Luka 6:20 - O Mikanda Ikola

²⁰ Jezú anga u bhetula mesu kuala o jixibulu jê, hé ua ambela, uixi: Mua zediua, enu mu jingadiama, mukonda o Utuminu ua Nzambi uà kala uenu.

Luka 6:20 ပူးပေါင်းရင်းမြစ်များ

Jisálamu 37:16

Kota kiatolo kiala na-kiu o muthu uaiuka; ku indi jimbongo javulu ja akua phulu a ndumba.

Jisabhu 16:19

Muthu sembele-ze o kukala ni muẋima ua batama, bhuamoxi ni ió oso a lenduka; dikue kuuana o mbole ia kubhunda ni akua izala.

Jisabhu 19:1

Ngadiama ua kambe mangonha uala kota ku ujitu, kuindi o semenhi ia dikanu ua di bhange o ndaxi.

Izaía 29:19

Oso a belesela a kà kala ni ngalasa, kutunda ngalasa, kuiza ngalasa, o ngalasa mua Jihova; jiphulungu ku mundu, a kà tanena kua Dilemba dia Izalaiele.

Izaía 66:2

Kuma lukuaku luami luene lua bhange imbamba iosuʼiii, imbamba iosuʼiii í iòbhange, kiene kiambe Jihova; maji, ivua uoso ngi mu tala: Eme ngi suua uoso ngadiama uala ni muẋima ua toloka, anga u kenanena kizuelu kiami, ió muene ngi mu suua.

Sofoniia 3:12

Nga ka xisa muʼaxaxi kê ió oso a di tululula, ka moneka izala mba ukumbu, o jingadiama; ene a kà kala jinga thembu joso mu dielela o dijina dia Jihova.

Zakadiia 11:11

Kikutu nga ki sendumuna muene ku kizuua kieneʼokio; o akuetu tumbudi tua subhuka-ku, a ngi dielelele, anga a kijiia kuila kiki kizuelu kia Jihova muene.

Matesu 11:5

O ifofo ií tona mesu, inema ií ienda, jihaxi ja dibhute jí jiluka, mixilu ií ívua, madifundu iá a fukunuka, o jingadiama a ji tangela o maka ma Njimbu Iambote.

Matesu 25:34

Muenexi anga uà kʼambela iá ala ku dilu diê, uixi: Zenu a mi zediuisa kuala Tata iami! Zenu mu lundule o Ungana, a mi iudikila na-u kuala Tata iami tunde ku dimatekenu dia ʼxi.

Matesu 5:1

Kia mono o ifuẋi, u banda ku mulundu. O kia zubha kuxikama, jixibulu jê ji mu sanga.

Luka 12:32

Jezú uixi dingi: Ki mu kale ni uôma, kakilunga kófele! Mukonda Tata ienu kia mu uabhela muène o ku mi bhana o Ungana.

Luka 13:28

Bhenhobho bhene bhua-ndu kala o kudila ni ku di kokota ku mazu, ki mu mona Mbalahamu, ni Izake, ni Jakobo, ni jipolofeta joso, ala mu kifuẋi kia Nzambi, enu-phe a mi texi bhu kanga.

Luka 14:15

Ki evu o makʼama, muthu uamukuá uala-nê ku meza, u zuela, uixi: Ua zediua uoso u dia mbolo ku meza mu Utuminu ua Nzambi.

Luka 16:25

Mbalahamu ua mu kumbulula-phe, uixi: Mona, lembalala kuma ku muenhu ué, eie ua tambuile ngó jimbote, mu jimbote. O Lázalu ue ua tambuile o jiphaxi. O kiki-phe muène kunu ua tululuka, kuma ua tambula ima iosuʼiii i ua di muena; eie-phe ua xixima.

Luka 4:18

Nzumbi ia Ngana ua ngi tula, mukonda muène ua ngʼundu kutudila o jingadiama, Njimbu Iambote. Ua ngi tumu kuxika ngonge ia ufolo ua abhika, ni kubhana mesu o ifôfo, ni kujituna oso a a kuika,

Jipoxolo 14:22

Ene anga a kala mu kukolesa o miẋima ia jixibulu ni ku a longesa kujijila o kuxikana. A kala ue mu longa kuma tu bhinga tu bokona mu Utuminu ua Diulu mu kubhita ni malebhu mavulu.

II Kolindo 6:10

Sai ni bhabha a tu vunzila malamba, maji etu tua sanguluka jinga. Tuedi kala tu jingadiama, maji athu avulu tuala ku a muesa jimbongo. Tuedi kala ki tu moneka kima, maji ima ioso tua i vu.

II Kolindo 8:2

Kuma ene mu ku a lola mu polova ia jihadi javulu. Maji ezala ni ngalasa iâ, o mu uadiama uâ uazongo a bhana kia nzungule mu kubindumuna.

II Kolindo 8:9

Kuma o henda ia dikota ia Ngana ietu Jezú Kristu mua ijiia; sumbala muène ua kexile mvuama, ua di bhangele-phe ngadiama, mukonda dienu, phala enu ku uadiama uê mu mone o umvuama.

I Tesalonika 1:6

Enu anga mu kala mu afikixi etʼuetu, mu afikixi ue a Ngana. Kuma o maka mua ma tambula ni hadi iavulu, ni ngalasa ioio i tunda kua Nzumbi Ikôla.

II Tesalonika 1:5

Bhenhabha-phe, kijimbuete kia di monekena, kia kutetuluka kua iuka kua Nzambi. O ibundu i tunda ku ima ienʼiii, i bhekela ku mi kita kuma mu athu mua fuama mu Utuminu ua Nzambi; mbata o Utuminu uenʼ iú uene u mua mu talela o hadi.

Tiiaku 1:12

Ua zediua o muthu u kolokota mu lamba, anga u kala fiiele. Kuma kia zubha ku mu lola mu malamba enhó, ua kà tambula kitundu kia muenhu, kia tange Nagana kubhana oso a mu zola.

Tiiaku 2:5

Ivenu, phange jami nga mi zola: Nzambi ua solo jingadiama mu ngongʼumu phala kukala jimvuama mu kuxikana, alundudi a ungana ua tange Muène ku u bhana oso a mu zola.

Dijingunuinu 2:9

Nga ku ijiia o hadi ié i uene kutala. Ngejiia ue o uadiama ué u uala na-u, maji ni kidi eie uala-phe u mvuama! Ngejiia ni kuxinga kua ió oso ambe exi tu Jijudé, manhi ki Jijudé, maji ene ala kibuka kia tokala Satana!

I Samuuele 2:8

U zangumuna o ngadiama mu mavu, u katula phulungu bhu dixita nʼa mu xikamesa ni anʼa jingana phala a lundule kiandu kia fuma; kuma o jiphiladi ja ixi, jangene ja Jihova, o Ngongo ua i xikika ku thandu diâ.