Luka 11:2 - O Mikanda Ikola

² Jezú anga u ambela, uixi: Ki mu samba, muila kiki: Tata ietu, uaia ku maúlu, eneʼoso dijina diê a di kôlese. O Utuminu uê, uize.

Luka 11:2 ပူးပေါင်းရင်းမြစ်များ

I Jisobha 8:43

eie-phe ívua ku maúluʼoko, ku ua tunga, anga u bhanga ioso ia ku bhingi o ngenji, sembele madiembu oso mu ngongo ejiie o dijina dié, nda a ku kuatele uoma kala o kifuxi kié kia Izalaiele, anga ejiia kuila o dijina dié ene ku di tumbuila ku inzo iii i nga tungu.

II Jisobha 19:19

O kiki-phe eie u Jihova Nzambi ietu, tu kudile bhu maku mê; nda mautuminu moso Kulu dia mundu a kʼijiie kuila, u Jihova eie ngó u Nzambi ia Kidi.

II Malunda 20:6

anga uila, uixi: Àuá! Jihova, tata! Nzambi ia jitata jetu, kifua kʼeie muene u Nzambi mu diulu? Kʼeie muene u Mutumini ku thandu dia mautuminu moso ma akua jixi? O bhu lukuaku lué bhuene bhuala o nguzu ni kutena, ki kuala u tena kubhânga nʼEie.

Jisálamu 103:20

Tanesenu Jihova, mu ji-anjo jê; mu mazonda, mua xikamena muene ku mi tuma, muène mu tumaka izuua ioso o dízui diê.

Jisálamu 108:5

Zangalala, Ngana, u Nzambi, ku thandu dia maúlu, o fuma ié i tunde o fuma ioso mu ngongo.

Jisálamu 11:4

Jihova-phe uala hanji mu Tembulu ie ikôla; Jihova kiandu kiê kia xikama ku diulu; mesuʼê a tono muene ni kengelela, o ibhebhetela iê iala mù tonginina kiambote anʼatu mu ngongo.

Jisálamu 57:11

Zangalala, Ngana Nzambi, ku thandu dia maúlu; o fuma ié i tunde o fuma ioso mu ngongo.

Ndongixi 5:2

O dikanu dié ki di zuela lusolo, mba o muẋima ué u lenguluka kutanga kizuelu kioso-kioso kua Nzambi; mbata Nzambi iú mu diulu, eiʼeie bhoxi; kienhiki, o kioso ki u zuela, maka mé u a fikisa.

Izaía 63:16

Maji-phe, eiʼeie u Tatʼetu, né-mbe hanji o Mbalahamu ka tu ijiia, o Izalaiele ue ka tu suu; Eie-phe, Ngana, u Jihova, eie muene u Tatʼetu; u Mukudi uetu tundé xahúlu, diene o dijina dié.

Izekiiele 36:23

Eme-phe nga-nda kukolesa o dijina diami dionéne, diʼôsebulule muʼaxaxe ka akua jixi, diene di mua sembamesa enu muʼaxaxe-kâ; anga o jixi ja kà kʼijiia kuila eme ngi Jihova, kioso kianda ku ngi kôlesa ku mesuʼâ muene a kutala, Jihova Nzambi ua ki tange.

Daniiele 2:28

Sai-ku Nzambi ku diulu, muene mukua kujingununa ijinganu ioso; muene-phe ua-tumu kuijidisa sobha Nabukodonozolo kioso kia-nda kuiza-ku mu izuua ia sukidila-ku; o nzoji ié ni isuma i ua diuana ki uele ku kilu bhu hama ié, ienhiʼii:

Daniiele 2:44

Maji, mu izuua ia jisobha jenhiji, o Nzambi ia diulu ua kà bhekaku o utuminu ki u xikina dingi ku u jikinisa; o utuminu iú kà u ehela ku bhita dingi bhu maku ma miji iengi; uene kiá ua kà sasujula o mautuminu mosoʼama anga a-bhua-ku, maji o uene ua kà xalela ni kutumina mu thembu joso katé ku hádia ni hádia.

Daniiele 7:18

Maji o athuʼê angene a Suke-ku, ene a kà tambula ungana, anga a u vua kiá muene katé ku hádia ni hádia.

Daniiele 7:27

O utuminu-phe ni ungana, ni ulâmba ua ma-usobha moso, mene bhoxi dia diuluʼabha, a kà u bhakuila o athuʼê angene a Ió ua Suka-ku ku Ukota; o utuminu uâ ene-phe ua kà nangenena, ma-utuminu moso ma kà a bhikila ene, ni ku a beleselela.

Hozeia 14:2

Endenu ni ku di tela mudienu maka a kudiela, phala mu vutuke kua Jihova. Ngana mu tangedienu, kuila: Tu loloke o ikuma ietu ioso, u tu tambulule; bhu kididi kia ku ku satela tungombe, xikina, Ngana, o sata ia ujitu i tunda ku mizumbu ietu, kuma diene dibhôko di tua ku tela.

Ijila 10:3

Mozé anga uambela Alá, uixi: Kiki kiene kia tange Jihovaʼiki, kuila: kuzela kuami nga-nda ku ku londekeza ku ió oso a ngi zukama anga bhu pholo ia mundu uoso ngi kala ni kijingo. Maji Alá-phe ua di xibhʼê.

Ijila 22:23

Maji-phe, se ngombe, mba kibhaku kioso ku hombo ni mbudi, kialebhelela idiandu, mba kiabutu idiandu, se uedi u ki bhakula mu ujitu ua ku di fikixila, kiauabha. Maji ku ki bhakula mu futa hasa ia tele, a dituna-nakiu, ka ki ẋikina.

Habakuke 2:14

Mukonda o ixi ia kʼèzala ni kuijiia kua fuma ia Nzambi, mukuâ ni menha ki ezalesa o musanza ua kalunga.

Matesu 10:32

Kienhiki uoso u ngi fisala eme bhu pholo ia athu, eme uami ngi mu fisala muène bhu pholo ia Tata iami uene mu diulu.

Matesu 3:2

Dielenu! muehe o ituxi ienu, kuma utuminu ua diulu ua zukama.

Matesu 5:16

Kiene ue, o mukengeji uenu u muikine bhu pholo ia athu, ene a mone ima iambote i mu bhanga, ni a ximane Tata ienu uene mu diulu.

Luka 11:1

Kizuuʼiki, Jezú u kala kididi mù samba. O kia zubha kusamba, xibulu iê imoxi u mu ambela, uixi: Ngana, tu longe o kusamba, kala Nzuá kia longele o jixibulu jê.

Loma 1:7

Uila kiki, nga mi sonekena enu oso muala ku Loma, enu a mi zola kuala Nzambi, iú ua mʼ ixana phala kukala mu mundu uê. Ku kale kiadi ku mualʼ oko, ni paze i tunda kua Nzambi Tata ietu, ni Ngana Jezú Kristu.

Loma 8:15

Mbata enu ki mu tambula Nzumbi ia ubhika, kuila mu kala dingi ni uôma. Maji mua tambula Nzumbi ia uana i mi bhangesa kukala mu anʼ a Nzambi, o mu nguzu ia tu bhana o Nzumbi, ki tu bhana kudikola kua Nzambi: Abha, Tata!

I Kolindo 1:3

Ku kale kiadi ku mualʼ oko, ni paze i tunda kua Nzambi, Tata ietu, ni kua Ngana Jezú Kristu.

II Kolindo 1:2

Ku kale kiadi ku mualʼ oko, ni uembu u tunda kua Nzambi Tata ietu, ni kua Ngana ietu Jezú Kristu.

Ngalásia 1:4

Kristu ió ua di bhakuile ku kalunga phala ku tu bhulula ku ituxi ietu, nʼa tene ku tu kudila ku mundu iú uaiibha, kala Nzambi ietu, Tata, kia mu kala mu vondadi iê.

Efezo 1:2

Ku kale kiadi ku mualʼoko, ni kutululuka ku tunda kua Nzambi, Tata ietu, ni kua Ngana Jezú Kristu. Tu ximane Nzambi, Tata ia Ngana ietu Jezú Kristu!

Filipe 1:2

O kiadi ni kutululuka ku tunda kua Nzambi, Tata ietu, ni kua Jezú Kristu, Ngana ietu, kukale jinge ni enu oso ku mualʼ oko.

Filipe 4:20

O fuma-phe i kale ia Nzambi ietu, Tata ietu, katé ku hadia ni hadia. Amén.

Kolose 1:2

Tua sonekena akua Ngana, a tungu mu Kolose, ia ala jiphange jetu ja fiiele. Ku kale kiadi ku mualʼ oko, ni kutululuka ku tunda kua Nzambi Tata ietu, ni kua Ngana Jezú Kristu, Ngana ietu.

I Tesalonika 1:1

Eme Phaulu, ni Sidivanu, ni Timote, tua sonekena o jiphange jala mu Ngeleja iala mu mbanza ia Tesalonika. Enu mua tokala Nzambi, Tata, ni Ngana Jezú Kristu. Ku kale kiadi ku mualʼ oko, ni kutululuka kua soko.

I Tesalonika 1:3

Kuma tuene ku mi lembalala, sé ngó kufula, bhu pholo ia Nzambi ietu, Tatʼetu, o kukalakala kuenu kua kuxikana, ni kubhika kuenu kua henda, ni kukolokota kuenu mu kudielela Ngana Jezú Kristu.

II Tesalonika 2:16

Kiki-phe, Ngana ietu Jezú Kristu muène, ni Nzambi, Tata ietu ua tu zola, ió ua tu bhana o kubhua uôma ni kukondoka o malamba sè kufula, ni kudielela kuambote mu kiadi kiê,

Dijingunuinu 11:15

Anju ia kasambuadi anga u xika o koloneta iê. Hé kukala mazui a makota mu diulu, exi: Kiki o Utuminu ua jixi mu ngongo, ua biluka Utuminu ua Ngana ietu, ni ua Kristu iê. Muène kiá ua kà tumina katé ku hàdia ni hàdia!

Dijingunuinu 15:4

Nanhi u kamba kukala ni uôma ué, eie Ngana? Uebhi, Ngana, ka mesena kutanga o unéne ué? Mukonda eie-muène ngó ubheka ué ukôla! Akua jixi joso a kèza bhu pholo ié mu ku ku ximana, mbata o ikalkalu ié iaiuka, athu enhoso a mu i mona.

Dijingunuinu 19:6

Kienhókio anga ngʼívua kala dízui dia mundu ua dikota, mba kala dízui dia dibhubha dia menha, mba kala dízui dia kinuminu kia suina kia nzaji, dixi: Ximanenu Nzambi! Mukonda o Ngana, Nzambi ietu, Muteni-a-Ioso, muène Sobha.

Dijingunuinu 20:4

Kia zubha kubhita kiki, nga mono iandu ni iá a xikama-ku. Enhá anga a a bhana o kutena kua kufundisa. Anga ngi mona ue o nzumbi ja ió oso a a batuile mítue mukonda dia kutanga ku mundu o umbangi ua kidi kiejile mú tukulula Jezú, ni mukonda dia maka ma Nzambi, ió oso a kambele kubheza o kiama ni kitèka kiê, a kambele kutambula o kidimbu kiê bhu dibhomo mba ku lúkuaku. Enhá anga eza dingi ni muenhu, hé a unda ku ungana ni Kristu, ungana u bhanga midi ia mivu.