Izaía 12:5 - O Mikanda Ikola

⁵ Imbilenu Jihova, mbata ima ia bhange, ia matunda! Oxi ioso i tume ku kʼijiia.

Izaía 12:5 ပူးပေါင်းရင်းမြစ်များ

Jisálamu 105:2

Mu imbidienu, imbenu ni ku mu ximana; tenu maka ma imbamba iê ia madiuanu.

Jisálamu 72:19

A ximane dijina diê dikola, katé ku hádia ni hádia! o mu ngongo ioso mu izale ni kubenha kuê! Amén! ni Amén!

Jisálamu 98:1

Imbilenu Jihova muimbu uobhe; kuma Muene ua bhange madiuanu; lukuaku luê lukôla, luene lua lende o jinguma.

Makatukilu 15:1

Kizuuʼokio Mozé ni anʼa Izalaiele emba muimbu iú, mu kuximana Jihova, exi: Ngʼimbila Jihova, kuma Muene ua di jingisa kinéne; ni kabalu ni iú ua sambela-ku ua a texe mu menha.

Makatukilu 15:21

Midiiana anga u tambuijila, uixi: Imbidienu Jihova o kikóue kia undanda; kuma ni kabalu ni iú ua sambela-ku, ua a texi mu menha.

Izaía 24:14

Iá a-nda kuzangula dízui diâ, anga emba ni ngalasa; a-nda kuta nzôngo, tunde ku musanza, mukonda dia fuma ia Jihova.

Izaía 40:9

Eie, tata u muboke-a-njimbu iambote kua Ziione, banda-phe, ku mulundu ua di leka. Eie, tata, u muboke-a-njimbu iambote kua Jeluzaleme zangumuna dízui dié ni nguzu ioso; zangula-diu muene, ku kale ni uoma, u tangele o madiembu ma Juda, uixi: Talesenu, Nzambi ienu iú bhabhʼú!

Izaía 42:10

Imbilenu Jihova mukumbi uobhe, o diximanu diê diende muene ni ku tokomoka tundé kua suku oxi; teketenu enu ue mua mu kuendela ku thanduʼa kalunga mu jinaviiu ni ima ioso iene-mu, nʼenu ue mu ikolo ni oso a tunga-mu.

Izaía 42:11

Iphenza ioso ni madiembu mê Zangulenu dízui, ni tusanzala tuoso tua Kedale; oso a tunga ku matadi ele muene bulukutu ni ngalasa; nzôngo iâ a i tele muene ku thala-a-milundu.

Izaía 44:23

Enu, maúlu, imbenu ni ngalasa, mbata Jihova muene ua bhange kiki; tanenu-ku, enu mu ididi ia boloka, enu mu milundu te-nu nzongo ia kusanguluka; nʼenu ue mu mixitu, ni mixi ioso iene-mu; mbata Jihova ua kula Jakobo iú ua tambula fuma mu Izalaiele.

Habakuke 2:14

Mukonda o ixi ia kʼèzala ni kuijiia kua fuma ia Nzambi, mukuâ ni menha ki ezalesa o musanza ua kalunga.

Malakiia 1:11

Kuma tunde bhu tundila dikumbi katé bhu di fuila, o Dijina diami dia kà kala kima kionéne ku miji ioso. Mu ididi ioso Dijina diami a kà di ohela uasu ua dizumba ni ku di bhela jisata ni maujitu mazele kiambote. Mukonda Dijina diami dionéne mu miji ioso. Kiene kia tange Jihova dia Ifuẋi.

Dijingunuinu 15:3

Anga emba o muimbu ua Mozé, ngunza iangene ia Nzambi, ni muimbu ua Kambudi, exi: Eie Ngana Nzambi, Muteni-a-Ioso, o ikalakalu ié kukula kuahi, ikalakalu idiuanesa kinéne! Eie, Ngana, u Sobha ia miji ioso, o ixinganeku ié kuiuka kuahi, ima ioso i u sola kubhanga, ia kidi!