Izaía 47:10 - O Mikanda Ikola

¹⁰ Kuma uadielela o phulu ié, uixi: Ki bhuala u tena ku ngi mona; o unjimu ué ni ndunge jé ji ua di-longo, jene ja ku bhekela kujimbila, eie uambe ku muẋima ué, uixi: Eme-muène ngó, kana-ku muthu ni mukuetu nga soko-nê.

Izaía 47:10 ပူးပေါင်းရင်းမြစ်များ

Jisálamu 10:11

Anga u tanga ku muẋima uê, uixi: Nzambi iú kuebhi-ze? Muene ua jimbi-ku kiá, ua di futu o pholo iê, ka-nda ku ki mona.

Jisálamu 52:7

Diene-ze o diiala dia ditunu Nzambiʼidi, mù kala kimbaka kiê; iu ua di fiiala o jimbongo jê kuvula, hé u di fikidila mu usuéia uê.

Jisálamu 64:5

A di suinisa mudiâ, mu bhanga ndunge jaiibha; a ta maka ma kuta míkala mu fua akuá; a fika ki kuala muthu ua a mono, kuma ela muene, exi: Nanhi u tu mona?

Ndongixi 8:8

Kana-ku muthu u tena ku tumina o muenhu uê kuila u kole, anga u tena muene ku u kondeka; mba bhu kala muthu u tumina o kizuua kiê kia kúfua; o mvunda ia kalunga ki iala ni mata a kubhânga na-u; o kisuéia ue u bhanga phulu, phulu iê ki i tena ku mu bhulula.

Izaía 28:15

Enu, kuma muambe, muixi: Kalungʼangombe tua bangana-nê, o inferno tuate na-iu kikutu kia ukamba; kioso kia-nda kuiza divuua dia kibeto kala mvula ia dilúvio, etu ki kia-nda ku tu bhixila, kana; kuma dilengelu dietu o makutu, disuamenu dietu o kudinga o kidi.

Izaía 29:15

Lamba dia ió oso a sota kusueka ima iâ ku mesu ma Jihova, nʼende ni kubhangela ima iâ mu kitombe, exi: Mukuahi u tu mona? Mukuahi u tu ijiia?

Izaía 44:20

Lémbue: ukuata ku di-dikila ni uthôkua; muẋima uê ua juuala uene ua mu luezesa; bhua telʼobho ka tena dingi kubhulula o muenhu uê, mba kuila: Mbé bhu lukuaku luami lua kúdia ki bhuala makutu?

Izaía 47:8

Kiki-phe, ivua-kiu, eie ua kodiua ni ima ia uabha, ua tunga ua soma, eie uene mu kuila mu muẋima ué, uixi: Eme-muène ngó, kana-ku ua soko ni eme; ki nga-nda ku kala ngi mutudi, ki nga-nda kuijiia ue dilamba dia kufunda ana.

Izaía 5:21

Lamba dia ió oso a di mona kuijiia ku mesu mâ ene, a di fika kudimuka ku mesu mâ-ene muene.

Izaía 59:4

Ki bhuala muthu u dikola mu ku sota kulûnga, kana-bhu ue muthu u tukuluka mu kufunda phala kusota o kidi, a di-fiiala kingoho, o kuzuela kuâ o makutu; emita milonga, avuala ikuma.

Jelemiia 23:24

Jihova uixi: Saiku muthu u suama muene mu masuamenu, eme hé ngi lémbua ku mu mona? Manhi eme ki ngiʼzala mu diulu ni mu ngongo? Jihova ua ki tange.

Jelemiia 9:23

Jihova uambe kiki: njimu ka di thathe mu unjimu uê, mba dizonda u di thatha mu uzonda uê; mvuama ka di thathe mu unvuama uê.

Izekiiele 8:12

Kieneʼokio anga u ngʼambela, uixi: Eie monʼa muthu, ua mono adiakime, o ikulakaji ia dibhata dia Izalaiele, kia muia ni kubhangela mua vundu, muthu ni muthu mu xilu diê muʼòsete ni iteka? Mbata ene amba, exi: Ngana ka tu mono. O Ngana muene ue ixi ua i ehelela!

Izekiiele 9:9

Muene-phe uixi: O kuiibha kua dibhata dia Izalaiele ni dibhata dia Juda kua vulu kinene, o ixi i iezala manhinga, o mbonge iezala mangonha; ene amba, exi: O Ngana ixi ua i ambula. Kiene Ngana kia mu kambela kumona.

Daniiele 4:27

Kala kiki, sobha, tata, xikina kaiula kamiʼaka, sota kubhanga kia iuka, u di bhuise ituxi, bhanga henda ku jingadiama, u di bhuise o phulu, kifua o kiki nga ki ambe sumba hanji kua ku xiala thembu ia ku di-bhola hanji ku mátui.

Sofoniia 2:15

Iii-phe iene o mbanza, o mbonge iadijimbi iala kutumbujuka ni ngalasa, ni ku di dielela iene, hé uia ni kuzuela mu muẋima uê, uixi: Eme ngó kuabhu, ki bhuala dingi nga soko-nê! Kiki-phe ueza ngúndu, ua biluka dinangu dia iama! Muthu uoso ubhita-mu, u diuuana! Uxika muphióphio, hé u bhabha ibhubhu!

Loma 1:22

Ene a di tange exi tu jinjimu, maji a biluka ioua.

I Kolindo 3:19

Kuma o unjimu ua mundu iú, kua Nzambi uene o uoua. Kiene kia ki soneka mu Mikanda Ikôla, exi: Jinjimu, Nzambi u ji kuatela mu kudimuka kuâ.