Makatukilu 22:25 - O Mikanda Ikola

²⁵ Se u bhana dikongo dia kitadi ku muthu ua tokala ku mundu uami, o muene uala ngadiama, ku kale u mukua kuvualesa kitadi kua mukuenu, ku kale ni ku mu futisa avasu.

Makatukilu 22:25 ပူးပေါင်းရင်းမြစ်များ

II Jisobha 4:1

Anga muhatu umoxi, ku ahetu a anʼa jipolofeta, u dikola kua Ilizeu, uixi: Muadi uami, mubhikʼé, ngana, uafu. Eie-phe ua kʼijiia kuila o mubhikʼé ua kexile mukua uoma ua Nzambi; o kiki-phe mukua dikongo ueza mu ku ngʼambata o anʼami kiiadi a mala, phala kukala abhikʼê.

II Jisobha 4:7

Bheneʼobho phe, muene ueza mu ki tangela o muthu ua Nzambi; o muene-phe uixi: Ndé kà sumbise o maji, u fute o dikongo dié; o kioso ki subhuka-bhu, laielenu kieneʼokio, nʼeie ni anʼé.

Nehemiia 5:7

Anga ngi kala mu banza imʼiii ku muẋima uami! Hé ngi bazela o jingana ni atumini, anga ngʼa tangela, ngixi: Mu kuvualesa o makongo enu, muala kubhûnda, muthu u bhûnda mukuá muthu u bhûnda mukuá, o ene phange jenu. Anga ngʼa bhongoluela kionge kia dikota kia athu.

Jisálamu 15:5

ka bhana kitadi mu kutambula avasu, ka xikina kitadi kia kúdia mangonha. Uoso u bhanga ima iii, uemana kididi, ka mu lundumuna.

Jisabhu 28:8

Uoso u sokolola o jimbongo jê mu ku vualesa kitadi kia sobhesa, ni kubhunda-bhunda ngó akuâ, ua-nda ku ji bhongoluela ió uoso uene mu kala ni henda ia ngadiama.

Jelemiia 15:10

Kokolo diami, mamʼetu, tata! ua ngi vualela-hi ku kala iala dia ngongo, ngi muthu ua jinzaia, ngi muthu nga xikamena jimvunda mu ngongo ioso? Eme nuka ngʼa sobhesa ni kuvualesa dikongo, ene ue nuka a ngi sobhesa ni kuvualesa dikongo, hanji-phe a kuata kala muthu ni muthu o ku ngi bhubhidila.

Izekiiele 18:13

Kitadi u ki sobhesa ni kuvualesa, o mu kutambula kikale ku di ta, manhi muenhó u laia? Lémbue, ka tena kukola muenhu; muthu ua bhange isunji ioso iii, ni kidi kiene, u fua muene; o manhinga mê ma kà kala ku thandu diê-muène.

Izekiiele 18:17

Uebhesa o lukuaku luê kua phulungu ua tate, ka bhana dikongo dia kuvualesa kitadi, mba mu kutambula a mu telaku, nʼende ni kubhanga mabatuilu mami ni kuenda mu jingonge jami, muthu ió ka fu mu kikuma kia tatʼâ, ni kidi muene u kola muenhu.

Izekiiele 18:7

ka xikina kubhondeleka muthu uoso-uoso, o kiximbi kia mu ximbikila mukua dikongo u mu vutuila-kiu, ka xikina kunhana, o uala ni nzala u mu bhana kudia, hé u zuika kizuatu kua ió uala ni tuẋi.

Izekiiele 18:8

O kitadi kiê ka xikina ku ki bhana ni kuvualesa, mba u tambula kia vulu, uebhesa lukuaku luê mu kudia mangonha, hé o muthu ni muthu u a fundisa kiambote;

Izekiiele 22:12

Mu kaxi kê eie a tambuila-mu ue ni nduta ia kuzunza o manhinga; dikongo ua di vualesa ni kuvudisa o kitadi ku uenji, iene o ima i ua tambula, eie uemina mukuenu ni ku mu tatesa; maji eme ua ngi jimbi, eme ngi Jihova.

Amoji 2:8

U sanga a zeka kumoxi bhu mbanduʼa kalatódio koso-koso, ku thandu dia izuatu ia a ximbikila; o monzo ia jinzambi jâ muene mua nuina o vinhu ia kubhûnda.

Matesu 25:27

Hinu-phe kitadi kiami ua ki bhana ku akua kubilula, o kingezʼiki o kiami ngeji ku ki tambula ni avasu iê.

Luka 19:23

Ihi-phe kia ku fudisa o kuta kitadi kiami mu bangu, o ki ngezʼiki, hé ngi ki tambula kia di vuala?

Matendelelu 15:7

Se muʼaxaxi ka mundu ué mu kala ngadiama, ku jiphange jé, mu ixi ia kubhana Jihova Nzambi ié, mu jisanzala jenu, eie-phe kana kukola muxima; kana kuila o phangʼié uala ngadiama eie u mu kotekela o lukuaku;

Matendelelu 24:13

kumbi se dia tula kiá, sé phata muene, mu bhekele o kikunji kia ku bhele, nda a di fute-kiu hanji a zeke bhu thanga iê phala a ku besouale. O kienhiki-phe Jihova Nzambi ié u ku mona u muthu uaiuka.