I Kolindo 1:18 - O Mikanda Ikola

¹⁸ Kuma o maka ma kufua kua Kristu ku dikulusu, phala athu ala mu ku texika, kiedi kala uoua; maji phala etu-phe tuala mù bhuluka, ene o nguzu ia Nzambi.

I Kolindo 1:18 ပူးပေါင်းရင်းမြစ်များ

Jipoxolo 13:41

Talesenu, enu muene mu kutobhesa ioso, muanda kukakuka anga mu jikinina! Kuma o kikalakalu ki nga mu bhanga mu izuua ienu kikalakalu enu ki mu ki xikina, né-mbe hanji bhu kala muthu u mi ambela-kiu ue.

Jipoxolo 17:18

Anga ku kala jindongixi ja akua kisoko kia Epikulu, ni kia Jistoiku, a takana-nê. Amoxi exi: Muenʼiú ua kambe o kuijiia, uala kusabhula kiebhi? Amukuâ exi: Uedi kala uala ku tu tangela mahamba a jixi jengi. Ene a kexi mu zuela kiokio mukonda Phaulu ua tumbula Jezú ni difukunukinu.

Jipoxolo 17:32

O kia mu ivu kutanga o madifundu kufukunuka, amoxi-mu olela; amukuâ exi: Hundu ioio tu andala hinu tu ivua dingi thembu iengi.

Jipoxolo 2:47

Mu ioso a kala mu ximana Nzambi, o mundu uene uoso u a tumbula. Ngana anga u kala mù bandekeza izuua ioso e kibuka kia ió oso ala kuenda ni kubhuluka.

Loma 1:16

Mbata eme nga dielela kiavulu o Njimbu Iambote; kuma iene o nguzu ia Nzambi i bhulukisa oso a xikana; ku dianga o Judé, hé ku kaiela ió oso ki Jijudé.

I Kolindo 1:21

Kuma o Nzambi, mu unjimu uê, ua bhangesa kuila athu a lémbua ku mu ijiia Muène, mu kuijiia kua ene, maji kia mu uabhela kubhulula oso a xikana. O kienhiki, Nzambi ua ki bhangela mu uoua ua maka mê u tuala kutula.

I Kolindo 15:2

O njimbu i nga mi tudila enu, iene o Njimbu Iambote. O mu Njimbu Iambote ienʼ iii muene mu mu bhulukila, se mua i naminina ni lujiji. Mba-phe mu ku i xikana kia mi-iê ngó, se o kuxikana kuenu kua ngoho ku muala na-ku.

I Kolindo 2:14

Kuma o muthu kia kala ngó mukutu ua xitu, ua kambe o Nzumbi ia Nzambi, ka tena kutambulula ima ia Nzumbi ia Nzambi, u tokoka ku i tongolola. Mbata phala muène i mu kala uoua, ka tena ku ijiia, mukonda ima i bhinga a i tongolola mu nzumbi.

I Kolindo 2:2

Kuma kioso ki nga kexile kumoxi ni enu, ki ngi solele dingi kuijiia kima kiengi mudienu, kikale ngó Jezú Kristu, kota-kota dingi o kufua kuê kua fuile ku dikulusu.

I Kolindo 3:19

Kuma o unjimu ua mundu iú, kua Nzambi uene o uoua. Kiene kia ki soneka mu Mikanda Ikôla, exi: Jinjimu, Nzambi u ji kuatela mu kudimuka kuâ.

I Kolindo 4:10

Etu tuala tu ioua, mukonda dia Kristu, enu-phe mua Kristu mu jinjimu! Etu tua bhuila, enu mua suina; etu tu tambula malebhu, enu mu tambula o fuma.

II Kolindo 10:4

O mata metu ma ita ki ma tokala mu ngongʼumu, maji mata ma nguzu ni kutena kua Nzambi ma tena kubula o imbaka. Tu lundumuna ikutu ia makutu,

II Kolindo 4:3

Mukonda o ki kala Njimbu Iambote i tua mu kola ia futama uandanda, ia futama ngoho phala ió oso ala mù texika.

I Tesalonika 1:5

Kuma o Njimbu Iambote ki tu mi tudila-iu mu kuzuela ngó, maji ni nguzu, ni Nzumbi Ikôla, ni kujimbuluka kuila ia kidi. Enʼuenu mua kʼijiia, se tua kexile tu athu ahi mu ʼaxaxe kenu, mukonda dia mbote ienu-enu.

II Tesalonika 2:10

Muène ua kà bhanga mangonha moso, phala kuxômba athu oso anda kutexika. Ene-phe anda kutexika, mukonda nguâ kutambulula o muẋima ua kubhindamena o kidi, ki tena ku a bhulula.

Jihebeleu 12:2

Tu jizienu ni kusuua ngó Jezú, kuma muène o musonguedi ua kuxikana kuetu, tundé bhu dimatekenu katé bhu dizubhilu. Kala muène mu kusuua o ngalasa ia mu idikiza, ua kolokota ni dikulusu, ua tende o sonhi, o kiki ua xikama ku madilu bhu kiandu kia Nzambi.

Jihebeleu 4:12

Kuma o kizuelu kia Nzambi kima kia muenhu, ki ala ni kutena. Kia beta kutua o xibhata ia mazu a iadi ndenge. O kubatula kuê, ki sesa ni muenhu, ni nzumbi, ni masokuelu, ni uongo ua ifuba. Ki tungula ni jivondadi, ni mabanzelu ma miẋima ia athu.