Josuué 23:10

Muthu umoxi mudienu, uasoko-bhu ku kaiesa midi; mbata o Jihova Nzambi ienu, muenʼié-muène u mi luila jinga o ita, kala kiene ku mi ambela kiá.