Loma 12:1 - O Mikanda Ikola

¹ Uila kiki nga mi diondo-phe, jiphange, mu jihenda ja Nzambi, di bhakudienu o mikutu ienu kua muène, kuma sata ia muenhu, mua di lumbu mu kikalakalu kiê, mu akua ujitu kua Nzambi. Kuma iú uene o ubhhezelu ua kilunji ua ni fuama.

Loma 12:1 ပူးပေါင်းရင်းမြစ်များ

Jisálamu 116:12

Kiki-phe ngi bhakula kima kiahi kua Jihova, mu mbote joso jene ku ngi bhanga?

Jisálamu 19:14

O kuzuela kuami kua dikanu, ni kubanza kuami kua muẋima, ku kale kuoso kua ku ku uabhelʼeie, u Jihova, u Nguzu iami, u Mukudi uami!

Izaía 56:7

Eme ue nga kà ambata ku mulundu uami ukôla, anga nga kà a bhangela fesa mʼonzo iami ia kusambela; o mibhaku iâ ia kuoha ni jisata jâ, nga kà ji xikina muene bhu kalatódio kami; kuma onzo iami a kà i ixana onzo ia kusambela phala akua jixi joso.

Jelemiia 6:20

Uasu ua dizumba-phe uahi uene, ua mu ngi tundila ku Seba kuná, ni lumbungu lua beta kuiuka lua ima ia mazumba lua tundu ku jixi ja makanga? mibhaku ienu ia kuoha ki ia ngi uabhela, o jisata jenu ue ki ja ngi kala ku vondadi.

Hozeia 14:2

Endenu ni ku di tela mudienu maka a kudiela, phala mu vutuke kua Jihova. Ngana mu tangedienu, kuila: Tu loloke o ikuma ietu ioso, u tu tambulule; bhu kididi kia ku ku satela tungombe, xikina, Ngana, o sata ia ujitu i tunda ku mizumbu ietu, kuma diene dibhôko di tua ku tela.

Dialuilu 7:21

ni kangombe ka ndumbe, ni kilumbe kia mbudi, ni kambudi ka ndumbe ka muvu umoxi, phala sata ia kuoha;

Luka 7:47

Uila kiki, nga ku ambela: Muène ua zolo kiavulu, kuma ituxi iê, sumbala iavulu, iòloloke kiá. Maji o uoso-phe a mu loloka kiatolo, u zola ue kiatolo.

Loma 12:2

Ki mu kaiele o funza ia mu ngongo mumu, maji ehelenu Nzambi a mi kitule kiengi, katé kilunji kienu kieza ku ubhe. Phala mu tongolole ioso o vondadi ia Nzembi, iauabha, ia ujitu, iatenena, i mu uabhela kiambote.

Loma 15:16

Kia ku kala ngi mukunji ua Kristu Jezú, phala kukalakalela akua jixi jengi, ió ki Jijudé. Nga di bhange kala ngi nganga ia kutula o Njimbu Iambote ia Nzambi. Nga mu bhanga kiki phala o ió ki Jijudé a di bhange sata ia xikina kuala Nzambi mu dibônzo dia Nzumbi Ikôla.

Loma 15:30

Kiki-phe, nga mi diondo, enu jiphange mua Ngana Jezú Kristu, ni mu henda ia mi bhana o Nzumbi, mu bangâma ni eme kumoxi, mu ngi kuatekese mu kusamba kua Nzambi, mukonda diami eme.

Loma 2:4

Inga eie ua mu tobhesa o jinzungule ja kulenduka, ni kudixibha, ni kuxididika kua Nzambi? Eie ua kʼ ijiia kiambote kuma o Nzambi ua lenduka, ni kuila muène ua mesena ku ku sunga mu kudiela.

Loma 6:13

Ni idiandu ienu kana ku i bhakula ku ituxi kala falamenda ia kubhanga kima kioso-kioso kiaiibha. Maji-phe di bhakudienu kua Nzambi, kala mu athu mua fuile kiá, maji mua tambula dingi muenhu, ni idiandu ienu bhakuilenu-iu Nzambi i kale falamenda ia kubhanga ima ia kuiuka.

Loma 6:16

Mukonda mua kʼijiia kuma kuoso ku mua di bhakula mu kubhika, muala mu abhika a muthu muenʼió uoso mua mu belesela. Kiene enu ue, kikale ituxi mua i bhikila ni mu fu, mba kikale o kutumaka Nzambi, ni a mi xikine ni mu kale mu athu mua iuka.

Loma 6:19

Nga mu ki amba mu uzuelelu ua athu, mukonda enu mua bhuila mu xitu. Uila mu ukulu ki mua bhakuile o idiandu ienu mu kukala mu abhika a ufusa ua kubhanga kiaiibha phala kubhikila o ituxi, kindala kiene kiá ki mu bhakula o idiandu ienu mu kukala mu abhika a uiukilu u bhangesa kukala ni muenhu ua kuzela moxi.

Loma 9:23

Kuma muène ua solo ue kuidikiza o unéne ua fuma iê ia lunduluila ku thandu dietu etu, a tu lendukila kuala muène, iú ua bhange mʼ ukulu munhá, phala ni tu tambule o fuma ienʼ ii.

I Kolindo 1:10

Nga mi diondo-phe, jiphange, mu dijina dia Ngana ietu Jezú Kristu, kuila mu dʼivua jinga kiambote mu kuzuela, ki mu kale mu kudiuana-uana ku ibuka-ibuka mudienu. Inda mu kala kumoxi kiambote mudienu, mu kala ni kilunji kimoxi, mu fika kiene kimoxi.

II Kolindo 10:1

Kiki eme muène, ngi Phaulu, ngene mu kuila ngixi ngi mulenduki, ngi mutululuki ki ngi kala bhu mbandu ienu, maji ngi muẋinuki ki ngi kala dikanga, nga mi bhingi phe kiki: Nga mi bhingi mu kulenduka ni henda ia Kristu, kuila,

II Kolindo 4:1

Mukonda ia kiki, etu ki tu kala ni usudi, kuma o Nzambi, mu henda iê, muène ua tu bhana o kikalakaluʼiki.

II Kolindo 4:16

Mukonda dia kiki, ki tu kuata usudi. Né-mbe o mukutu uetu iú ua bhoxi uia ni kujila, mukutu uetu ua nzumbi-phe uia ni kukala dingi ua ubhe kizuua ni kizuua.

II Kolindo 5:20

Kala kiki, tua mu zuela bhabha mu dijina dia Kristu, kala muene Nzambi uala ku mi ambela mu makanu etu, kuila: Mu dijina dia Kristu, ehelenu Nzambi a mi bilule mu tunde mu kukala mu jinguma jê, a mi bhange mu makamba mê.

II Kolindo 6:1

Uila kiki, ki tuedi tu akuenu mu kikalakalu kia Nzambi, tua mi bhingi kiki: O kiadi kia Nzambi, ki mua tambula kiá, ki mu ki ehele dingi ku di bota.

Efezo 4:1

Uila kiki, eme ngi hutile, a ngi kutu mukonda dia kubhiẋila Ngana, nga mi diondo mu enda kioso kia fuama mu kixanuʼokio kia mʼixana na-kiu Nzambi.

Efezo 5:10

Sotenu kudilonga jinga ioso i uabhela kiambote Nzambi.

Matendelelu 14:2

Mbata eie u kifuẋi kiangene kia Jihova Nzambi ienu; o Jihova phe ua mi tungula ku ifuẋi ioso ia dizale bhoxiʼabha, phala mu mu kale mu mundu uê ua mu tokala.

Filipe 1:20

Mukonda eme o kia ngi kate kiavulu, ki ngendi ni kudielela kuami kuoso, o kuila ki ngi lémbue kubhanga kioso kia ngi tokala, kala ki ngene kiá mù bhanga tunde ukulu, kota-kota mu kindala mumu, mbé ngi kale muene ni kubhua o uôma, phala ngi tene kufumanesa Kristu ku mukutu uami, kixi ku muenhu, kixi mu kufua.

Filipe 2:17

Kuma sumba anda ku ngi zunzumuna o manhinga, o muenhu uami anga a u bhana kala sata iòbhakuile kua Nzambi mukonda dia kuxikana kuenu. O kieniiki se ki bhita, eme ngi ki tanena, hé ngi sanguluka kumoxi ni enu oso.

Filipe 4:18

Kiki-phe ima ioso i mua ngi tumikisa, nga i tambula, eme ngala na-iu kala ia ngi vudila. Ngezala ni imbamba ia ngi bhekela Epafrodito i mua mu tumu na-iu, kifua mukuâ ni dizumba di nuha kiambote, sata i tambulula Nzambi, i mu uabhela kiambote.

I Tesalonika 4:1

O kiki, enu jiphange, mua di longo kiá kokuetu kioso ki mua tokala kuenda ni kuuabhela Nzambi. Enʼuenu kiene kiá ki mua mu kuenda. Kala kiki, tua mi bhingi, tua mi longesa dingi mu dijina dia Ngana Jezú, kolokotenu ni ku ki bhanga jinga dingi kiavulu.

I Tesalonika 4:10

Kiene ki mua mu londekesa ku mbandu joso kuila mua di zolo muene ni jiphange joso ku Masedonia. Tua mi tangela-phe, jiphange, phala mu vule ku ki bhanga jinga.

I Tesalonika 5:12

Tua mi bhingi-phe, jiphange, kuila muijiia jinga enʼió a kalakala mu ʼaxaxe kenu, a mi tela Ngana ku pholo, phala ku mi endesa ni ku mi longa.

I Timote 2:3

Kienhiki kima kiambote, o Nzambi, Mubhuludi uetu, kiene kia mu uabhela.

I Timote 5:4

Mutudi uoso-phe uala ni anʼê, mba alaula, ene a diange kuidikiza o ubhezelu uâ mu jindandu ku bhata diâ. Kuma mu kubhanga kiki, ene uâ ende ni kufuta ku mbote ia tambula jinga ku jitata jâ ni ku jikuku, mukonda o Nzambi kia mu uabhela kienhiki.

Filemone 1:10

Mu kienhiki, nga ku diondela Onézimo, ua di bhange monʼami ua kidi nga mu vuala mua Kristu Jezú. Mukonda kioso ki ngala ku malubhambu muʼaleia, kiene ki nga di bhange ngi tatʼâ mu nzumbi.

Filemone 1:9

Inda-phe ngi ku dionda, mukonda dia henda ié i nga ku kuatela, maji ngandala ngó ku ku bhinga kima kimoxi. Sumbala ngala ngi Phaulu dia muthu Uokulu kiá, ngunza ia Kristu Jezú, hutile iê.

Jihebeleu 13:22

Nga mi bhingi-phe enu jiphange, kuila, o hundu íii ia ku mi longesa, ivenu-iu ni muanu. Kuma o tumaka tu nga mi sonekena mu mukanda iú, nga tu fikisa muène.

I Phetele 2:20

A ki ximana kiebhi, se mua bhange kiaiibha, nʼa mi bhana jihuxi, anga mu xididika? O ki kala-phe mua bhange kiambote, anga mu tala hadi, anga mu xididika, kienhiki, Nzambi u mi bhela-kiu dibesá.

I Phetele 2:5

Enu uenu kala mu matadi ma muenhu, ehelenu-phe Nzambi phala a mi Uzale mu kutunga o Tembulu ia nzumbi, ni ku mi bhanga kibuka kia jinganga jolumbile Nzambi, ji bhana o jisata ja nzumbi, ji uabhela Nzambi, mukonda dia Jezú Kristu.