Malakiia 3:5 - O Mikanda Ikola

⁵ Bhenhobho, Jihova, uixi: Kienhókio nga kà mi zukama kiá, milonga ienu nga kʼèza mu ku i fundisa anga ngi kala ngi mbangi ia kubatula lusolo mu kubelesa aloji, ni akua ku ta jiphanda, ni iá a loka mu makutu, ni iá a kamba kufuta kitadi kia jingunza ja a a kalakalela, ni ió a bhingi kuila o mutudi, ni monʼa difundu, a a bhondeleka muene, ka xikina kubatula ni kuiuka o mulonga ua ngenji-a-thumba ua tundu dikanga, a lémbua ku ngi kuatela uôma, eme ngi Jihova dia Ilombo Ieta.

Malakiia 3:5 ပူးပေါင်းရင်းမြစ်များ

Dimatekenu 20:11

Mbalahamu uixi: Mukonda nga fika ngixi bhu kididi kiki o uoma ua Nzambi kala na-u; ngixi-phe a-nda ku ngi jibha mukonda dia mukajiʼami.

Dimatekenu 42:18

Zuze anga u a tangela, kizuua kia katatu, uixi: Bhangenu kienhiki, phala mu laie; kuma ngi mukua uoma ua Nzambi.

Nehemiia 5:15

Nguvulu ja dianga-phe, ja ngi diangelele eme, a kexi mu tatesa kifuxi, ni ku a tambula kúdia ni vinhu, anga ku thandu diê, a ta-ku ku futa makuinhiʼauana a xikulu ia itadi ia phalata; o minzangala iâ hanji ue a kuata kubhikisa o kifuxi; maji eme-phe ki kiene ki nga bhange, mukonda dia kuxila Nzambi.

Jobe 31:12

mbata kieji ku kala túbhia tu jikinisa katé mu kibuika, kieji ku jimisa umonhi uami uoso.

Jobe 7:2

Mukuâ ni mubhika kia kala mu kuinda o kilembeketa; kala ngunza ua mu kinga o futu iê,

Jisálamu 36:1

O ku di nganala kua muthu ku tunda ku muẋima mu kubhuma kuê; o ku mesu mê ki kua mu kala uoma ua Nzambi.

Jisálamu 81:8

Ivenu, mu mundu uami, nga solo ku mi bazela; Izalaiele, tala, tamano mu ngʼívua!

Jisálamu 96:13

Bhu pholo ia Jihova, kuma iú iza, iú iza mu fundisa o ngongo; u fundisa o athu mu ngongo ni kuiuka, u tetuluila o mundu ni kidi kiê.

Jisálamu 98:9

Bhu pholo ia Jihova, kuma iú iza, mu fundisa o ngongo; u fundisa mundu ni kidi, u batuila o ifuẋi ni kutetuluka.

Makatukilu 1:17

O avuadixi-phe ala ni uoma ua Nzambi, kia a tumu muenexiʼa Ijitu ka ki bhange, maji anʼa mala a a bhaka ni muenhu.

Makatukilu 18:21

Sota mu mundu, oso athu a tena, ala ni kilunji, akua uoma ua Nzambi, akua kidi, ka ẋikina kúdia mangonha, u a tese ku pholo; iá a tambula konda ia jimidi, iá a tambula konda ia jihama, iá a tambula konda ia makuinhi atanu, o iá dikuinhi-dikuinhi;

Makatukilu 20:7

Kana kutumbula dijina dia Jihova, Nzambi ié, mu kingoho; mukonda kua Jihova kà kamba kuêla uoso u tumbula o dijina diê mu kingoho.

Makatukilu 22:20

Uoso u satela nzambi iengi, ki kua Jihova, kana, ió muthu ua ku mu jibha muene.

Jisabhu 16:6

Bhuala o henda anga bhu kala ue o kidi, kituxi ki jima; maji athu kuebha o ituxi, ki kale ngó ku uoma ua Jihova.

Jisabhu 8:13

Uoma ua Jihova, o kueha kia ibha; nga di zemba ni ukumbu, ni izala, ni uendelu uaiibha, ni dikanu dizuela isunji.

Izaía 57:3

Enu-phe bhiẋilenu bhabha, mu anʼa mama ia tambula uanga, mbutu ia kidianzunga ni ndumbu.

Jelemiia 23:10

Kuma oxi iezala akua jiphanda, oxi ue i idila mukonda ia tambula kiá mázui: o makela ku tutu ia kukuta; kaxi o uendelu uâ ua ibha, o kusuina kuâ ki kua uabha.

Jelemiia 27:10

Mbata a mi zambuila makutu, phala ku mi balakala dikanga dia ixi ienu, nda eme ngi mi kaiese mʼoxi ienu, enu nda mu jime o mbutu.

Jelemiia 27:9

Kana-phe ku bhana mátui ku jipolofeta jenu, ni akua iphata, kia mi zuelela, kuamba: ki mua-ndu bhikila sobha ia Babilonha.

Jelemiia 29:23

Mukonda a bhange ulaji mua Izalaiele, iá a te jiphanda ni ahatu a akuâ, anga a tanga makutu mu dijina diami, maka eme ki nga a tumu ku a zuela. Eme-phe nga kʼijiia muene kiambote, kuma ngi mbangi ia ima ienhiʼii—eme ngi Jihova.

Jelemiia 42:5

Ene hê a vutuila Jelemiia, exi: Jihova a tu kale mbangi ia kidi ni ufiiele, bhu kaxi ketu, se tu kamba kubhanga kioso kiambe o kizuelu kioso kia-nda ku ku tumikisa na-kiu Jihova, Nzambi ié, kókuetu.

Jelemiia 5:2

Né-mbe a zuela kuila: Jihova a kole muenhu, ni kidi kiene a loka ngó makutu.

Jelemiia 5:29

Manhi ima iii ngeji ku i talela ngó, se ku i bhesa kaxtiku, Jihova ua ki tange; mbé o muenhu uami u kamba kuvutula phonzo muiji kala iú?

Ijila 19:13

Mukuenu kana ku mu bhondeleka, mba uenda ni ku mu nhana imbamba iê; o futu ia ngunza, kana ku i bhaka ni ikala nʼeie katé mungu ki kúkia mu kimene.

Ijila 20:10

Se bhu kala ue diiala u ta phanda ni mukaj ʼangene, mukajʼa mukuá nʼa te-nê phanda, ni habu ia diiala, ni ndumbu ia muhatu a fue muene, sé phata.

Ijila 20:27

Se bhu kala diiala mba muhatu ukala ni nzumbi ia kuxingila kilundu kia ngômbo-a-nhange, mba kithutha kia kuzambula ni kubhanga iphata, athu ió a fié muene, sé phata; mu a bûba ni matadi; o manhinga mâ a soke-nâ ene kuthandu diâ.

Ijila 20:6

O ki bhu kala ue muthu u bilukila mu ku ta muxima ku akua-ithutha ia kuzambula ni kubhanga, iphata, nʼende ni ku a kaiela ene, Eme-phe ngi mu ta diesu katé ki ngi mu batula muʼaxaxe ka povo iê.

Mikeia 1:2

Ivuenu enu oso mu ifuẋi, bhana mátui eie u ixi ni ima iê ioso iala-mu mu kuzanza kuê kuoso, o Jihova Nzambi a mi kalele mbangi ia ku mi bhanga kiaiibha tunde bhu kididi kiê kia ku mu bhezela ki kôla.

Habakuke 1:12

Tunde mʼokulu Eie kʼemuene u Jihova, Nzambi iami, Ukôla? Ki tualʼiki, Ngana, ki tua-nda kufuila-bhu; kuma Eie Ngana, o muiji iú ua u te phala kufundisa ni kubatula, kiene ki ua ki bhangela, Eie u ndanji ia kidi, kuma muiji iú ua u xindi kienhiki phala kulonga.

Zakadiia 11:12

Eme anga ngʼa tangela, ngixi: Se mua ki mono kuuabha, ngi bhanienu futu ioso ia ngi tokala; o ki muila kana, kuabhuʼé. Anga a pezala o futu iami, hé a ngi futa makuinhi a tatu a itadi ia phalata.

Malakiia 1:6

Mona u xila tatʼâ, o mubhika u xila nganga iê; Eme-phe, se ngi Tata, o ujitu ua ngi fuama, iú kuebhi? Se Eme ngi ngana ienu, o uoma ua ngi tokala, iú kuebhi? Eme ngi Jihova dia Ifuẋi, ngambela enu mu jinganga mua-lu dituna kuxila Dijina diami. Enu-phe muexi: Mu kima kiahi etu mu tua ditunu o kuxila Dijina dié?

Malakiia 2:14

Enu-phe muixi: Phalahi? Mukonda Jihova uala mbangi bhu kaxi ké ni muhatuʼé ua dianga, ua sakana-nê mu unzangala, eie ua kambe kuenda-nê ni ufiiele, anga ubula kikutu ki uate-nê; o muene-phe muene uala mukuenu, o muhatu ué ua àta-nê kikutu.

Malakiia 2:17

Ngana, mua mu kumisa ni uzuelelu uenu; anga mu ila, muixi: Tua mu kumisa mu kima kiahi? Ki muala kuzuela, muexi: Uoso u bhanga kiaiibha, u lunga; ku mesu ma Ngana, ki kima; athu kala kiki ene a mu uabhela muene; Nzambi ia ku fundisa-phe, iú kuebhi?

Luka 23:40

Kifumbe kiamukuá-phe u mu bazela, uixi: Kífua, eie kuala ni uôma ua Nzambi? Ua fika kuila eie ua-lu fua ue kalunga kene kamoxi ni muène?

Loma 3:8

Ki tuidila-hi tuixi; Tu bhangienu iaiibha, mbé mu iaiibha hinu mu tunde iambote? Ni kidize, amoxi-mu ene ku ngi tatela kuila kiene muene ki nga mu zuelʼ okio. Enʼió-phe o kuêla kuâ hádia kuà kala kua kidi muene.

Matendelelu 15:13

Kioso ki u muambula-phe ku mu ehe kuia ni maku ahatu.

Matendelelu 18:10

Momué ki muà kale muthu usatela monʼê ua diiala mba ua muhatu, ni ku mu bhitisa mu túbhia; mba mu kala mukua kuzambula mizambu, mba mukua kusuma, mba mukua kulandula isuma, mba u kala muloji;

Matendelelu 24:17

Diba dia tokala kulungisa nzuángiza mba monʼa difundu, kana ku mu diodia na-diu hé u di lungulula; kana kutambula izuatu ia mutudi ua muhatu mu kikunji.

Matendelelu 27:19

Lamba dia ió uoso u lungulula o kidi kiangene kia nzuángiza, mba kia hukunhu, mba kia mutudi. Mundu uoso a kèla: Amén!

Matendelelu 5:11

Kana kutumbula dijina dia Jihova, Nzambi ié, mu usemenhi; kuma kua Jihova kà kamba kuêla uoso u tumbula o dijina diê mu usemenhi.

I Tesalonika 4:6

Bhu kaẋʼ abha-phe, ki bhu kale muthu u somboka, mba u bhanga mukuâ phulu mu maka kala iá, kuma Ngana muzokedi a ima ioso iii. Kikiphe tua mi dimuna dingi kala ki tua diangele ku mi dimuna, ni ku mi bhana umbangi, kuma Muène hinu ua ka bhana kaxtiku kua oso a bhanga ima kala iii.

Jihebeleu 13:4

O ukaza u kale ku ujitu kua ene oso, o mala ni ahatu a sakana a di kale jifiiele mudiâ. Kuma Nzambi ua kà fundisa o jindumbu ni akuâ jiphanda.

Tiiaku 5:12

Ku ima ioso-phe, phange jami, ki uila u bhana kizuelu kia kima kiosokioso, kota-kota kana kuloka, né kulokela diulu, nè kulokela oxi, nè mulôko uengi uoso-uoso. Se kua mi bhingi kutanga kima, mu ila kiene se kiene, mu ila kana se kana, mbé Nzambi ka mi êlese.

Tiiaku 5:4

o futu ia jingunza ja kalakala mu mabhia menu, mua emina-iu. O mu kuditenda kuâ ivenu kia-lu dikola! O mitendu ia enhó a munu o mabhia menu, ia bokona mu matui ma Ngana Nzambi, Muteni-a-Ioso.

Dijingunuinu 21:8

Maji oso-phe akua uôma, akua phulu, a bhanga isunji, ijibhanganga, jindumbu, ni aloji ni abhezi a itèka, ni akua makutu oso, o mbandu iâ ià kala mu kizanga kia uama túbhia ni xofidi; kuène o kùfua kua kaiadi.

Dijingunuinu 22:15

Ku kanga dia mbanza kuene kukala akua midimu ioso iaiibha, ni aloji, ni jindumbu, ni ijibhanganga, ni akua kubheza itèka, ni uoso u uabhela kuzuela ni kubhanga o makutu.