II Samuuele 24:13 - O Mikanda Ikola

¹³ Ngadi anga u iza kua Davidi, u mu tangela, uixi: Eie ua mesena ku kala sambuadi dia mivu ia nzala di ku iza mʼoxi ié? Inga u bhanga mbeji jitatu ni kulenga jinguma ja ku langata, jenda ni ku ku kaia? Inga ku kala kibuika mʼoxi ié, ki bhanga izuua itatu? Tongolola kiambote kioso ki u vutula, phala ngi ki tule kua ió uoso ua ngi tumu.

II Samuuele 24:13 ပူးပေါင်းရင်းမြစ်များ

II Samuuele 21:1

Anga ku kala nzala mu izuua ia Davidi, i bhanga mivu itatu, kuiza muvu kiene, kuiza muvu kiene. Davidi anga u sota pholo ia Jihova, Jihova anga u zuela, uixi: Nzala iii iejila mukonda dia Saúlo, ni dibhata diê diaiibha ni manhinga, mukonda ua jibha akua Ngibiione.

II Samuuele 24:12

Ndeie ua kʼàmbele Davidi: Eme Jihova uedi kiki: Nga ku bhana ima itatu; sola-bhu kima kimoxi kioso ki ngi ku bhanga.

II Jisobha 8:1

Ilizeu hé u zuelela dingi o muhatu ió uavu monʼê ua mu phaphumuine kuʼalunga, uixi: Balumuka, uie, nʼeie ni akuaʼnzu ié, mu kunhungana kuoso ku u tena o kunhunganena, mukonda Jihova uexana nzala, nzala ia-nda kuiza mu ngongo mu sambuadi dia mivu.

I Malunda 21:12

mba mivu itatu ia nzala, mba mu mbeji jitatu a kuoseka kuala o jinguma jé, ni ku ku buba ku xibhata ia jinguma jé, mba xibhata ia Nzambi i ku kuama mu izuua itatu, kifua dibhebhu dia kibuika di ku tula mu ixi, kumoxi ni anju ia Jihova, hé a sengulula o jimbambe joso ja Izalaiele; tala-phe kiá, kindala, u ngi tangele o uvutuilu u nga kà tula kua ió ua ngi tumu.

Jisálamu 91:6

Mba dibhebhu diendela mu kitombe, mba kibuika ki kuata ku mediia.

Makatukilu 7:25

Kienhokio sambuadi dia izuua anga i tena, tunde Jihova kia beta honga ia Nilu.

Izekiiele 14:13

Monʼa muthu, kioso o ixi ki i ta kituxi kokuami, anga i ngi ẋinukina muene kiavulu, kuabhu-phe, eme ue nga-nda kusunununa lukuaku luami mu ku i bilukila, o huta ia kúdia nga-nda ku i bhanga kabilu-bilu hé o ixʼoio ngi i tumikisa o nzala, nda ngi vuza-mu o athu ni iama.

Ijila 26:20

Nguzu ienu ienda ni kudibota mu kingoho. Oxi ienu ki ibhana dingi o ima iê iambote, o miẋi i mu phapha ku mavu iseluka, kubhana ibundu, lémbue.

Ijila 26:25

Oko kuthandu dienu ngi bheka-ku kiá xibhata, iene anga i mi bhanga-kiu mu kuvutula o phonzo ia kikutu ki tua tedienu-di; anga ngi mi phopha muene kiambote hé ngi mi tula mu jisanzala jenu; kiene kiua ki ngi mi tumikisa o dibhebhu mu kaẋi kenu, anga ngi mi bhakula ue bhu maku a jinguma.

Luka 4:25

Ivenu, ngi mi ambele o kidi: Mu Izalaiele mua kexile ahatu a atudi avulu mu izuua ia Elija, kia jikile o diulu mu mivu itatu ni mbeji jisamanu, mʼoxi ioso anga mu vula nzala.

Matendelelu 28:22

Jihova ua kà ku kuama ni uhaxi ua thulu, ni nzonzódia ia kukata-kata, ni kijimba-jimba, ni munza, ni kimaji, ni dixiximinu, ni kiangala, ni kibuika kia idima, ni ngulèle, anga i ku tatesa ni ku ku landameka katé ki u jima o mbutu.

Matendelelu 28:25

Jihova u ku toluela muene bhu pholo ia ʼnguma jé; mu ku tundila o jinguma jé phala kutakana-na-ju, uila u a kaia mu njila imoxi, eie-phe ua kà lenga lusambuadi bhu pholo iâ, a kà ku lebhula mu jixi joso mu ngongo.

Matendelelu 28:27

Jihova u ku tatesa ni mikôngo ia tokala akua Ijito; anga ku di ta matute ni jihana ni madiazela, ma ku kuatela ku mataku, anga uila o saké, lémbua.

Matendelelu 28:35

Jihova-phe u ku ẋolomona o jiphuna ni matabela anga uila muene ẋôtoto ni kítanga, tunde bhu kànda dia kinama katé bhu thalʼa mútue, anga u lémbua ku ki saka.

Matendelelu 28:52

Sanzala jé joso ja kà sekala, kuma a kà ji kondoloka ku jinguma; o imbaka ié ioso iamakota i ua dielelele, ia ku fikidile kiambote, a i lundumuina bhoxi. Mu ididi ioso mu uatungu ua kà kala ni mukondo, a kà ku kondela bhu mielu ioso katé kiá kua suku oxi ioso ia-nda ku ku bhana Jihova Nzambi ié.

I Samuuele 25:17

Kiki-phe eie ijiia na-kiu, u tongolole kioso ki u bhanga, kuma muadiʼetu kua-nda ku mu iza divuua, anga u senguluka ni dibhata diê dioso. Muene-phe o kusekala ni kuhuka kuala na-ku, ua di bhange monʼa kadia-phemba, muthu ka xikina ngó ku mu zuelesa.