Jelemiia 23:3 - O Mikanda Ikola

³ Anga eme-muène ngi bhongolola joso ja subhuka ku jimbudi jami, ngi ji takana ku jixi joso kua ji kaielele anga ngi ji vutula dingi mu ibhanga iê, hé ja kà di vuala anga ji sokoloka muene.

Jelemiia 23:3 ပူးပေါင်းရင်းမြစ်များ

Jelemiia 32:37

Tala-ze, eme nga-nda ku a bhongolola ku jixi joso ku nga a takuile mu njinda iami, ni mu kutema kuami, ni mu kuthathamana kuami kua vulu kinéne; nga-nda kutona dingi ku a bheka bhu kididi kienhiki anga ngi bhangesa kuila a tunga muenhomo, ni kudondama kuoso.

Jelemiia 29:14

Enu-phe mua-nda kuà ngi bonga muene, Jihova ua ki tange, nga kà bhangesa kuila jihutile jenu ja kà vutuka, anga ngi mi bhongolola mu miji ioso ni mu ididi ioso mu nga mi takuile, eme ngi Jihova, anga ngi tona dingi ku mi bheka bhu kididi kioso bhu nga mi katuile mu ku mi bheka ku jixi jengi.

Jelemiia 30:3

Mukonda kua-nda kuiza izuua, eme ngi Jihova, nga-nda ku vutulula ubhika ua kifuxi kiami kia Izalaiele ni Juda, eme ngi Jihova, anga ngi tona dingi ku a bheka mu ixi i nga bhele ku jitata jâ, anga a ívua, i kala iâ.

Izekiiele 11:17

Kala kiki, ila: O Ngana dia Jihova ua tange kiki: Nga-nda ku mi ongeka mu kaxi ka ifuẋi, anga ngi mi takana ku jixi kua mi takuile, nda ngi mi bhana oxi ia Izalaiele.

Jelemiia 31:8

Tala, kuma ngʼiza-nâ tundé ku ixi ia ku suku, nga-nda kua bhongolola muene tundé kua suku oxi; ngʼiza-nâ kumoxi ni ifofo ni inema, ni ahatu emita, kumoxi ni iá a mu bhanduluka a kala kifuxi kia dikota, kia-nda kuvutuka bhabha.

Jisálamu 106:47

Tu bhulule, tata, u Jihova, Nzambi ietu, u tu bhongolole dingi ku matumbu ku tua di muangena, phala tu sakidile dingi o dijina dié, tu kole kikóue kia ku ku ximana eie.

Izekiiele 36:24

Hé nga kà mi katula muʼaxaxe ka akua jixi, ni ngi mi bhongolola ku jixi joso, anga ngi mi bheka dingi mʼoxi ienu.

Izekiiele 36:37

O Jihova Nzambi ua tange kiki, uixi: Mu kienhiki hanji o muiji ua Izalaiele a-nda ku ngi bhinga-kiu; kuila nga kà a sokoluela athu kala kilunga kia ibhaku.

Mikeia 7:12

Mu kizuuʼokio a kʼèza ko kué tunde ku Asídia katé ni ku jisanzala ja Ijitu, a kà tunda ku jimbonge ja Ijitu katé ku ngiji ia Ufalate, tunde ku musanza ua kalunga katé ku musanza ua mukuá ua kalunga, tunde ku mulundu iú katé ku mulundu iuná.

Jelemiia 8:3

Oso-phe o masubhu a kà subhuka ku muiji iú ua iibha, enhó a kʼènda o kufua o muenhu ka-nda ku uinda, oso a-nda kusubhuka mu ididi muoso mu nga a takuila, Jihova dia Ilombo Ieta ua ki tange.

Jelemiia 30:10

Ku kale-phe ni uoma, eie mubhukʼami Jakobo, Jihova ua ki tange, eie ue Izalaiele, kana kusasumuka; kuma, tala, nga-nda ku ku bhulula ku jixi ja makanga, ni muiji ué ku ixi ia uhutile uê; anga Jakobo ua kà vutuka dingi, hé ua kà nhoha, ua kà kala muene bhua kondama; ki bhua kà kala u mu kuatesa uoma.

Jelemiia 31:7

Mbata Jihova uixi: Imbenu ni ngalasa kua Jakobo; tanenu mukonda dia Kitoto kia ifuẋi; tenu nzongo, imbenu diximanu, zuelenu muexi: Bhulula, Jihova, o mundu ué iá, a subhuka kua Izalaiele.

Jelemiia 46:27

Eie-phe Jakobo, dia mubhikʼami, ku kale ni uoma, mba u kala ni kimbuua eie Izalaiele; mukonda eme nga-nda ku ku bhuluila muene dikanga, o mbutu ié ngi i bhuluila muene ku ixi ia ubhika uâ; o Jakobo hádia u vutuka, anga ua kà nhoha, u tuluka muene, ki bhua kà kala muthu u mu kuatesa uoma.

Ijila 26:9

Enu-phe ngi mi sakukila muene kuma mesu ami ngi a ta kokuenu, anga ngi mi bhana o ku di vuala, hé ngi mi sokolola muene, anga ngi kolesa o kikutu kiami nʼenu.

Jelemiia 16:15

Maji ela: Jihova u kola! ua tombola ana a Izalaiele koxi ia kusuku ni ku jixi joso ku a a takuile; mbata eme nga-nda ku a vutula ku ixi iâ i nga bhele ku jitata jâ.

Jelemiia 50:19

Anga Izalaiele ngi mu vutukisa mu kibuta kiê, hé ua kà di dikila ku mulundu ua Kalamelu ni ua Baxane; muenhu uê anga uikutila ku mulundu ua Ifalaimi ni ua Ngiliiade.

Izekiiele 36:11

Hé nga kà sokolola athu ni ibhaku ku thandu dienu, ene hé a ka di sokolola ni ku di vualulula; anga ngi mi tungisa kala mʼukulu, anga ngi bhangesa dingi kuila o kikexilu kienu ki beta dingi o kukala kiambote, ku dimatekenu dienu ndenge; anga mu kʼijiia kuila eme-ʼeme ngi Jihova.

Mikeia 2:12

Ni kidi kiene, hádia ngi ku bhongolola ni kivimba kioso, eie Jakobo; ni kidi muene, hádia ngi bhongolola o mbandu ia Izalaiele ia xala-bhu; ene oso nga a bhongolola anga nga ongeka bhu kididi kimoxi kala jimbudi ja Bozola; ela kala kilunga kiala muaxaxi ka kibhanga kiâ; ki nga a bhongolola a kà lunguta ni kuta jibuia javulu mukonda dia mundu kuvula.