Jelemiia 10:7 - O Mikanda Ikola

⁷ Eie u Muenexi uavu ifuẋi ioso, mukuahi muene u kamba ku ku kuatela o uoma? Kuma eie ngó ua fuama ku ku kuatela o uoma; mbata muʼaxaxi ka jinjimu joso ja akua jixi, ni mu mautuminu mâ, kana-mu ua di fuangana nʼeie.

Jelemiia 10:7 ပူးပေါင်းရင်းမြစ်များ

II Jisobha 17:39

Maji Jihova, Nzambi ienu, muene ngó mu mu kuatela uoma, nda Muene u mi bhulula bhu maku ma jinguma jenu joso.

I Malunda 16:25

Kuma Jihova Munéne, uafuama ku mu ximana kiavulu, mukonda muene ukôla o jinzambi joso ndenge.

Estere 1:13

Anga u zuela ni adiakimi ejiia phangu ni ndongo ia jithembu ku mivu ni minhamo, kuma kiene ki ejidila mu utuminu uâ, kioso kiambe kubhanga muenexi, bhu dianga hanji kubhita kuzuela ni jimesene ejiia ijila ni ífua iaʼxi.

Jisálamu 147:5

Ngana ietu u kôla, ua suína mu kukalakala; o kuijiia kuê ki kuene mbambe.

Jisálamu 22:28

Kuma ungana uangene ua Jihova; muene ua tokala ku tumina akua jixi joso.

Jisálamu 47:3

Muene ua lende o ifuẋi ioso ia tu tolokela etu; o athu engiʼó iu ua a te bhoxi dia inama ietu.

Jisálamu 72:11

Katé ni jisobha joso ji diunda bhu pholo iê; ilômbo ia miji ioso i kala mu mu bhikila muene.

Jisálamu 76:7

Eie, eie Ngana, Ukôla! U kuata uôma! ki ku kuata o njinda ié, nanhi u tena kuimana-bhu?

Jisálamu 86:8

Mu jinzambi kana-mu, Ngana, ua soko ni eie; kana-ku ue ikalakalu kala o ikalakalu ié.

Jisálamu 86:9

Mbutu joso jʼathu, eie-muène ua a bhanga, hádia a kèza kubheza bhu pholo ié, u Ngana; a kà jingisa o dijina dié.

Jisálamu 89:6

Kuma, nanhi muene, mu dinga ni dinga, u mu fika ni Jihova? o ku anʼa mazonda, nanhi u soka ni Ngana?

Makatukilu 8:10

Muene, uixi: Mungu. Mozé uixi: Ki bhita muene, kala ki ua tange eie; phala eie u kʼijiie kuma kana-ku dingi u soka ni Johova, Nzambi ietu.

Makatukilu 9:14

Mukonda o kiki kiá nga-nda kutumikisa o mabhebhu ami oso ku thandu dia muxima ué, ni ku thandu dia akua mbèle ié, ni ku mundu ué; phala eie u kʼijiie kuma eme ki ngi moneka mukuetu nga soko-nê mu ngongo ioso.

Izaía 2:4

Muene ua kà tetuluila akua-jixi, ua kà bazela miji ia nzungule; enhá, kuila a xikina kia a bazelʼiki, jixibhata jâ a kà ji kitula matemu, jisosa jâ a kà ji kitula jimvo; ki bhua kà kala dingi ku-di-zengela jixibhata kifuxi ni kifuxi, né ku di-longa dingi kúlua ita.

Jelemiia 10:6

Kana-ku u di fuangana nʼeie, u Jihova: Eie u munéne, o dijina dié ue di kola mu kuvula o nguzu.

Jelemiia 5:22

Jihova uambe: Enu nguenu ku ngi xila, kuambienu? nguenu ku ngi kala ni uoma, eme nga te o mbambe ia kisèkele kia hatu mu xitila o kizanga kia kalunga, i ia xalela ngonge i nangenena ia bhingi o muene u lembua ku i matuka? Né-mbe u fundumuna mabhuku mê, ka tena kutolola; né-mbe mabhuku a zuma, mbambe ka kà i somboka.

Daniiele 2:27

Daniiele hé u kumbulula bhu pholo ia sobha, uixi: O kijinganu ki uajijidila eie, sobha, né jinjimu, mé jimesene ja kutalela ku jithéthembua, né jinganga ja isuma ni iphata, né akua kuzambula, ka ki tena ku ku tetuluila-kiu, sobha.

Daniiele 2:28

Sai-ku Nzambi ku diulu, muene mukua kujingununa ijinganu ioso; muene-phe ua-tumu kuijidisa sobha Nabukodonozolo kioso kia-nda kuiza-ku mu izuua ia sukidila-ku; o nzoji ié ni isuma i ua diuana ki uele ku kilu bhu hama ié, ienhiʼii:

Habakuke 3:2

Jihova ngevu, maka mé mu uazuela, o uoma iu ua ngi kuata! Kikalakalu kié u Jihova, bhana-kiu dingi muenhu ku mivu ioso, o i uazuela enda ni ku i ijidisa dingi ku mivu ni mivu; kioso ki u thathamana jinga lembalala, Ngana, o kulenduka kué!

Zakadiia 2:11

Bhu kizuuʼokio miji ia ndumba ia-nda kua kà bhongolokela kua Jihova, anga a kà kala kifuẋi kiami; hé nga kà tunga muʼaxaxi kè-eie, anga ua kà kʼijiia kuila Jihova dia Ilombo muène-muene ua ngi tumikisa kokué.

Malakiia 1:11

Kuma tunde bhu tundila dikumbi katé bhu di fuila, o Dijina diami dia kà kala kima kionéne ku miji ioso. Mu ididi ioso Dijina diami a kà di ohela uasu ua dizumba ni ku di bhela jisata ni maujitu mazele kiambote. Mukonda Dijina diami dionéne mu miji ioso. Kiene kia tange Jihova dia Ifuẋi.

Luka 12:5

Eme ngi mi londekesa-phe uoso mu mu kuatela uôma: Mu kala ni uôma ua Nzambi, ió kia zubha kujibha o mukutu, u tena ue ku mi takula mu ʼalunga ka túbhia. Xi, nga mi ambela muene: Kalenu ni uôma ua Nzambi! Muenió mu ẋidienu.

I Kolindo 8:6

Etu-phe kua tu kala ngó Nzambi imoxi. Muène Tata ua bhanga o ima ioso, etu tuala kulaia phala muène. Sai-ku ue Ngana imoxi ngó, muene Jezú Kristu; o kua Muene kuene kua bhangela o ima ioso; o muenhu u tuala na-u tua u muena kua Muène.

Josuué 4:24

mbé ifuẋi ioso mu ngongo ejiie kuma lukuaku lua Jihova lu kôla; enu uenu ni mu kale ni uoma ua Jihova, izúua ioso, katé ku hádia ni hádia.

Dijingunuinu 11:15

Anju ia kasambuadi anga u xika o koloneta iê. Hé kukala mazui a makota mu diulu, exi: Kiki o Utuminu ua jixi mu ngongo, ua biluka Utuminu ua Ngana ietu, ni ua Kristu iê. Muène kiá ua kà tumina katé ku hàdia ni hàdia!

Dijingunuinu 15:4

Nanhi u kamba kukala ni uôma ué, eie Ngana? Uebhi, Ngana, ka mesena kutanga o unéne ué? Mukonda eie-muène ngó ubheka ué ukôla! Akua jixi joso a kèza bhu pholo ié mu ku ku ximana, mbata o ikalkalu ié iaiuka, athu enhoso a mu i mona.