Kolose 1:12 - O Mikanda Ikola

¹² Muenda ni kusanguluka mu kusakidila Tata ua tu bhangesa o kufuama kididi kietu mu undundu ua akua Ngana mu Utuminu ua mukengeji.

Kolose 1:12 ပူးပေါင်းရင်းမြစ်များ

I Jisobha 6:7

O mu kutunga o tembulu, matadi a dianga jinga ku a iudikila kiambote kua tundu, o kioso kieza na-u kiene ue kia a te ku inzo ia Jihova; kala kiki, kioso kia kexi mu kutunga kʼevua jingaku kuṗhoṗha kua malutelu mba kukoka kua dikuua mba kubeta dingi ni felu ioso-ioso.

I Malunda 29:20

Bhenhobho Davidi uambela o kionge kioso, uixi: Kindala, Ximanenu Jihova Nzambi ienu. Bhenhobho o kionge kioso anga ki ximana Jihova Nza mbi ia jitata jâ, hé a bhetama, a fukama bhu pholo ia Jihova ni bhu pholo ia Sobha.

Jisálamu 116:7

Tunda-ku, muẋima uami, uize u nhohe bhabha; kuma jimbote ja ku bhanga Jihova ja nzungule.

Jisálamu 36:9

Mukonda ko kué kuene kuala o kitu kia muenhu; o mu mukengeji ué muene mu tua kà muena kuzela.

Jisálamu 79:13

Phala etu, Ngana, tu povo ié, tu jimbudi jé ja kilunga, tu kale mu ku ku sakidila jinga, ni kutumbula o diximanu dié ku miji ioso.

Jisálamu 97:11

Mukengeji a u kuua, phala athu aiuka; o kusanguluka phala oso emana mixima nzanza.

Jisabhu 16:1

Ima ioso i xinganeka o muẋima, i tunda ku muthu; maji o kuvutula kua kidi kua hundu ia dikanu-phe, ku tunda kua Jihova.

Jisabhu 4:18

Maji o njila ia athu a iuka-phe i di bhanga mukua ni mukengeji ua kimene, uia ni ku di bandekeza mu kuzela katé kuma ki ku zubha o kúkia.

Daniiele 2:23

Uixi-phe: Eie, Nzambi ia jitata jami, Tana-ku, eme ngi ku tumbula fuma! Kuma eie ua ngi bhe unjimu ni nguzu; mukonda o ki tua ku bhingi, eie ua ngʼijidisa-kiu, mbata ua tu lomboluela kioso kia katela sobha ku thulu iê.

Matesu 25:34

Muenexi anga uà kʼambela iá ala ku dilu diê, uixi: Zenu a mi zediuisa kuala Tata iami! Zenu mu lundule o Ungana, a mi iudikila na-u kuala Tata iami tunde ku dimatekenu dia ʼxi.

Nzuá 14:6

Jezú uixi: Eme ngi njila, ngi kidi, ngi muenhu. Kana muthu u bhixila kua Tata, ua kambe kuijiia ko kuami.

Nzuá 20:17

Jezú u mu ambela, uixi: Ku ngi kuate; kuma ki ngi bande luua kua Tata iami. Ndé-phe ku jiphange jami kà ambele kuma eme nga-nda kubanda kua Tata iami, kua Tata ienu; kua Nzambi iami, kua Nzambi ienu.

Nzuá 4:23

Maji dikumbi dí diza-phe, o diene dia bhixila kiá, dia abhezi a kidi ku bheza Tata mu nzumbi ni mu kidi. Kuma Tata muène uandala abhezi a kala kiki, ni a mu bheze.

Jipoxolo 20:32

Kiki-phe nga mi xalesa ni ku mi bhakula kua Nzambi ku mi langa, ni mu Njimbu iê ia kiadi i tena o ku mi tunga. Mukonda Muène ua ki soko o ku mi kuatekesa ni muie dingi ku pholo mu nzumbi, ni ku mi bhana o mabesá ió a bhaka Muène phala o mundu uê uoso.

Jipoxolo 26:18

Phala ua kà a tonese mesu, a xie mua vundu, a biluke ku mukengeji, a tunde mu ubhika kua Satana, eze kua Nzambi. O mu ku ngi xikana eme, a tambule muloloko ua ituxi iâ, mbé a kale kiá muʼ axaxe ka kibuka kia athu a Nzambi òsole.

Loma 11:17

O kiki o jithangu jamukuâ ja mudiva ua kudima, a ji bukuile-ku, eie u luthangu lua mudiva ua muxitu iá a ku phaphe ku kixina muʼ axaxe ka jithangu. Kiene ue enu ki mu Jijudé, mua di bhange kala o mudiva uenʼ ió ku muxitu, kindala mua tambula ku nguzu ni ku umvuama ua muenhu ua Jijudé.

Loma 15:27

Ene-muene a solo kubhanga kieniiki. Kia a uabhela, maji kia a tokala ue o ku ki bhanga, mu kubhindumuna oso a tate. Kuma o Jijudé se a uanena akua jixi jengi o mabesá mâ ma Nzumbi, ene uâ a tokala ku a bhindumuna ni ima iâ ia mabesá ma xitu.

Loma 8:17

O ki tu kala tu ana, tuala tu alundudi a mabesá oso a bhakela o mundu uê. Kristu mulundudi ni mukuetu, etu uê tua kà lundula-nê kumoxi mu ima ioso ia mu bhakela Nzambi. Kabasa tu bhita-nê kumoxi mu hadi, tua kà kala-nê kumoxi mu fuma iê.

Loma 9:23

Kuma muène ua solo ue kuidikiza o unéne ua fuma iê ia lunduluila ku thandu dietu etu, a tu lendukila kuala muène, iú ua bhange mʼ ukulu munhá, phala ni tu tambule o fuma ienʼ ii.

I Kolindo 8:6

Etu-phe kua tu kala ngó Nzambi imoxi. Muène Tata ua bhanga o ima ioso, etu tuala kulaia phala muène. Sai-ku ue Ngana imoxi ngó, muene Jezú Kristu; o kua Muene kuene kua bhangela o ima ioso; o muenhu u tuala na-u tua u muena kua Muène.

I Kolindo 9:23

Ima ioso iii ngi i bhanga mukonda dia Njimbu Iambote, phala ngi tambule ku mbote iê kumoxi ni akuetu.

II Kolindo 11:14

Ki kima kia ku di uana. Kuma katé ni Satana mukuâ ku di bhangesa kala anju ia mukengeji.

II Kolindo 5:5

Muène Nzambi ua tu iudika phala ku tu bilula kienhiki iú ua tu bhana-ku kiá o diẋîkina dia Nzumbi iê mu ima ioso ia-ndo tu bhana.

Efezo 1:11

Mukonda o ima ioso a i bhanga kala kia i xindi Nzambi mu ikanenu iê. O muène iú ua tu solo kukala tu mundu uê, mu kuongama kuetu ni Kristu, kala kioso kia mu kala mu vondadi iê, kia ki sola Muène tunde ku dimatekenu.

Efezo 1:18

Nga mu bhinga phala a jikule o ilunji ienu, a mi tonese o mesu ni mu mone o mukengeji, nda mu ijiie ioso ia tu dielelesa Nzambi mu kixanu kiê. Mbé ni mu ijiie ue kioso kiavulu o jimbongo ja mabesá mê ma tange kubhana o mundu uê,

Efezo 2:18

Kuma ni Jijudé, ni iá ki Jijudé tua tambula kua Kristu o disesa dia kubhiẋila etu ene oso ni Nzumbi imoxi bhu pholo ia Tata.

Efezo 3:6

O kikutu kieniiki: Mukonda dia Njimbu Iambote, o akua jixi jengi, ala uâ mu kisangela kumoxi ni Jijudé mu mabesá moso ma Nzambi. Kuma ala idiandu ku mukutu uene umoxi; akua kisangela mu polomesa ia bhana Nzambi mua Kristu Jezú.

Efezo 4:6

Sai-ku Nzambi imoxi ngó, Tata ia etu ene oso, uala Ngana ia ene oso, u kalakala mu ʼaxaxe ka ene oso, iú uala moxi dia ene oso.

Efezo 5:11

Kana kukala mu kisangela kia imbamba ioio ia kitombe, ki iene ni kuima, iene mù bhanga akuenu. Kota mu kala mu ku i bazela, phala ku i bheka muazele.

Efezo 5:20

Muila ni kusakidila jinga ima ioso kua Nzambi, muène Tata, mu dijina dia Ngana ietu Jezú Kristu.

Efezo 5:4

Né jindaka, né kuzuela kua uoua, mba kasekelu, iene ioso íii ki i mi fuama. Inda kota o kukala mù sakidila jinga Nzambi.

Efezo 5:8

Kuma enu-enu mʼ ukulu mua kexile mu kitombe, maji o kiki muala kiá mu mukengeji mua Ngana. Endenu-phe ni kuenda kala anʼa mukengeji.

Kolose 2:2

Nginda a bhetuke mu miẋima iâ, a takane kumoxi mu henda, a kale ni jimbongo ja kubhua phata mu kutongoloka, ejiie o kijinganu kia Nzambi, muène Kristu.

Kolose 3:15

O kutululuka ku tunda kua Nzambi, ku mi tetulule mu miẋima. O kutululuka kueniuku kuene Nzambi kua mʼixanena kukala idiandu ku mukutu umoxi. Hé muila ue ni kusakidila.

Kolose 3:17

Kala kiki, ioso-ioso-phe i muila, kixi mù zuela, kixi mu kubhanga, iene ioso bhangenu-iu mu dijina dia Ngana Jezú, hé mu sakidila jinga Nzambi Tata kua muène.

Tito 2:14

Muène muthu ua di bhele bhu kididi kietu, mu ku tu kula ku mangonha, ni ku tu zelesa, ni tu kale tu mundu uê ua ngene, mundu ua suina mu kubhanga ima ia mbote, ua mu tokala muène.

Jihebeleu 12:23

Enu mueza bhu dibhongolokelu dia ngalasa ia jithungunu ja Nzambi—ió ala ni majina mâ mʼosoneke mu diulu. Enu mueza kua Nzambi, mufundixi a athu oso, ni ku jinzumbi ja athu a iuka, iá a zubha o kutenena.

Jihebeleu 3:1

Uila kiki, enu jiphange jami mu kuxikana, mua tokala mu kixanu kia Nzambi, talenu kua Jezú a mu tumikisa Nzambi phala kukala Nganga ia Dikota, tua mu fisala mu kuxikana.

Jihebeleu 3:14

Kuma o kubhanduluka ni Kristu, ki bhinga o kudielela ku tu andeka na-ku, tu ku jijila katé bhu dizubhilu.

Tiiaku 3:9

O dimi diene di tu bheza na-diu Ngana dia Tata, diene ue di tu xinga na-diu athu a a bhanga mu kidifuanganu kia Nzambi.

I Phetele 5:1

Kiki-phe adikime mudienu nga a longesa, ngi muadikime ua Ngeleja ni mukuâ. Kuma ngi mbangi ia jiphaxi ja Kristu, ngi muthu nga tokala ue mu fuma ia kà tukuluka.

I Nzuá 1:3

O kima ki tua mono, ki tuevu, kiene ki tua mi tudila o Njimbu iê, phala enu uenu mu kale ku ukamba kumoxi ni etu, uila etu ki tuala mu kidi kiene ku ukamba kumoxi ni Tata ni Monʼê Jezú Kristu.

Dijingunuinu 21:23

O mbanza íii ki i bhingi ku kala dikumbi, mba mbeji, mu kumuikina-mu, mukonda o kubenha kua Nzambi kua zelesa-mu, o Kambudi muène o kandeia kâ.

Dijingunuinu 22:14

Azediua oso a sukula izuatu iâ, phala a mone disesa dia kubhiẋila ni kúdia ku kibundu kia muxi ua muenhu, ni kutena kubokuena bhu mielu iê katé mu mbanza.

Dijingunuinu 22:5

O usuku ki uà kala-ku dingi, ka kà bhindamena ue mukengeji ua kandeia, mba muanha ua dikumbi, mukonda o Ngana Nzambi muène ua-ndu kala muanha uâ, hé à kala ku ungana mu mivu ni mivu sè dizubhilu.