Jisálamu 106:40 - O Mikanda Ikola

⁴⁰ Kia bhangesa o njinda ia Jihova kuuama kala túbhia, kia tala ku povo iê; ni undundu uê ua mu kuata fokoso.

Jisálamu 106:40 ပူးပေါင်းရင်းမြစ်များ

I Jisobha 11:25

Anga u kala mu di kuata jinga ni Izalaiele izuua ioso ia Solomá, ku thandu dia phulu ue ia kexi mu bhanga Hadade, mukonda dia kuzemba Izalaiele, kuma Hadade muene ua kexi sobha ia Sídia.

Jisálamu 74:1

Eie Nzambi, tata, kífua ua tu ẋimbukilà-ku kiá? Njinda ié kífua iia ni kuxikita dixi, i ua kuatela o jimbudi ja makèla mé?

Jelemiia 12:7

Onzo iami nga i ehelela, undundu uami nga u ẋimbuka: kazola ka muenhu uami nga mu bhakula bhu lukuaku lua jinguma jê.

Kuditenda 2:7

Jihova kalatódio kê ua ka ẋimbuka, o dibhezelu diê dia mu kumu; imbaka ia fikidila mazêmba mê ua i bhakula bhu lukuaku lua isuéia; abhangela jibuia mʼonzo ia Jihova, kala kiene kubhita mu kizuua kia kionge kia fesa.

Ijila 20:23

Kana kukuata kukaiela o ifua ia akuaʼxi u ngala ku kaiesa bhu pholo ienu nʼa mi bhue ku mesu, mbata o isunji ioso iii iene i a bhange; ʼKí kia ngi bhekela o ku di kuma-nâ.

Ijila 26:30

O jikalatódio jenu ngi ji lundumuna, o jiphiladi jenu ji mua tela o dikumbi, ngi ji muanga-muanga; o imbi ienu ngi i lumala kuthandu dia imbi ia jinzambi jenu; ni muenhu uami uene ki ua-nda ku mʼinda dingi.

Zakadiia 11:8

Anga ngi jimisa o abidi ene oso kitatu mu mbeji imoxi, kuma o muenhu uami ua bhondalala mukonda dia ene, o ene uâ eme a ngi kumine kiá ku mienhu iâ.

Matendelelu 32:19

Jihova phe, kia ki mono, ua ehelela bhobho! Mbata azange, a mu lokalala! A mu zokesa ni anʼê a mala ni a ahatu!

Matendelelu 9:29

Suke kiene, ene-phe hanji ene o povo ié, ene undundu ué u ua katula ni undanda ua lukuaku lué lua suína.

Afundixi 2:14

Njinda ia Jihova anga i uamena Izalaiele, Muene hé u a bhakula bhu maku a ingumba i kala mu ku a bhûnda; anga u a tambuisa bhu maku a jinguma jâ, ja a kala mu jimbandu, katé ka tena dingi kuimana mu kubhânga ni jinguma jâ.

Afundixi 2:20

Njinda ia Jihova anga i uama ku thandu dia Izalaiele, uixi: Mukonda dia mundu uenhú kutondala kikutu kiami, kioso ki nga lekela o jitata jâ, ni kukamba kuívua dízui diami;

Afundixi 3:8

Mukonda dia kiki, njinda ia Jihova i uama ku thandu dia Izalaiele, anga u a sumbisa bhu lukuaku lua Kuxane-Lesataime muenexi ku Mezopotâmia; anʼa Izalaiele anga a bhikila Kuxane-Lesataime mu nake dia muvu.