Jelemiia 2:6 - O Mikanda Ikola

⁶ Alembua kuila: Jihova uala kuebhi, ua tu tundisa kʼoxi ia Ijitu? Iú ua tuʼendesa mu ixi ia kisekele, ixi ia manhana ni makungu, mu ixi ia kukuta ia kitombe kia kalunga, oxi kana muthu ua kexi kubhita-mu, mua bhingi monʼa muthu ka tena kutunga-mu?

Jelemiia 2:6 ပူးပေါင်းရင်းမြစ်များ

II Jisobha 2:14

Anga u zangula o divunga dia Elija dia mu sonuena, anga u di vunda menha, uixi: O Jihova, Nzambi ia Elija, iú kué? Bhenhobho kia di vundu ku menha, ene a di muange mu mbandu jiiadi; anga Ilizeu u bhita.

Jobe 3:5

Usuku ua nzumba u ki sambukila ni kitombe kia kalunga; matuta a vundu a tunge ku thandu diê; ima ioso iedi bhuí ifuafua kala dixi i jimuna o muanha i ki kuatese uoma.

Jobe 35:10

Maji ki bhuala ngó muthu, uila: Nzambi uala kuebhi ua ngi bhange, u bhuselela mimbu ia diximanu usuku uoso,

Jisálamu 23:4

Né-mbe ngi bhita mu dikôlo dia kitombe kia kalunga, ki ngi kala ni uoma ua kima kiaiibha, mukonda eie uala ngi bheka; ni mbangala ié ni dikoue dié, ene a ngi bhuisa hele.

Jisálamu 77:5

Ngi kuata ku xinganeka o izuua iókulu, ngi banza muene o mivu ia xahulu, ngixi:

Makatukilu 20:2

Eme Jihova, Nzambi ié, nga ku katula mʼoxi ia Ijitu, mu dibhata dia ubhika.

Izaía 63:9

Mu lamba diâ dioso ni muene uevile dilamba, anga mukunji uene bhu pholo iê u a bhulula; mukonda dia henda iêmuène ni kulenduka kuê, muene ua a bhulula; iu ua a tambula, iu u a endesa jinga kienhiki mu izuua ioso ia xahúlu.

Izaía 64:7

Ki bhuala dingi u hingila o dijina diê, mba u phaphumuka nʼa kuatenene kokué; mbata eie ua tu suekela o pholo, eie ua tu bhangesa ku botomoka mukonda dia ikuma ietu.

Jelemiia 13:16

Jingisenu Jihova, Nzambi ienu, kiosuʼiki kitombe ki kieza luua, kiosuʼ ʼiki ue o inama ienu kiluua i di bhukajana ku milundu ia vundu, ni usuku uila bui; mu kuila enu mua kingile mukengeji, muene hé u u bilula kizenji kia kalunga, anga u bheka-ku kitombe.

Jelemiia 2:2

kixi: Nde, ua kà handekele mu mátui ma Jeluzaleme, uixi: Jihova uambe, kiki: Nga ku lembalala, ni mbote ja unzangala ué, ni jihenda jé ja ubhanga, ni kioso ki ua ngi kaiejela jinga mu kikangalakata, mu ixi ki i xikina ku i kuna.

Jelemiia 2:8

O jinganga a lembua kuila: Jihova uala kuebhi? O jimesene ja kitumu a lembua ku ngʼijiia; o alongi a ngi tondalela ijila; o jipolofeta a zambuila Bahale ni ku landukila ima ki i bhandulula kima!

Jelemiia 5:12

Adituna Jihova, anga ela exi: Ió ki muene; exi dingi: Ki kua-nda ku tuiza kiluezu kia kima; ki tua-nda ku mona xibhata né nzala.

Jelemiia 5:2

Né-mbe a zuela kuila: Jihova a kole muenhu, ni kidi kiene a loka ngó makutu.

Jelemiia 51:43

Jimbanza jê joso ja kituka bhoxi-mavu, ixi ia kukuta, ia di bhange kikangalakata, ixi ki i moneka uoso u tunga-mu, mba mu bhita ngó monʼa muthu.

Hozeia 12:13

Maji Jihova-phe ua tumine o polofeta iú ua tombola Izalaiele ku Ijitu, o ku lukuaku lua polofeta kuene kua kondekela jinga o mundu uê.

Hozeia 13:4

Sumbala kiene, hanji tunde koxi ia Ijito, eme Jihova Nzambi ié; kala kiki, kana ku di tambulula dingi ni nzambi iengi nʼu ngi xi eme, mbata ki kuene dingi Mubhuludi uengi, kale eme-muène ngó.

Amoji 2:10

Moxi ia Ijitu ue Eme-muène nga mi katula-mu; makuinhi a uana a mivu u nga mi endesa mu kikangalakata, phala o ixi ia mamodi ni ngi mi bhane-iu i mi kale ixi ienu.

Matesu 4:16

Athu a xikamene mu kitombe a mono mukengeji uonéne! A xikamene kididi kia kizenji kia kalunga, kuaki mukengeji uâ!

Matendelelu 1:19

Kiene kiua ki tua katuka, mu kutunda ku Holebe, anga tuhuha kikangalakata kiosuʼokio ki mua di muena enu-enu; tua bhitila ku milundu ia akua Mamodi, kala kia tu tumina Jihova, Nzambi ietu; anga tu bhiẋila bhu Kadexe-Baneia.

Matendelelu 32:10

Ua mu sange mʼoxi ia kikangalakata kiahatu, ixi ia kukuta ia ngene ni ngene, muala kubuza ngó iama! Ua mu ongeka, ua mu lange, hé u mu sasa mukuâ ni mona diesu.

Matendelelu 8:2

Xinganeka phala u kale mu lembalala njila ioso ia mi bhitisa Jihova Nzambi ienu, mu makuinhi auana a mivu osoʼâ mu kikangalakata, phala a mi bateke, nda a mi lole, mbé o kuijiia kioso kia mi kala ku miẋima moxi, mba mu xikina kutumaka ijiia iê, mba kana.

Afundixi 6:13

Ngidiione anga u mu ambela, uixi: Ngana iami tata, Jihova se uala ni etu, ima ioso iii ia tu ijila-hi? o ikalakalu iê ia madiuanu ii kuebhi, ia kexi mu tu kunda adiʼetu, exi: Manhi ki Jihova muene ua tu katula mu Ijitu? Kikiphe Jihova ua tu ambudisa, iu ua tu bhakula bhu lukuaku lua Midiiana.