Loma 13:11 - O Mikanda Ikola

¹¹ Nga ki ambe kuila enu mua fuama mu bhanga kieniiki, mukonda o thembu i tuala mua ijiia. Kumbi diezabhu kiá, dia kubalumuka ku kilu. Mukonda, kiki o kubhuluka kuetu kua zukama dingi kiengi, ki ki soko ni ki tua mateka o kuxikana.

Loma 13:11 ပူးပေါင်းရင်းမြစ်များ

Ndongixi 9:10

Kioso kia kuiza bhu maku phala ku ki bhanga, bhanga-kiu muene katé bhuoso bhua suku o nguzu ié, mukonda o mu mbila mu ua-nda kuia, kana-mu dingi kikalakalu, mba ufunu, mba uhete, mba kuijiia kuoso-kuoso.

Jona 1:6

Ua mu tumina o naviiu-phe, u bhiẋila bhu mbandu iê, hé u mu ambela uixi: Na Kakilu, ihi ia ku kuata? Ua zekela-hi kiki? Balumuka, u sambele Nzambi ié, sumba Nzambi u tu lembalala phala ki tu di bote muʼalunga.

Matesu 16:3

Mu kimemene, muexi: Lelu mvula! Kuma ku diulu kua kusuka, kualômbo. Akua mangonha! Muejiia kutungula o pholo ia diulu, maji mu lémbua kutungula o ijimbuete ia jithembu!

Luka 21:28

Imʼ iii ki ia-ndu mateka kubhita, talenu bhulu, mu bhetuke mítue, kuma o kubhindumuka kuenu kua bhixila.

I Kolindo 10:11

Ima ioso ienʼ iii ia bhitile ku jitata jetu mʼ ukulu, ni i kale kijimbuete ku akua, maji ima ienʼ iii-phe a i soneka phala ku tu dimuna etu. Mukonda tuala mu kithangana kia kuila o dizubhilu dia jithembu dia zukama kiá.

I Kolindo 15:34

Phaphumukenu, mu kuate kilunji ni muenhu uaiuka kala kia fuama, kana dingi kuta ituxi. Kiki nga ki ambela o ku mi kuatesa jisonhi, kuma amoxi-moxi mudienu Nzambi ka mu ijiia.

Efezo 5:14

Mukonda kioso ki di tukulula mua zele, ki di bhanga mukengeji. Kiene kia ki ambela, exi: Phaphumuka eie uaii ku kilu, u fukunuke mu ʼalunga, kristu nda a ku bhake mua zele.

Tiiaku 5:8

Enu uenu kuatenu kinhenge. Kolenu miẋima, mukonda o kuiza kua Ngana kua zukama.

I Phetele 4:7

Disukilu-phe dia ima ioso dia zukama. Kuatenu-phe kilunji, mu kale ku mesu azele, mu kale mù samba.

II Phetele 3:11

O ki tua monuʼ iki, kuma ima ioso iii ia kà buila, tua fuama etu tu kala tu athu a kidifua kiahi? Mu kuuabha uendelu, mienhu ienu ia fuama mu i bhakula mu kuzela, ni uôma ua Nzambi.

II Phetele 3:9

Ngana kala ni kaxixi mu kubhitisa kizuelu kiê, uila amoxi ki a mu fika kaxixi. Oko ki kiene, kuma enu-phe a mi xididikila, mukonda muène ka mesena kuila ku kala muthu u texika, mbata ua mesena ene oso eza mu kudiela.

I Nzuá 2:18

Enu tuana tuami, kumbʼidi diene dia sukidila-ku. O ki muevuʼokio, kuila hinu kuiza Kristu ia makutu, kiene kiabhuʼiki. Kuma kiki kueza kiá jikristu javulu ja makutu, kiene ki tua kʼijidila kuila o kumbʼidi diene kiá dia sukidilaku, o dizubhilu dia zukama.

Dijingunuinu 1:3

Ua zediua uoso u tanga o divulu didi ni oso évua o maka iá a upolofeta, anga aiuka ima ioso ia soneka muenhomo! Kuma o thembu ia zukama phala ima ioso íii kubhita.

Dijingunuinu 22:10

Anju anga u ngʼambela dingi, uixi: O maka ma upolofeta mu divulu didi, kana ku ma suekela athu, kuma o thembu ia ima íii kubhita ia zukama kiá.

Dijingunuinu 22:12

Jezú uixi: Bhulakanenu! Eme ngi lenguluka kuiza! Ni kifutilu kiami nganda kuiza na-kiu, mu kuuanena athu oso kioso kia tokala mu ima iâ ioso ia bhanga jinga.

Dijingunuinu 22:20

O muène ua bhana umbangi ua ima ioso íii, uixi: Kidi kiene, ngiza kindala! Kiene muene! Izé, Ngana Jezú!