Izaía 50:1 - O Mikanda Ikola

¹ Jihova ua zuela kiki, uixi: Lubongo lua kusenga na-iu mamʼenu luala kuebhi, lu nga mu senga na-iu? mba mukuahi nga mu dia dikongo, o ki nga lémbua ku mu futa, eme nga mi sumbisa-ku? Talesa, ikuma ienu iene ia mi sumbisa, o itondalu ienu iene ia sengesa mamʼenu.

Izaía 50:1 ပူးပေါင်းရင်းမြစ်များ

I Jisobha 21:25

Kana-ku-phe muthu ua sokela ni Akabe, mu ku di sumbisa mu kubhanga kiaiibha ku mesu ma Ngana kala muene, mukonda dia mukajʼê Jezabele, ua kexile ku mu funhisa jinga kubhanga kiaiibha.

II Jisobha 17:17

Katé ni anʼâ a mala ni anʼâ ahatu a oha jinga mu túbhia mu ku satela o mahamba; a dibhakula mu kuzambula, a beta ku xikana o imbanda; a di-sumbisa mu kubhanga ima ia ibha ku mesu ma Jihova mbé o ku mu lokalala o njinda iê.

II Jisobha 4:1

Anga muhatu umoxi, ku ahetu a anʼa jipolofeta, u dikola kua Ilizeu, uixi: Muadi uami, mubhikʼé, ngana, uafu. Eie-phe ua kʼijiia kuila o mubhikʼé ua kexile mukua uoma ua Nzambi; o kiki-phe mukua dikongo ueza mu ku ngʼambata o anʼami kiiadi a mala, phala kukala abhikʼê.

Nehemiia 5:5

Suke-phe, atuenhoso tu akua xitu imoxi, kuma etu ni akua muiji ua Juda, tu jiphange; o anʼetu úe a sokuʼâ ngó ni anʼâ ene; talesa, o kiki anʼ etu a mala ni anʼetu a ahatu tu a bhakula mu ku kala abhika; tua suku mu kuila amoxi mu anʼetu a ahatu ejidila kiá ni ubhika, o kia ku akula na-kiu, bhu makuʼetu, tua ki lémbua; mukonda athu amukuá a tambula kiá o jixi jetu ni mivide ietu, iii iala kiá bhu maku ma athu engi.

Estere 7:4

Kuma a tu sumbisa, ni eme ni muiji uami, phala ku tu seia, ni ku tu jibha, ku tu buidisa, mbé tu jime o mbutu kulu dia mundu. Se edile a tu sumbisa ngó mu kala tu abhika, hinu kimuua, ngeje kudixibhʼami; sumbala nguma ietu ua tu kanena keju tena ku ki futa kua sobha, kuma Sobha ueje ku dibotesa kinéne.

Jisálamu 44:12

Mundu ué, Ngana, ua a sumbisa mu kingoho, eie-muène kua nganhala-ku kima mu ku a ta uenji.

Makatukilu 21:7

Hé bhu kala diiala u sumbisa monʼê ua muhatu mu kala mubhika, ió-phe ka tunde dingi kala ki tunda abhika a mala.

Izaía 1:28

Maji atondadi, ni akua-ituxi-phe, a kà a buikisa kumoxi; ni ió oso a xisa Jihova, a kà jima mbutu.

Izaía 27:8

Kana bá! Inda eie, mu kuzoka-nê, ua mu fikixila; kioso ki ua mu ẋimbuka, ua mu sondolola ni kitembu kiasuina, kia bhixila o kitembu kia thunda.

Izaía 43:27

Tatʼenu ua diangele-ku uate kutuxi, o alombolodiʼê a ngi tondalela.

Izaía 46:8

Kienhiki xinganekenu-kiu kiambote, mu sunge kilunji, lundenu-kiu ku muẋima, enu mu atondadi.

Izaía 52:3

Mukonda Jihova Nzambi, uambe kiki: A mi sumbisa mu kingoho; a kà mi kula ue, sè kitadi.

Izaía 54:6

Mbata Jihova ua ku ixana kala muhatu a mu ambudisa, iu uene ni kikote ku muẋima; kala muhatu a tundu-nê undenge; ia a mu ehelela, kiene kia zuela Nzambi ié.

Izaía 54:7

Nga ku ehelela kathangana kòfele; maji nga-nda ku kuongeka ni jihenda ja nzungule;

Izaía 58:1

Dikole ni dízui dia suina, ku dixibhe, zangumuna dízui dié kala koloneta, uidikize athu ami o kikuma kiâ, o dibhata dia Jakobo ue idika-diu o ituxi iâ.

Izaía 64:6

Kuma etu-oso tuedi kala kima kia sotama, mauiukilu metu moso medi kala dikoza diala mu nuha kibuzu; etu-oso tu lalumuka muene kala mafe ma kukuta, o ikuma ietu iala ku tu kungulula kala kitembu kia tu ambatesa.

Jelemiia 3:1

Ala kuila zuele-zuele, exi: se bhu kala diiala di senga mukajiʼé, muene anga uia kuengi hé u sakana ni diiala diengi, kifua u mu vutukila dingi? Oxi ioso ioio ki ia-nda ku tambula lufuku? Eie-phe ua di kasanesa ni jisaii ja nzungule; né-mbe-phe kiene, vutukila dingi kokuami, Jihova ua ki tange.

Jelemiia 3:8

Kioso-phe ki ngedi suí, mukonda dia ima ioso iii, Izalaiele dia kuẋinuka nga mu senge, kuma ua te jiphanda, eme nga mu bhana lubongo luê lua ku mu senga, maji ki lua kuatesa uoma kua phangiʼé ia muhatu na Juda, o phèke-phèke ioio; maji muene ue uaii, iú ua di te-mu ue ni kubhanga undumbu.

Jelemiia 4:18

O uendelu ué ni ikalakalu ié iene ia ku seiela ima ienhiʼii: o kiki kiene o kikuma kié, o kulula kue kuavulu ku ku bhixila katé ku muẋima.

Hozeia 4:5

Mukonda dia kiki, eie u nganga ua-nda kudibhala mu muanha uatu, o polofeta ua kà dibhala kumoxi ni eie mʼusuku; o mamʼenu ngi mu buikisa ue.

Ijila 25:39

Se u mona kuila phangʼiê uatungu-nê bhuamoxi uabiluka ngadiama ia ngadiádia, anga muene uiza mʼudiumba kokué, uixi ngi sumbeʼami, eie-phe kana kumu bhikisa ni kikalakalu ki bhanga o mubhika.

Matesu 18:25

Kuma kia kufuta ka ki mono, ngana iê u tuma ku mu sumbisa, ni muhatuʼê, ni anʼê, ni ima ioso iala na-iu, phala dikongo ku di futisa.

Matendelelu 32:30

Se ʼTadi diâ ua kambele ku sumbisa o nguma jâ kua ene, mbé eje kutena kuila muthu umoxi ulandemeka midi, kiiadi a kaia kuinhi dia midi? Ki Jihova muene ua a bhakula?