I Phetele 2:12 - O Mikanda Ikola

¹² Kalenu ni uendelu uenu uafuama, muʼaxaxi ka akua jixi jengi a kambe kuijiia Nzambi phala kioso kia a mi âmba, exi mua mu bhanga kiaiibha, mu kumona dingi o ikalakalu ienu iambote, hinu a kala mu ximana Nzambi, mu kizuua kiê kia ku a zungila.

I Phetele 2:12 ပူးပေါင်းရင်းမြစ်များ

Jisálamu 37:14

Akua phulu a fomona xibhata, oleka uta ua mufula, phala ku jikinisa o phulungu ni ngadiama, ni kujibha ió oso ala mu njila iaiuka.

Jisálamu 50:23

Uoso u ngi satela sata ia kusakidila, muene muthu ua ngi bhange ujitu; uoso ue u iukisa uendelu uê, muene ngi mu idikiza o ubhulukilu ua Nzambi.

Izaía 10:3

O kiki-phe enu mua-nda kubhanga kiebhi, mu kizuua ki nga-nda ku mi endela, anga kuiza o kibuika ki tunda makanga? Mua kà lengela kua nanhi mu sota o disuamenu? O kijingo kienu ue muanda kuá ki tula bhebhi?

Daniiele 6:4

Kienhiki ni mavunda ni ilamba akuata ku sota kithangana kia kukuata Daniiele ni kikuma ku utuminu uenhó, phala a mu kundûle; maji kikuma ni mulonga a ki tokoka; mbata muene uakexe fiiele, uendelu uê ki u moneka kisému, mba mulonga.

Matesu 10:25

Kienhiki, o xibulu kabasa i sokela ni mesene iê, o mubhika kabasa u sokela ni ngana iê. Kia lembela muène mukua dibhata diê, a mu ixana, exi: Belezebubu, akua mbèle iê, a kà exana kiebhi?

Matesu 5:11

Mua zediua enu, kia mi xinga, kia mi zukutisa, kia mi âmba ima iaibha iavulu ia makutu, mukonda diami eme.

Matesu 5:16

Kiene ue, o mukengeji uenu u muikine bhu pholo ia athu, ene a mone ima iambote i mu bhanga, ni a ximane Tata ienu uene mu diulu.

Matesu 9:8

O mundu-phe, kia ki mono, uôma u a kuata, anga a ximana Nzambi ua bhana athu o nguzu kala kiki.

Luka 1:68

Sakidilenu Ngana, Nzambi ia Izalaiele! Kuma mundu uê ua u zungila, ua u kula;

Luka 19:44

ji ku lundumuna, ni eie ni anʼé moxi dié. Bhenhabha kà kaxia-bhu ditadi ku thanduʼ a ditadi, mukonda eie ua kambele kuijiia o kithangana Nzambi kia ku zungidile, phala ku ku bhulula.

Luka 6:22

Mua zediua, athu se a mi zembe, a mi katula mu ukamba uâ, a mi lebhula, a mi texi dijina dienu kuma exi mu athu aiibha, mukonda dia Monʼa Muthu.

Nzuá 13:31

Kia tundu Juda, Jezú uixi: Kiki kiá o fuma ia Monʼ a Muthu ia-nda kutukuluka. O fuma ia Nzambi a-nda ku i muena momuê.

Jipoxolo 15:14

Ximá ua mi jimbuila kioso kia diangele Nzambi kuzungila matumbu, o mu kaxi kâ iú ua solo kukatula-mu o mundu uê uangene mu dijina diê.

Jipoxolo 24:13

O ima ia ngi tatela ue bhabha, ki i moneka mbangi ia kidi.

Jipoxolo 25:7

Muène kia zubha o kuiza, Jijudé ja tundu mu Jeluzaleme ji mu bhaka bhu ʼaxaxe ni ku mu tatela ima iavulu iaiibha, maji iene ioso-phe ki i moneka umbangi.

Jipoxolo 28:22

Maji tu endi-phe tu ku ivua kioso ki ua fika, mbata o kisoko kiki ki ua tokala, tua kʼ ijiia kuma kuene kuoso kia mu bonga malebhu.

Loma 12:17

Kana kuvutuila muthu uoso-uoso phulu mu phulu. Sotenu kubhanga jinga ima ia ujitu ku mesu ma athu oso.

Loma 13:13

Tuendienu kiafuama o kuzela kala ki bhanga oso ala mu mukengeji ua muanha. Kana kuenda mu masemba ni mauhôlua, kana mu maundumbu ni maufusa, kana mu jimvunda ni mafuba.

Loma 14:18

Kuma uoso u bhikila Kristu kala kiki, Nzambi u mu uabhela, o athu a mu ximana kuila mukua ujitu.

Loma 15:9

Phala ue ki bhangese akua jixi jengi, (ió ki Jijudé) kuximana Nzambi mukonda dia henda iê. Kala ki ambe mu Mikanda Ikôla, exi: Kiene kia kà ngi bhangesa ku ku tumbula mu ʼaxaxe ka akua jixi jengi, ió ki Jijudé, hé nga kʼ embila mu kuximana o dijina dié.

I Kolindo 14:25

O ikutu ia muẋima uê anga i tukuluka hé ki mu bhangesa kufidimika pholo bhoxi ni kubeza Nzambi, anga u zuela, uixi: Nzambi uala mudienu, ni kidi kiene.

II Kolindo 1:12

Kuma etu o thathe ietu ieniii, o kitongoluelu kietu kia tu bhela umbangi muʼaxaxi kenu, kuma tuende mu ngongʼumu mu kuzela ni kidi kia tu bhana Nzambi. Tuende ue, kana mu jindunge ja xitu maji mu kiadi kia Nzambi.

II Kolindo 13:7

Tua mu kinga-phe Nzambi phala enu ki mu bhange kima kiaiibha, ki mukonda etu tuandala a tu ximana, maji mukonda tua mi andala kuila enu mu bhanga ima ia ujitu. Né mbe etu tuedi kala tua sekala.

II Kolindo 8:21

Kuma o vondadi ietu, tua mesena kubhanga kima kiaiuka, kana ngó bhu pholo ia Ngana, maji ni bhu pholo ue ia akuetu.

Efezo 2:3

Ni kidi-phe, etu ene oso muene mu tua nhunganena jinga mu jihanji ja xitu, ni kubhanga o jivondadi ja xitu ni ja muẋima. Mu kieniiki o kikexilu kietu ki kala kia anʼ a njinda, mu kutambula o kaxtiku ka Nzambi, mukuâ ni athu ene oso.

Efezo 4:22

Bhu kaxiʼ abha ni kikexilu kienu kia bhiti, zulenu o muthu Uokulu, ua bolo, mù kaiela o jihanji ja kudinganala.

Filipe 1:27

Kala kiki, hé kima, o uendelu uenu u kale uendelu ua fuama mu Njimbu Iambote ia Kristu. O ki kala ngi mi sanga koko, mba ngi kamba ku mi sanga, kimuua ngʼivua jinga kioso ki muala kubhita na-kiu, kuma mua kolokota ni muẋima umoxi, muedi ni muenhu umoxi mua suinina kubhangela o kuxikana ku tunda ku Njimbu Iambote.

Filipe 4:8

Mu ku mi bhana-phe o mahezu, jiphange jami, ioso ima ia kidi, ioso ima ia ujitu, ioso o ima iaiuka, ioso o ima iazele, ioso ima iauabha, ioso o ima iene ku i tumbula, se sai-ku uthu, se sai-ku kia kuximana, iene ima i mu xinganeka.

I Tesalonika 4:12

Phala mu ende ni athu ku kanga kioso kia fuama; enʼuenu ue, ki mu bhindame ni kima.

I Timote 2:2

Kua tokala kubhingila jisobha, ni oso ala ni kijingo kia kutumina, phala tu tene kutunga ni muẋima ua batama, sè kavuanza, sè jimvunda, mu ujitu ni uendelu uaiuka.

I Timote 4:12

Kana kuehela kuila bhu kala muthu u ku tènda mukonda dia undenge. Oso-phe a xikana, eie-muène a bhane phangu, ni mu kuzuela, ni mu kudituma, ni mu henda, ni mu kuxikana ni mu kuzela.

I Timote 5:10

Muène kikale ue a mu tumbula o ikalakalu iê iambote iene mu kubhanga, se ua sase kiambote ana, se ua zalela jinga asonhi, se ua sukula jinga o inama ia akua Ngana, se ua bindumuna jinga jingadiama, mba o imbamba ioso iambote ua i bhanga jinga ni muanu.

Jihebeleu 13:18

Kolokotenu ni ku tu sambela. Kuma tua di fika kukala ni kitongoluelu kia zele, mbata tua mesena kubhanga mu kidi o ima ioso.

Jihebeleu 13:5

Ki mu kale mu akua luimbi lua kitadi, ioso i mua mono i mi soke. Kuma Nzambi u ambe uixi: Eme nuka nga kà mi xisa, ki nga kà mi ehelela ue, kana.

Tiiaku 3:13

Nanhi mudienu uejiia, uala njimu? Kiene-phe! Edikize o unjimu ni kuijiia mu muenhu uê uambote ni imbamba ioso ia bhanga mu kubelesela kua unjimu ni kuximbakata.

I Phetele 2:15

Kuma iene o vondadi ia Nzambi, kuila enu mu kubhanga kiambote mu belesa jisemenhi ji tanga o uoua.

I Phetele 3:16

Maji mu ki bhanga jinga ni kubelesela, ni uôma. Mu kale ni kitongoluelu kiazele kia mbote. Phala o ima iene ku mi tatelʼ oio, jisonhi hinu ja a kuate oso a lebhula o uendelu uenu ua mbote mua Kristu.

I Phetele 4:11

Uoso u zuela, a zuele kala kia fuama o maka ma Nzambi. O uoso u sedivila, a sedivile ku nguzu ia mu bhana Nzambi. Mu bhanga jinga kienhiki phala Nzambi a fumane mu ima ioso kua Jezú Kristu uavu o fuma ni unéne mu mivu ni mivu sé dizubhilu! Amén.

II Phetele 3:11

O ki tua monuʼ iki, kuma ima ioso iii ia kà buila, tua fuama etu tu kala tu athu a kidifua kiahi? Mu kuuabha uendelu, mienhu ienu ia fuama mu i bhakula mu kuzela, ni uôma ua Nzambi.

Lute 3:14

Muene anga u zeka bhu inama iê katé kuáki. O ki kuákie u balumuka-phe mu kafukufuku, kuila muthu ku tena luua ku mu mona kiambote.