Luka 11:9 - O Mikanda Ikola

⁹ Eme-phe ue ngi mi ambela: Bhingenu, nda a mi bhane. Sotenu, nda mu sange. Bundenu, nda a mi jikuile dibhitu.

Luka 11:9 ပူးပေါင်းရင်းမြစ်များ

Jisálamu 118:5

Bhu kíbhidi bhu nga kexile, nga dikola kua Jihova; Jihova uetaia, ua ngi bheka bhu kididi kiadisanze.

Jisálamu 27:4

Kima kimoxi ki nga bhingi kua Ngana, kiene ki ngi bhindamena jinga: o kutunga mʼonzo ia Jihova izuua ioso ia muenhu uami, mbé kutala o kuuabha kua Ngana, ni kudilonga jinga maka mu Tembulu iê.

Jisálamu 27:8

Kioso eie ki uambe, uixi: Sotenu pholo iami; eme muẋima uami uambe: Pholo ié, Ngana, ngi i sota.

Jisálamu 34:10

Inda o minzangala ia jihoje, i bhindama, i tata ni nzala; iá-phe a sota Jihova, kana kima kiambote kia a kamba.

Jisálamu 34:4

Nga soto Jihova, iú uetaia; ua ngi kudila ku ima ioso i ngi kuatesa uoma.

Jisálamu 50:15

Nda u dikola ko kuami, mu kizuua ki kuiza o kutata; eme ngi ku kudila, eie anga u kala ni ku ngi ximana.

Mukumbi ua Mikumbi 5:6

Kazola kami nga mu jikuila dibhitu, maji muene kala-bhu dingi, uaié kiá mu ku mu ivua ngó mbimbi iê muẋima moxi ua ngi sengumuka, kioso muene kia kexi mu ku zuela. Nga mu soto hanji, maji ki ngi mu mono dingi, lémbua; nga muʼixana muene, maji ka ngiʼtaia dingi.

Izaía 45:19

Eme ki nga tela maka mu kasuekele, ki nga zuelela koxi a mavu kua vundu, kana; ki nga tangela mbutu ia Jakobo, ngixi: Ngi sotienunu mu kingoho; eme ngi Jihova ngi tanga o kidi, ngi boka ima iaiuka.

Jelemiia 29:12

Kienhokio mua-nda kuà di kola kokuami, anga muia, mu ngi sambela, eme ue ngà kà mʼivua.

Jelemiia 33:3

Dikole kokuami, nda eme ngi ku vutuile ni ngi ku tudile jimene ja ima ionéne, ia kuata ia kolo, i ua kambiʼeie kuijiia.

Daniiele 9:3

Anga ngi lungulukila pholo iami kua Ngana Nzambi, mu ku mu sota ni musambu ni ku mu dionda, bhenhobho nga jidi, ngi di ta kidinhaji, ngi di kuua utókua.

Matesu 21:22

Ni ima ioso kiá i mu bhinga mu kusamba, ni kuxikana, mu i tambula.

Matesu 21:31

Ku kiiadʼiki uebhi ua bhange o vondadi ia tatʼâ? Kuala ene: O dikota. Jezú uixi: Ni kidi kiene, ngi mi ambela, kuma akua kutambula lubhaku ni idianzunga ala ku mi tuamenena kubokona mu Utuminu ua Nzambi.

Matesu 6:29

Eme-phe ngi mi ambela kuma, né Solomá ni kijingu kiê kioso, ka kembele kala kia kembe kakitulu kamoxi-ku.

Marku 11:24

Uila kiki ngi mi ambela: Ioso ima i mu bhinga mu kusamba, xikanenu kuma mu i tambula, anga mu i tambula muene.

Marku 13:37

Kioso ki nga mi tangela enu, ene oso nga a tangelakiu: Di langienu!

Luka 11:10

Mukonda uoso u bhinga, u tambula; o uoso u sota, u sanga; o uoso u bunda, a mu jikuila o dibhitu.

Nzuá 14:13

Ioso i mu bhinga kua Tata mu dijina diami, eme ngi i bhanga, mbé Tata nʼ a tambule o fuma kua Mona.

Nzuá 15:16

Ki enu mua ngi solo eme. Maji eme nga mi solo enu, eme nga mi tumu ni muende ni kubhana ibundu, o ibundu ienu ni i nange, i kambe kuzangiua. Ni ioso ue i mu bhinga Tata mu dijina diami, muène ni a mi bhane-iu.

Nzuá 15:7

Se mua xala mo muami, o maka mami ni ma xala mo muenu, bhingenu ioso i mua mesena, a mi bhana-iu.

Nzuá 4:10

Jezú anga u mu vutuila, uixi: Eie se uejidile o ujitu uene mù bhana Nzambi, o ua ku bhingi menha ue, se ua mu ijidile, eie ueji ku mu bhinga muène, nʼa ku bhane menha ma muenhu.

Loma 2:7

Ua kà bhana muenhu ki uabhua kua oso a kuata kinhenge mu kubhanga o mbote, a bhindamena o fuma ni ujitu ni muenhu ua kamba dizubhilu.

II Kolindo 6:2

Ivuenu kioso kiambe Nzambi, uixi: Eme nga evidila bhu kithangana kia bhindamene o ku a kudila, nga a kuatekesa bhu kizuua kia kubhuluka. Ivenu, kuma: Kiki, kiene o kithangana kia kutambula o dikuatekesu kua Nzambi! Lelu kiene o kizuua kia kubhuluka!

Jihebeleu 11:6

Muthu-phe ua kambe o kuxikana ka tena kuuabhela Nzambi. Kuma uoso uiza kua Nzambi ki kala u xikana kuila sai-ku Nzambi, kuma muène mukua kubhandulula oso a mu sota ni muanu.

Jihebeleu 4:16

Uila kiki, tu bhiẋidienu bhu kiandu kia kiadi sé hele, phala Nzambi a tu kuatele henda. Bhenhobho tua kà tambula o kiadi ki tena ku tu bhandulula mu kumbi dia kubhondalala.

Tiiaku 1:5

Maji se sai muthu mudienu ua kambe unjimu, a u bhinge Nzambi, muène anga u mu bhana-u. Mbata muène u bhana kiavulu, mukua kuila ene oso u a bhana ni vondadi, kene mu baúla muthu.

Tiiaku 5:15

O kusambʼuku, kua kuxikana, anga ku mu bhulula uoso ua-lu kata. O Ngana u mu balumuna, se ua tele ituxi, u mu loloka-iu.

I Nzuá 3:22

O ioso ue i tu bhinga kua muène, tu i tambula mukonda tu aiuka o ijila iê, etu tua mu bhanga o ima ioso ia mu uabhela muène.

Dijingunuinu 2:24

Nga mi ambela-phe, enu mua xala-ku mu Tiiatila, oso ulonge-lu iú uaiibha ki muene na-u, mua kambe kuijiia o ima iazongo ia Satana, uila kia mu tanga ene, enu ki ngi mi xina dingi kimbamba.