I Samuuele 25:34 - O Mikanda Ikola

³⁴ Kuma ni kidi muene kala Jihova, Nzambi ia Izalaiele kiala ku muenhu iú ua ngi fudisa ku ku kuama, se eie ua kambele ku lenguluka kuiza ku ngi batuila, katé ki kúkia, eme ki ngeji kuxila Nabale ku muenhu, né ngó monʼumoxi ua diiala uòfele-fele.

I Samuuele 25:34 ပူးပေါင်းရင်းမြစ်များ

Dimatekenu 20:6

Nzambi anga u mu ambela ku nzoji, uixi: Nga kʼijiia muene kuma ua ki bhange ni muxima ua uabha, eme uami kiene ki nga ku fudisila o kuta kituxi ko kuami; kiene ki nga ku fudisila o ku mu kuata.

Josuué 10:6

Mala a tokala mu Ngibiione-phe, atuma jiphunga kua Josuué, bhu kibangu kia Jidingale, exi: Abhikʼé ku tu ehele-kiu; banda muene lusolo kunu, u tu kudile; tu bande, kuma jisobha joso ja Mamodi, a tunga mu mulundu munhá, a di phopho kumoxi, iá a tu kondoloka.

Josuué 10:9

Josuué-phe ua tukumuisa, kuma uende usuku uoso tunde bhu Jidingale.

I Samuuele 11:11

Ki kúkia-phe Saúlo u uanununa mundu mu ibuka itatu, anga a bhixila bhu kilômbo mu makolombolo, anga a beta akua Amone katé kiatu o muanha; o a subhuka-bhu anga a muangana katé kana-bhu dingi kiiadi kia tena kuendela kumoxi.

I Samuuele 25:18

Abingaile anga u bhanga lusolo, u kuata hâma jiiadi ja jimbolo, isudi iiadi ia vinhu, mbudi jitanu jótale kiá ia a ji kange, inda itanu ia masa ókange, hâma ia isaka ia jiuva, hâma jiiadi ja mitadi ia jifiku, anga u i longa ku jibûlu.

I Samuuele 25:22

Nzambi a ki bhange ku jinguma ja Davidi, a a tele-ku dingi, se ku dibhata dioso dia tokala Nabale katé ki kúkia ngi xá-ku né mona umoxi ngó uòfele ua diiala.

I Samuuele 25:26

Kiki-phe, ngana iami, nga loka mu dijina dia Jihova uala ku muenhu, nga lokela ue o muenhu ué eʼmuene moxi, kuma Jihova ua ku fudisa kubhubhisa manhinga, ua ku fudisa ue kuvutula phonzo ni lukualu lué eʼmuène. Kala kiki-phe o jingùma jé, ni athu oso a sota ku ku bhanga phulu, eie u ngana iami; a kà sokela ngó kumoxi kala kiala Nabale.

I Samuuele 25:39

O ki evu Davidi kuila Nabale uafu, u zuela uixi: Nga sakidila Jihova ua ngi fúndila mulonga ua dilebhu diami di nga tambuile kua Nabale, ua ngi fudisa kubhanga kiaiibha eme ngi mubhikʼê. O phulu ia bhangele Nabale, Jihova ua mu vutuila-iu mu mútue uêmuène. Davidi anga u tuma kuta maka kua Abingaíle, phala ku mu sakana, nʼa kale mukajiʼê.