10 Uila kiki, ima ioso ngi kolokota na-iu, mukonda dia athu a ngene a Nzambi òsole. Ngi ki bhangela phala a tambule ubhulukilu uene mua Kristu Jezú, kumoxi ni kijîngo ki kié-kiene kutunuka dingi.
Maji o Ngana Nzambi, izuua ienhoio ia phaxi, ua i tolesa. Mbata o izuua ienhoio, se a kamba ku i tolesa, kana xitu i bhuluka. Maji mukonda-phe dia akua Nzambi ósole, izuʼuoio a kà i fikisa.
Mbata kua ká tukuluka Jikristu javulu ja makutu, ni jipolofeta ja makutu. Ene à kedikiza isuma ni madiuanu mavulu, katé se kuila ki xikina, ni athu a Nzambi ene ósole, eji ku a jimbidisa.
Abha, Nzambi u kamba kufundisa athuʼê ua a sola, a di kola-kola kua muène mu muanha ni mu usuku, anga ua zokelela mu milonga iâ? Manhi u kokoloka mu ku a banda?
Tata iami! Nga mesena enhó oso ua ngi bhana-nâ, a kale ni eme koko kuoso ku ngà kala. Nga mesena kuila a mone kijingu kiami ki ua ngi bhana, kuma eie ua ngi zola tunde ʼbhuoso bhaná, mu ngongo kiluua mu kala dimatekenu diê.
Kuma muène ua solo ue kuidikiza o unéne ua fuma iê ia lunduluila ku thandu dietu etu, a tu lendukila kuala muène, iú ua bhange mʼ ukulu munhá, phala ni tu tambule o fuma ienʼ ii.
Kuma o Nzambi, mu unjimu uê, ua bhangesa kuila athu a lémbua ku mu ijiia Muène, mu kuijiia kua ene, maji kia mu uabhela kubhulula oso a xikana. O kienhiki, Nzambi ua ki bhangela mu uoua ua maka mê u tuala kutula.
Oso a bhuila mu kuxikana, ngi kala-nâ kala eme nga bhuila uami, phala ngi kombole oso a bhuila. Ngi kala ngi kioso kua ene oso, phala mu ndunge joso, ngi tene kubhulula-ku amoxi-mu.
Se etu-phe tu tala hadi, enu tua mi talela-iu, mu ku mi konda malamba ni ku mi bhulula. O ki kala a tu bhandulula, ni enu uenu mu bnhanduluka phala ni mu tambule nguzu ia kubhalakata mu jiphaxiʼ ojo jene jimoxi ni jetu.
Eme ngi ki sangulukila kiavulu o ku mi texila ioso i ngala na-iu, katé ni eme-muène ku di bhana mu kusota o mienhu ienu. Kifua se o henda iami iia ni kuvula, enu o ienu iia ni kusosoloka?
Kuma ima iene ioso iii ia bhitila mukonda dienu. Mu kienhiki o kiadi kia Nzambi ki kale mu kusambuka dingi ku athu avulu, o athu enhá na kale mu vudisa dingi o misambu ia kusakidila, mu kufumanesa Nzambi.
Kuma o hadi ietu iii i tua mu bhita na-iu iabhebhuluka, ia kithangana ngó, hinu i tu bhekela kuzediua kuavulu kinéne, kua beta ukota o hadi iii ndenge, kuxalela-ku ndú ku hadia ni hadia.
Kiki nga sanguluka mu jihadi joso ji ngala ku mi talela enu. Mukonda nga kuata kutala hadi ioso ia ngi xindi ku jingongo ja Kristu ja xedi-ku; ngi ji bhita mu xitu iami, mu kubhangela o mukutu uê-muene, muène, o Ngeleja.
Nzambi kia mu uabhela kienhiki: O kuila mundu uê u a ejidisa o jimbongo ja kijinganu kiê, o kijinganu kiokio kia fuma ni ujitu kia bhake Nzambi phala o miji ioso mu ngongo. Kijinganu kiki: Kuila Kristu u tunga moxi dienu, o mu kubhanga kiki, ua mi dielelesa kutambula mbandu ku fuma ia Nzambi.
Eme Phaulu, poxolo ia Kristu Jezú mu vondadi ia Nzambi, a ngi tumu kuboka o njimbu ia kikanenu kia muenhu u tuene na-u mu kudibunda kuetu ni Kristu Jezú.
Eme Phaulu, ngunza ia Nzambi, Poxolo ia Jezú Kristu, nga soneka o mukanda iú. A ngi tungula ia a ngi tumikisa mu kukuatekesa ni kusuinisa o kuxikanʼoko kuene na-ku athu a Nzambi, phala ku a endesa mu kidi kiene kulonga o ubhezelu uetu.
O Nzambi-phe ia kiadi kioso, ua mʼixana mua Kristu ku fuma iê ia kalelà-ku, ki mua kà zubha kathangana ka kutala hadi, muène-muene u mi tenesa, u mi kuatesa, u mi suinisa.