Malakiia 3:10 - O Mikanda Ikola

¹⁰ Bhekenu madijimu moso mʼonzo iami ia dilundilu, mʼonzo iami mu kale mákudia; o ki mu zubha ku ki bhanga, ngi lodienu kiá, eme ngi Jihova dia Ilombo Ieta, se ngi kamba ku mi jikuila jinjanena ja diulu, ni ku mi lunduluila dibesá, di mi soka anga di subhuka, di bhinga ki di kala ni nzôngo iê mu ku mi bhekela jimbote.

Malakiia 3:10 ပူးပေါင်းရင်းမြစ်များ

Dimatekenu 28:22

O ditadi didi di ngʼemika kala philadiʼdi, di kala inzo ia Nzambi, o ku jimbongo joso ji u ngi bhana, ngi ku bakuila-ku mbandu ia kakuinhi.

Dimatekenu 7:11

Mu muvu ua Noué ua kutenesa hama jisamanu ja muvu, bhu mbeji iê ia kaiadi, kizuua kia kuinhi ni sambuadi ku mbeji, kizuua kienhókio majiia ma mukiukuluku ma baza, o mazungu a diulu a jikuka,

II Jisobha 7:19

O kabhitangu muenʼió anga u vutuila o muthu ua Nzambi, uixi: O bhabha kiá né-mbe hanji o Nzambi ua bhangele jinjanena ku diulu, o kienʼiki muene ki xikina ku di bhanga, kala kia tange o kizueluʼiki? O polofeta anga u muʼambela, uixi: Tala, ua-nda ku ki mona muene ni mesuʼé, maji o kuene kua-nda kudia-ku.

II Jisobha 7:2

Maji-phe, kabhitangu kamoxi, muthu ene ku mu xamenena ku lukuaku luê kuala sobha, u vutuila muthu ua Nzambi, uixi: Tala, né-mbe hanji Jihova ua bhangele jinjanena ku diulu, o kiki ki xikina ku di bhanga? Muene-phe, uixi: Tala, ua-nda ku ki mona ni mesu mê, maji o kuene-phe kua-nda kúdia-ku.

I Malunda 26:20

Mu kutanga o Jilevita: Aíia muène ua tambuile konda ia jimbongo ja inzo ia Nzambi ni jimbongo ja imbamba Ikôla.

Nehemiia 12:44

Mu kizuua kiene kimoxi anga a xinda ue athu a tumina mu maxilu a kutambuila o itadi, ni maujitu ma kubhuka, ni ibundu ia kutomona, ni mbandu ja kakuinhi, nda a i bongoluele mu maxilu muenhomo i tunda ku mikáu ku mábhia, ni jisanzala ku bhata, mbé o mákudia ma jinganga ni ma akua Levi, mu jimbambe jê, kala kia ma xindi kitumu; mukonda Juda ua sangulukile mu kumona dingi bhu ididi iê o jinganga ni akua Levi a kexi mu kalakalamu.

Nehemiia 12:47

Kia bhekela kuma Izalaiele ioso, kumatekena kiá mu izuua ia Zolobabele, ni mu izuua ia Nehemiia, a kala mu kubhana o kúdia kua jingimba ni kua alangidi bhu mielu kizuua ni kizuua o muthu bhu kithangana kiê; anga a kala mu lumbila o mákudia ma akua Leví, o akua Leví a lumbila o kudia kua anʼa Alá.

Nehemiia 13:5

anga a mu bhangela xilu dionéne, mʼukulu mu a kexi mu bhaka o mibhaku ia mákudia, ni uasu ua dizumba, ni itutu, ni díjimu dia mbandu ja kakuinhi ja jimbundu, ni ia vinhu, ni maji, ima ioso ioio ia tumine kubhana akua Leví, ni jingimba, ni alangidi bhu mielu, kumoxi ue ni ujitu ua kubhuka ua jinganga.

Jisálamu 37:3

Dielela kua Jihova, enda ni kubhanga o mbote; phala u tunge ixi ienhiʼii, u kale u fiiele.

Jisálamu 78:23

Maji-phe ua tumu o matuta ku thandu, u jikula o mielu ia diulu;

Ndongixi 11:3

Kioso o matuta kiezala ni menha, a lundulula o mvula mu ngongo; kienhókio o muxi kuoso ku ua takukila, kixi ku Sulu mba ku Suku, bhu kididi bhuoso o muxi bhu ua di-bhalela bhene bhu ua kà xala.

Izekiiele 34:26

O jene nga kà ji kitula dibesá kumoxi ni ididi ia mulundu uami ukôla; o mvula hé nga kà i tuma kusonoka bhu thembu iê; ia kà kala mvula ia kizediuise.

Izekiiele 44:30

Ni ibundu ioso kiá ia mutômo, ku ibundu ienu ioso ia dianga ku mbutu joso, ni maujitu oso ku maujituʼenu, a kala a ngene a jinganga; kumoxi ue ni makènde enu a dianga, mu bhana-ku jinganga; mbé a bhangese o kizediuise kubutama ku thandu dia dibhata dié.

Hozeia 2:21

Kia kà bhita-phe mu kizuuʼokio, kuma eme nga kʼevua, eme ngi Jihova, nga kʼevua o maúlu anga ngʼa vutuila, ene ue a kʼevua kioso kiendi o ixi.

Jouele 2:19

Jihova ua kà tangela mundu uê, ua kà kumbulula, uixi: Talesa-ze, ngi mi tumikisa tiliku, ni vinhu ia ubhe ni maji, ima iosuʼiii ia kà mi kuma; ki ngà mi bhana dingi ku lusebhu mu kaxi ka akua jixi.

Jouele 2:24

Bhu mavundilu bhuà kezala ni tiliku, matangi a ku kamena vinhu ia uisu ni maji a kà subhajaka.

Ijila 26:10

O ku ima i mua lunda ukulu kuene ku mu dia katé kia mi kumu, anga mu kubhinganesa iòbhe iòkulu mu i texe bhobho, muexi iatumbuluka kiá.

Ijila 26:3

Se mukuata kuendela mu jingonge jami, ni mu aluke o ijiia iami, anga muenda ni ku i bhanga,

Ijila 27:30

Tukuinhi tuoso muene tua mábhia, ni ku idima ni ku ibundu ioso ia miẋi, tua ngene tua Jihova; tuê-Muene, kuma ima iê, ikôla.

Ajeu 2:19

Phala mu mone mba mu kitula hanji mu kamba jimbutu, mba muvide, ni mufiku, ni mulomela, ni mudiva, iene ioso i kamba kubhana dingi ibundu iê; maji tunde lelu katé ku pholo nga kà mi zudiuisa muene kia nzungule.

Dialuilu 18:21

Uila kiki, o ana a Levi nga a bhana o mbandu ja kakuinhi joso mu Izalaiele, ji kale undundu uâ, ku kikalakalu kiâ kia ukunji kia mu bhanga, mu ukunji ua balaka ia kutakanena.

Matesu 6:33

Diangenu-phe kusota o Utuminu ua Nzambi ni uiukilu uê, nda ima ioso iii a mi kuiila-iu.

Matendelelu 12:6

Bhene bhu muenda ni kubheka o jisata jenu ja kuoha, ni ibhaku ienu ioso ia kusatela Jihova, ni madijimu menu ni maujitu menu ma ku di fikixila bhu lukuaku luenu, ni jihasa jenu, ni mibhaku ienu ia vondadi, ni jiphande-kumbi ja jingombe jenu ni ja jimbudi jenu.

Matendelelu 14:22

Ku idima ioso ima mʼóbhia dié muvu ni muvu, eie u katula jinga-ku o mba-ndu ia kakuinhi phala madijimu ma Jihova, kioso ki uzubha kumuna o díbhia.

Matendelelu 14:29

mbé kia kà tukuluka o levita (kuma muene muthu ka moneka ngó dikânda ku undundu kala eie), ni nzuángiza ua tunda o dikanga, ni mona difundu, ni mutudi, u ua tungu-nâ bhuamoxi, mu sanzala ienu, a tene kúdia katé kiekuta; phala Jihova Nzambi ié a ku tele dingi dibesá ku ikalakalu ioso ia maku mé i uenda ni kubhanga.

Matendelelu 28:12

Jihova ua-nda ku ku jikuila o dibhakelu diê, dia mbote, o diulu, phala diende ni kubhana o mvula ku mavu mé bhu thembu iatokala; anga Jihova muene uzediuisa o ikalakalu ia maku mé. Eie-phe, ua-nda sobhesa miji ia athu avulu, maji eie nuka ua-nda kusobha kima.