Izaía 14:1 - O Mikanda Ikola

¹ Mbata Jihova ua kà kuatela Jakobo henda, u tona dingi kusola Izalaiele anga u a bheka mʼoxi iâ; jinzuángiza ue ja kà di bunda kumoxi ni ene, anga a kà di banda mu diembu dia Jakobo.

Izaía 14:1 ပူးပေါင်းရင်းမြစ်များ

Estere 8:17

Ku jisengu joso ue ni ku jimbonge joso, kuoso kua tula o kizuelu kia muenexi ni ngonge iê ia xikisa, jijudé ji kala mu sanguluka ni ngalasa iavulu, a bhanga fesa, exi lelu kizuua kiambote. Ku kala ue athu avulu mu jixi, a di bhanga kiá jijudé, mukoda jijudé a ji kuata kiá uoma uavulu.

Jisálamu 102:13

Sai bhuoso hinu bhu u balumukina, mù kuata henda ia Ziione; kuma thembu ieza-bhu ia ku mu xinganeka, ua bhixila kiá bhu thembu i ua mu xindi.

Jisálamu 102:14

Mukonda, etu tu selevende jé, ni matadi mé ma tu kate, ni mavu mé henda ia tu kuata.

Jisálamu 143:12

O mu kulenduka kué, enhó, o jinguma jami, a vuze muene nda a jime mbutu; buikisa, Ngana, oso a mu bhondeleka o muenhu uami, kuma eme ngi selevende ié.

Jisálamu 98:3

Ua xinganeka o henda iê ni kidi kiê, mu kutambula konda ia dibhata dia Izalaiele; katé ku maẋokololo a jixi, uzonda ua Nzambi ietu a u mono.

Izaía 19:18

Mu thembu muná kua kà kala mbonge jitanu mʼoxi ia Ijitu, a kà zuela dimi dia Kanana; a kà ta hasa kua Jihova dia Ilombo Ieta; mbonge imoxi a kà ixana: Buidila-mundu.

Izaía 21:1

Muzambu ua tokala kiphenza kia kizanga kia kalunga. Kala o ibhungu ia kitembu kia sulu ki kungulula ioso, kiene ue kia kà tunda muene ku kikangalakata, ku mukáu u kuatesa uoma.

Izaía 27:6

Bhua kèza izuua ia kuila Jakobo u ta jindanji, o Izalaiele ua kà sabhuluka u fuafua anga u bhana itulu ni ibundu; enhá anga a kèzalesa oxi ioso ni ibundu, kulu dia mundu.

Izaía 41:8

Maji eie-phe, Izalaiele, u selevende iami, eie, u Jakobo, u muthu nga ku tungula, u mbutu ia Mbalahamu dia kamba diami,

Izaía 41:9

eie u muthu nga ku katula ku maẋokololo maʼxi, eme nga ku ixana bhuʼaxaxi ka ió a ku tundu, bhu ua kexile, ngexi-phe: Eʼmuene u selevende iami, eme nga ku sola muene, ki ngi ku ambudisa, kana.

Izaía 44:1

Maji-phe ívua koko, Jakobo tata, selevende iami, nʼeie Izalaiele, u muthu nga ku sola.

Izaía 45:14

Jihova uambe kiki: Ni midimu ia Ijitu, ni mauenji ma Itiiópia, ni jisabeu, o mala alebha kitala, a kà bhita ku konda ié, a kale é-eie; a kʼendela kuema dié, a kèjiia bhu jingidinhá, a kà ku diundila; a kà ku dionda muene, ni kuila: Kidi kiene, Nzambi uala momué, kana-ku dingi nzambi iengi.

Izaía 47:1

Tuluka, xikama mu fufuta eie u muzeletete, mona-kilumba ua Babilonha; xikama bhoxi; kana-bhu dingi kiandu, mona-kilumba mu Kaldeia, kuma ki bhu kala dingi ku ku ixana muzeletete, mba mona bhu kinéne.

Izaía 49:10

Ka kala dingi ni nzala, kà kala dingi ni dinhota, né muzukuta né muanha ki ua kà a kuama dingi; kuma muenhó mukua ku a lendukila, ua kà endesa, anga ua kà a batesa kilendu katé ku jifiẋi ja menha.

Izaía 49:13

Imbenu, mu maúlu, eie ue u ixi, sanguluka; enu mu milundu tenu nzôngo ia kutana, kuma Jihova lelu ua tululula o povo iê, jihukunhu jê ua ji lendukila.

Izaía 49:15

Manhi muhatu u tena kujimba monʼê ua mu vuala, katé kia suka muene bhu kuehelela, mona ua tundu mu mala diê? Né-mbe bhu kala mama u landuka monʼê, eme-phe kana, kuma eie ki nga kà ku jimba, lémbue!

Izaía 49:25

Maji, Jihova uambe kiki: Kidi kiene, ió a a kutu, a-nda kutunda muene bhu maku ma dizonda, o mbole ia kuata o kisuéia, ia-nda kubhulaka muene; mbata nga-nda kuzoka ni ió oso a zoka nʼeie, o anʼé nga-nda ku a kula.

Izaía 49:7

Jihova, Mubhuludi ua Izalaiele, Dilemba diê Ukôla, uambela muthu uoso a mu buangidika, a mu zemba kuala o mundu, o mubhika ua atumini, uixi: Muenhó a-nda ku mu balumukina bhu iandu kuala o jisobha, kia mu mona, ni ilamba uê, anga a kà diunda bhu pholo iê, mukonda dia henda ia Jihova, mukua kitongola, Dilemba Dikola dia Izalaiele, muthu ua ku tungula (ua ku sola).

Izaía 54:3

Mbata eie ua-nda kusokoloka ni ku kadilu ni ku kiasu; mbutu ié ia-nda kúvua akua-jixi, ilombo ia kexe jingùndu ene a-nda ku i tunga dingi.

Izaía 55:7

mukua-ituxi ehe o njila iê, o ua iibha muẋima a tule mabanzelu mê; a vutuke kua Ngana, u mu kuatela henda; nʼalukile kua Nzambi ietu, kuma muene mukua kuloloka kiavulu.

Izaía 56:3

Uoso monʼa nzuángiza, u di banda kua Jihova, ka ki tange kuamba: Jihova ua ngi batula muene ku povo iê; ki bhu kale ue ngolambole u kiamba kuila: Eme bhabha ngi muxi ua kukuta.

Izaía 60:10

O anʼa jithungiembu ene a kà ku tungila o imbaka ié, o jisobha jâ ja ka ku bhikila; mbata nga ku betele kia ngi kuata o kutema, maji mu kulenduka kuami nga ku kuatela jihenda.

Izaía 60:14

Ni ana a ió oso a ku huhile eie, a kèza ni kudiunda kokué; oso a kexe ku ku lebhula a kà ku fukamena bhu inama ié; ene anga a kà kuixana exi: Diembu dia Jihova, Ziione dia Lemba Dikola dia Izalaiele.

Izaía 66:20

Anga ene a kèza ni jiphange jenu, jene mu kaẋi ka ifuẋi ioso, mu ku a bhakuila Jihova; o iâ ejiia ku jikabalu, o iá mu makalu, ni mu maxila, ni ku jimula, ni ku jikamelu, anga eza kienhiki ku mulundu uami ukôla, ku Jeluzaleme, eme ngi Jihova; mukuâ ni kiene kuiza anʼa Izalaiele kubhakula maujitu mâ mu dibhata dia Jihova, a ʼambatela mu itutu iazele.

Jelemiia 16:15

Maji ela: Jihova u kola! ua tombola ana a Izalaiele koxi ia kusuku ni ku jixi joso ku a a takuile; mbata eme nga-nda ku a vutula ku ixi iâ i nga bhele ku jitata jâ.

Jelemiia 29:14

Enu-phe mua-nda kuà ngi bonga muene, Jihova ua ki tange, nga kà bhangesa kuila jihutile jenu ja kà vutuka, anga ngi mi bhongolola mu miji ioso ni mu ididi ioso mu nga mi takuile, eme ngi Jihova, anga ngi tona dingi ku mi bheka bhu kididi kioso bhu nga mi katuile mu ku mi bheka ku jixi jengi.

Jelemiia 30:8

Kuma, Jihova dia Ifuẋi, uixi: Mu kizuua kienhokio, kiene ki nga-nda kua ká bukula o jungu ia ku kala ku thanduʼa xingu ié, ophi ié nga-nda kua kà i bukula; ki mungu dingi akuaʼxi iengi a kà bhanga abhika o kifuxi kiki,

Jelemiia 31:4

Hanji nga-nda ku ku tunga dingi, ua kà kala ua tungiua, eie u muzeletete ua Izalaiele! Hanji ua-nda ku kemba ni isaka ié, ua kà tunda kumoxi ni iá a mu kuimba ni kukina.

Jelemiia 50:33

Jihova dia Ifuẋi uambe kiki: Anʼa Izalaiele ni anʼa Juda a a talesa o hadi kumoxi; o ió oso ambata anʼa Izalaiele ku ubhika, a a bhake muene, nguâ kua eha.

Jelemiia 51:51

Mua kà kiʼamba, kuila: Sonhi ja tu kuata muene mukonda tua sebuluka; pholo ia tuʼizala jisonhi, mbata kueza akua jixi jengi mu mabhezelu a kola a inzu ia Jihova.

Izekiiele 16:60

Maji-phe né kienhókio, eme o kikutu kiami ki nga-ta ni eie mu izuua ia unzangala ué, hanji nga-nda kua kà ki banza muene, hé nga kà ta dingi ni eie kikutu ki nangenena.

Izekiiele 47:22

Kia kà kala-phe kuila, mu ku i lundula, mu i tela muondona, phala ene ni athu engi a mu nhunganena muʼaxaxe kenu, hé a vualela ana mu kaxi kene; ene ue a kà mi kala kala athu òvuale ku anʼa Izalaiele; a kà bokuena kumoxi ni enu mu undundu, muʼaxaxe ka miji ia Izalaiele.

Zakadiia 1:17

Tá dingi nzôngo lua mukuá, uixi: Jihova dia Ilombo Ieta uambe kiki: O jimbonge jami hanji ja-nda kua kà di bandekeza, ja-nda kua kà zediua muene; kuma Jihova hanji a-nda kua kà konda dilamba kua Ziione, hanji a-nda kua kà sola Jeluzaleme.

Malakiia 1:11

Kuma tunde bhu tundila dikumbi katé bhu di fuila, o Dijina diami dia kà kala kima kionéne ku miji ioso. Mu ididi ioso Dijina diami a kà di ohela uasu ua dizumba ni ku di bhela jisata ni maujitu mazele kiambote. Mukonda Dijina diami dionéne mu miji ioso. Kiene kia tange Jihova dia Ifuẋi.

Luka 1:54

Ua kuatekesa Izalaiele dia mubhikʼê, Iú ua banze o henda iê, kala ki ambelele o jitata jetu.

Luka 2:32

mukengeji u londekesa o njila ia Nzambi ku akua matumbu. Ni kubhana fuma ia mundu ué ua Izalaiele.