Ijila 26:4 - O Mikanda Ikola

⁴ eme-phe ue ngenda ni ku mi bhana mvula ienu bhu thembu iê ia tokala; o ixi ienda ni kutubhula muene ima ia ubhe, o ku mikáu miẋi ia kuphapha ue ilukula muene ibundu.

Ijila 26:4 ပူးပေါင်းရင်းမြစ်များ

I Jisobha 17:1

Bhenhobho Elija, mukua lumono mu akua Ngiliiade, uambela Akabe, uixi; Ngana kuene kuala, Nzambi ia Izalaiele, uavu o pholo iê bhu ngala, kuma mivu iii ki kua-ndu suka mbundu mba kunoka mvula, kale kʼeme nga ki zuela.

Jobe 5:10

Muene u nokesa o mvula mu ngongo anga u tumikisa o menha mu mikáu.

Jisálamu 104:13

Ku jinzo jê ja thandu, kuene ku sonoka menha ku milundu; phala mu ngongo muizale ibundu ia tundu mu kukalakala kué.

Jisálamu 67:6

Phala o mavu ende ni kubhana dingi o idima iê; o Nzambi, Nzambi ietu muene, a tu bhane o kuzediua.

Jisálamu 67:7

Xi, Nzambi u tu bhana muene dibesá; mbé ene oso, katé ku maẋokololo, a mu kale ni uoma.

Jisálamu 68:9

Eie, Ngana, Nzambi, ua nokesa mvula iavulu, ua nhohesa o undundu ué ua kexe kiá ni kubhuila.

Jisálamu 85:12

Euá, Jihova u tu bhana dingi o mbote ioso iafuama; o mavu metu ende ni kubhana dingi o idima iê.

Jisálamu 85:13

O kubatula mu kidi kuenda ni ku mu tuamena ku pholo, o mu hoka ia manhanhu mê, muene mu kala njila ietu i kuendela.

Izaía 30:23

Kienhokio-phe Jihova ua-nda ku ku bhana o mvula ku mbutu ié i u kuna bhoxi, u ku bhana ue mbolo, o phèmbele jaʼxi; mavu iá a-nda kuima muene kiasoko; mu kizuuʼokio ibhaku ié ia kà dila jinga mu mâkela madixala.

Izaía 5:6

Ngi di bilula kikangalakata; ki bhua-nda kukala dingi ku di sola jithangu; ku di tela ue mavu bhu ixina, kana dingi; inda mu sabhuke kiá isasa ni misonge ia minha; ngʼa mbela ue matuta, phala ka noke dingi mvula ku thandu diê.

Jelemiia 14:22

Manhi ku ima ia kingoho ia jijila o matumbu, kuala ki tena kunokesa o mvula? inga maúlu ma tena ku di bhela mvula? Kʼeie muene ngó, u Jihova, Nzambi ietu? Kala kiki tua kinga kokué, mbata eie uene ku bhanga ima iosuʼiii.

Izekiiele 36:30

O ibundu ia miẋi ue nga kà i sokolola, ni idima i tunda mu mábhia ku mikáu, phala ki mungu dingi mu bonga malebhu a nzala muʼaxaxe ka akua jixi.

Jouele 2:22

Enu ue mu iama ia mukáu ki mu kale ni uoma, kuma sabhelela mu ixi ia kisekele ia-nda kubuingita dingi, mbata miẋi ia kà bhana dingi ibundu iê, ni muvide ni mufiku ia kà bhakula muene kia nzungule.

Ijila 25:19

Ni oxi iene ue ia-nda kubhana o ibundu iê, mua-nda kudia jinga anga muikuta, anga mu di hola muene ku mátui mu tunga mu soma.

Ijila 25:21

Kuabhu-phe Eme nga-nda ku mi tumikisa o dibesá diami ku muvu ua kasamanu, anga oxi ikuata kuima ibundu katé mu mivu itatu ia muvimba, sé kulalumuka.

Zakadiia 8:12

Mukonda eme nga-nda ku kuua o kutululuka o mbutu ia kà kala ni kuzediua. Muvide ua kà lukula ibundu iê, o ixi ia kà bhana idima, o diulu dia kà bhana dimume diê mu kimene; anga ngi bhangesa kuila, o ima ioso iii ia kà biluka undundu ua ngene ua iá a subhuka ku muiji uenhú.

Matesu 5:45

Nda mu kale mu anʼa Tata ienu uene mu diulu. Kuma muène mukua kubhangesa dikumbi diê di bandela athu abhukumuka ni athu ambote, u tumikisa mvula ni kua ia aiuka ni ku ísueia.

Jipoxolo 14:17

Maji mu thembu joso Nzambi ka kambele-phe ku dʼ idikiza kioso Muène kiene, mu mbote iê iene mu kubhanga. Kuma Muène mukua kubhindumuna, ua bhana jinga mvula ku diulu, ni idima kuvula bhu thembu ja tokala, phala mu kale ni kúdia, o muẋima uenu uizale ni kusanguluka.

Matendelelu 11:13

Kia kà kala kiki-phe kuila, se mu kuata muanu ua kutumaka ijiia iami i ngala ku mi bhana lelu iii, ia kuzola Jihova Nzambi ienu, ni ku mu sedivila ni muxima uenu uoso ni muenhu uenu uoso,

Matendelelu 11:14

Eme-phe oxi ienu ngenda ni ku i bhana o mvula ioso iatokala bhu thembu iê; ngi bhana o mvula ia dianga ia isanga bhu kudinji, hé ngi kaielesa ue ia sukidila-ku ia kungulula musoke, phala mu mune idima, ni masa, ni vinhu ia uisu, ni maji-mê.

Matendelelu 28:12

Jihova ua-nda ku ku jikuila o dibhakelu diê, dia mbote, o diulu, phala diende ni kubhana o mvula ku mavu mé bhu thembu iatokala; anga Jihova muene uzediuisa o ikalakalu ia maku mé. Eie-phe, ua-nda sobhesa miji ia athu avulu, maji eie nuka ua-nda kusobha kima.

Tiiaku 5:7

Kala kiki, kuatenu-phe kinhenge, enu jiphange, katé bhua kèjiia Ngana. Talesenu kidimakaji kioso kia kinga ibundu iambote i tunda mu mavu. Muène u i kuatela kinhenge, katé ki i nokena mvula ia kudinji ni ia kasamanu.

Dijingunuinu 11:6

Enhá a kôla, kuma a a bhana kutena kua kuxita ku diulu, mbé ki ku sonoke mvula mu izuua iâ ia kutanga o Njimbu ia Ngana. A a bhana ue kutena kua kukitula o menha nʼa kale manhinga. A tena ue kubuikisa o ngongo ni dibhebhu dioso-dioso, kioso kia mesena ene, mu lukuxi luoso luendi.