Josuué 7:26 - O Mikanda Ikola

²⁶ Ku thandu diê anga a lunjika-ku ndumba ia dikota ia matadi. Katé ni lelu iá bhobho. Jihova anga u bateka kiua njinda iê. Kiene kia bhangesa o kididi kiókio ku kʼixana exi, Honga ia Akole, katé mu kizuua kia lelu.

Josuué 7:26 ပူးပေါင်းရင်းမြစ်များ

II Samuuele 18:17

Anga a katula Abisalone, a mu takula mu dikungu mu ditutu, a mu longekela lumu ia matadi ku thandu diê. Akua Izalaiele oso-phe anga a muangana kala muthu ku bhata diê.

II Samuuele 21:14

Anga a fûnda ifuba ia Saúlo ni Jonata monʼê mʼoxi ia Bejami, bhu Zela, mu mbila ia Kiji tatʼâ Saúlo. Anga a kumbidila kioso kia a tumu muenexi. Kia zubha ku ki bhanga, Jihova u xikina kiua o kudionda kuâ, ixi anga i kala ni kubhanduluka.

II Malunda 29:10

Kindala-phe mu muẋima mua mu ngi bhita kuila tu ta kikutu ni Jihova, Nzambi ia Izalaiele; phala o kutêma kua njinda iê ku tu somboke ni kuie kuengi.

Ejidala 10:14

Inda-phe à te adikime etu oso, a kifuxi, ku maka eneʼá; o ió oso a sakana ni ahatu a jixi jengi, mu jimbonge jetu, eze kua ene mu izuua ioso ia a xindi, kumoxi ni adiakimi a mabhata mâ ni afundixiʼâ, katé ki tu somboka o kizuua kia njinda ia Nzambi ietu, mukonda dia kikuma kiki.

Jisálamu 85:4

Kiki ue tu bhetule, u Nzambi ietu ia Kibhamuenhu; né tua ku tondalela, tu lendukile o njinda ié ku i ehelele ku thandu dietu.

Makatukilu 32:12

Phalahi akua Ijitu enda ni kuila, exi: Muene ua a katula phala ku a bhanga kiaiibha, mbé ku a jibhila mu milundu, ni ku a jimisa o mbutu mu ngongo? Bhomba muxima, u bateke njinda ié ia uama, u diele ku kaxtiku koso ku uambe kubhana o mundu ué.

Izaía 40:2

Jeluzaleme mu tedienu maka ma mu kuatekesa muẋima moxi; mu tangedienu kuamba dinhengena dié diabhu-ku, kikuma kiê kiololoke kiá; o ituxi iê ioso, ua i tambuila kiá luiadi ku lukuaku lua Jihova.

Izaía 65:10

Salone ua kà dí-bhanga kibhanga kia jimbudi, o dikôlo dia Akole dinangu dia ibhaku, phala athuʼami a ngi soto.

Kuditenda 3:53

A takuila muenhu uami mu dikungu, iá a ngi lunduluila matadi ku thandu, phala kujikinisa o muenhu uami.

Hozeia 2:15

Bhene-phe bhu nganda ku mu bhela dingi o mábhia mê, ni dikôlo dia Akole ngi mu bhana-diu, di kala muelu ua ku mu dielelesa. Bhenhobho ua kà kala mù kuimba, mukuâ ni mu izuua iê ia unzangala, uila kala bhu kizuua kia bandele mu kutunda ku Ijito.

Hozeia 2:17

O majina ma mahamba mê, mu kanu diê nga-nda ku ma katula-mu, majina ma iteka ioio ka kà muiza dingi mu kilunji kiê.

Jouele 2:13

Bhu kididi kia kutandula o izuatu ienu, tandulenu muẋima uenu, mu vutuke ku Jihova, Nzambi ienu; mukonda muene mukua henda, ua lenduka, ka thathamana lusolo, ukôla mu kubhanga o mbote, anga u diela se u bhanga kia iibha mu kubazela kuê.

Jouele 2:18

Bheneʼobho Jihova ua kà kala ni muanu uaʼxi iê, kifuẋi kiê ua kà ki kuatela henda.

Jona 1:15

Hé a zangula Jona, a mu mvunduna mu kalunga, njinda ia kalunga anga i sosoloka.

Zakadiia 6:8

Anga u ngʼixana u ngi tangela, uixi: Talesa, o ió aii ku ixi ia thunda, a bhangesa kuila o Nzumbi iami ia nhoha mu ixi ia thunda.

Dialuilu 25:8

u kaiela diiala dienhidi dia Izalaiele katé mu balaka, u toma kiiadi kiâ, ni diiala dia Izalaiele ni muhatu, mu mala muene. Kiene kia sukika kibhuika, kia kuatele kiá anʼa Izalaiele.

Matendelelu 13:17

Enu-phe lukuaku luenu kana dingi kukuata kima kia ufusa ku imbamba ia tokala mu sanzalʼoio mbé ki mu nomone-mu kama, phala njinda ia Jihova isosoloke, nda a ku lendukile nʼa tene ku ku kuatela henda, phala a ku sokolole kala kia lokela o jitata jenu,

Matendelelu 13:18

kioso eie ki u tumaka kiambote o dízui dia Jihova Nzambi ié, anga ukuata o kualuka ijla iê i ngala ku ku tendelela leluʼiii, ni uende ni kubhanga kioso kiaiukila ku mesu ma Jihova Nzambi ié.

Josuué 10:27

Mu kuila kumbi di toloka kiá, Josuué utuma kuila a a tulule kiá ku miẋi; hé a a takula mu dibânda mua suameneʼomo; ia a zukika-ku i-matadi iònene, ia xiti kuenhoko katé mu kizuua kia lelu.

Josuué 7:24

Bhenhobho Josuué, ni anʼa Izalaiele oso, a kuata Akane dia Zelahe, ni phalata, ni kapote, ni mutàdi ua ulu, ni anʼê a mala ni a ahatu, ni jingombe jê, ni jibulu jê joso, ni jimbudi, ni balaka iene, ni ima ioso kiá ia kexile na-iu, anga a i bheka mu honga ia Akole.

Josuué 8:29

Sobha ia Hai anga u mu nhenga mu muẋi, katé mu kumbi dia ngoloxi. Kia tula dikumbi-phe, Josuué u tuma kukatula kimbi kiê mu muẋi, nʼa ki texi bhu muelu ua kimbaka kiê, anga a ta ndumba ia matadi ku thandu diê, í ia xalela katé mu kizuua kia lelu.