I Samuuele 15:22 - O Mikanda Ikola

²² Samuuele-phe, uixi: Kifua ki uabhela kiavulu Jihova maujitu ma kuoha ni jisata, inga ki mu uabhela o kutumaka dízui dia Jihova? Mukonda, o kutumaka kota, kusatela ndenge, o kubelesela ue kota ki ku soko ni banha ia jimbudi.

I Samuuele 15:22 ပူးပေါင်းရင်းမြစ်များ

Dimatekenu 4:4

Abele ue u bheka ku anʼa jimbudi mu kilunga kiê oso a dianga ku a vuala, ni ku misuinhi ianete. Ngana anga u suua Abele ni ujitu uê,

Makatukilu 19:5

Kiki-phe, se mu tumaka muene dízui diami, se mu kuata o kikutu kiami, mu kala mu athu ami angene, mua di tungula ku miji ioso; kuma ioso mu ngongo eme muene ia ngi tokala.

Jisabhu 21:3

Kubatula o milonga mu kidi ni kufundisa athu sè katungu, kia beta ku uabhela Jihova, ku mu bhakuila jisata, ndenge.

Ndongixi 5:1

Kinama kié langa-kiu, kioso ki u bokona mʼonzo ia Nzambi; beta kuzukamena o kuívua, kana kubhana ujitu ua ioua, kuma ene kʼejiia kuila a mu bhanga kiaiibha.

Jelemiia 11:4

kikutu ki nga tendelela o jitata jenu mu kizuua ki nga a katula mʼoxi ia Ijitu, mu kidijiku kia felu; ngixi: Bhanenu mátui ku dízui diami, muende ni kubhanga kioso ki ngi mi tuma; enu-phe mua-nda ku ngi kala mu mundu uami, eme ue nga-nda ku mi kala ngi Nzambi ienu:

Jelemiia 11:7

Mbata nga lokele kinéne ku jitata jenu, mu kizuua ki nga a katuile mʼoxi ia Ijitu, katé mu kizuua kia lelu, nga kuata o ku di meneka ni ku loka, ngixi: Bhanenu matui ku dízui diami.

Jelemiia 26:13

Kindala-phe iukisenu njila jenu ni ibhangelu ienu, nda muivue dízui dia Jihova, Nzambi ienu, Jihova muene a diele ku phulu ia tange ku mi bhanga enu.

Hozeia 6:6

Kuma Eme nginda o kukuatela henda, ki ngindi sata; o kuijiia Nzambi ue kota, o kuoha ibhaku ia jisata, ndenge.

Hozeia 8:13

Mu kubhana jisata ja ilumbu a jibha ibhaku ia sata hé a i dia o xitu, maji Jihova muene ka i xikina; kuma Jihova u lembalala o mangonha mâ, o ituxi iâ ua bhela-iu kastiku; mukonda hádia a vutukila ku Ijitu.

Matesu 12:7

Enu se mua kʼijidile kioso ki kia jimbulula mu Mikanda Ikôla, kuila: Nginda o kukuatela mukuenu henda, ki ngindi sata, hinu ki mua tena kulongolola athu a kambe kikuma.

Matesu 23:23

Lamba dienu mu jimesene ja kulonga o Kitumu ni enu mu jifalizeu, mu akua mangonha! Kuma mu bhana kua Nzambi o dijimu katé ni dia olatelá, ni tu máfue dingi tua kutoua ni tua kominhu; maji ima-phe ia kidi, ia kate, ku Kitumu, o kufundisa mu kidi, o kukuatela henda, o kukumbidila, mu kamba ku i bhanga; hinu o iíi mua i bhange, o ioio ue ki i kambe.

Matesu 5:24

Ujitu ué xe-u bhu kalatódio, uie hanji u di luulule ni mukuenu, uize kiua u bhane o ujitu ué kua Nzambi.

Matesu 9:13

Ndenu-phe mu di longe kioso ki kia jimbulula, kuila: Nginda o ku kuatela mukuenu henda, ki ngindi sata; kuma eme ki ngeza mu kuixana athu aiuka, maji akua ituxi.

Marku 12:33

O ku mu zola ni muẋima uoso, ni kilunji kioso, ni nguzu ioso, ni kuzola mukuetu kala ki tua di zolo etuʼene, kotʼelele, o jisata joso ja ibhaku ia kuoha ni maujitu engi a kubhakuila Nzambi, ndenge.

I Samuuele 13:12

ngixi-phe: Akua Fidíxia a-ndu ngi lundumukina bhabha bhu Jidingale, eme-phe Jihova kiluua ngi mu uabhessa o pholo, kiene kia ngi bhangesa o ku di bidikalela kubhakula o sata ia kuoha.

I Samuuele 13:13

Samuuele anga u ambela Saúlo, uixi: Ua bhange uoua; ua kambe kubhaka o kijila kia Jihova Nzambi ié, kioso kia ku tumu; kuma Jihova hinu ueje kukolesa o utuminu ué mu Izalaiele ni u nangenena.