Hozeia 3:1 - O Mikanda Ikola

¹ Anga Jihova u ngʼambela, uixi: Ndé dingi luamukuá, u zole muhatu, a mu zola kuala kamba dié, suke muene-phe kiuaia, (uene mu ta jiphanda), mukua ni Jihova kia zola anʼa Izalaiele, Sumbala-phe ene a landukila kutala ku jinzambi jengi, a uabhela jimbolo jabhange ni ji-uva.

Hozeia 3:1 ပူးပေါင်းရင်းမြစ်များ

II Samuuele 6:19

Muene anga u uanena mundu uoso ua Izalaiele, ni mala ni ahatu, kala muthu dikende dia mbolo, ni thumba iambote ia xitu, ni mutadi ua ji-uva jakukuta. Mundu anga a muangana, kala muthu ku bhata diê.

II Jisobha 13:23

Maji-phe, Jihova ua a kuatelele henda, anga u a lendukila, hé u a sakukila, mukonda dia henda ia kikutu kiê kia tele ni Mbalahamu, ni Izake, ni Jakobo; anga u dituna o ku a jima o mbutu, o bhu pholo iê ue, ka a kaie-bhu luua.

I Malunda 16:3

Ene oso, mu Izalaiele, anga u a uanena kala muthu mbolo ni thùmba iambote ia xitu, ni ndose ia ji-uva jakukuta, tunde ku mala katé ku ahatu.

Nehemiia 9:31

Maji eie-phe mu kuvula o henda, ku a jimi mbutu mba u a ehelela; mbata eie u Nzambi ua uabhela kuloloka ni ku kuatela henda.

Jisálamu 123:2

Mukuâ ni mesu a mubhika kia tala ku lukuaku lua muadiʼê ni mesu a kahatu kia tonginina ku lukuaku lua ndona ua mu vu, kiene ue kia lungu o mesu metu kua Jihova, Nzambi ietu, katé kia tu kuatela henda.

Makatukilu 32:6

Ki kúkia anga a di meneka, a bhana jisata ja kuoha, a bheka jisata ja uembu; mundu anga a xikama mu kúdia ni kúnua, hé a balumuka anga a tonoka.

Mukumbi ua Mikumbi 2:5

Ngi bhanienu kúdia jipasa, ngi kuatekesienu ni jimasá, mukonda jihenda jê ja ngi kodiuisa, nga benguka na-ju.

Izaía 45:22

Talenu kokuami, nda mu bhuluke, enu mu masukilu oso kua sukaʼxi; mbata eme-muène ngi Nzambi, ki kuene nzambi iengi.

Jelemiia 3:20

Mukuâ ni phèke-phèke ia muhatu u di-ambudisa ni munumʼiê, kiene ue ki ua di-bhange uphèke-phèke phalʼeme, eie u dibhata dia Izalaiele, Jihova ua ki tange.

Jelemiia 31:20

Manhi Ifalaíme ki monʼami ua hate? Kamona kami ka makembu? Mukonda kioso ki ngi zubha ku mu zuela ima ia ku mu bhanga kia ibha, hanji ngi mu xinganeka ni muẋima uoso; kienhiki miẋima moxi i ngi bhuá-mu mukonda dia muene, hanji nga-nda ku mu kuatela henda ia vulu, Jihova ua ki tange.

Hozeia 11:8

O kiki-phe eie Ifalaíme, ngi kuehelela kiebhi? Ngi ku bhakula kiebhi, eie Izalaiele, tata! Ngi ku bhanga kiebhi kala kia bhiti kua Adama, mba ngi ku kitula kiebhi kala Nzeboíme? Muẋima uami moxi ki u xikina, o henda jami ja bambuka kala túbhia.

Hozeia 2:5

Kuma mamʼâ ua te jiphànda; ió uoso ua emitine ua bhange isunji; o ujitu uoso ua di katula-u; mukonda muene uambe, uixi: Eme nga-nda kulandula o jisaii jami, ene mu ngi bhana o mbolo iami, ni menha ami, a ngi bhana o lâ ni linhu iami, a ngi bhana o majiʼami ni maluvu a kúnua.

Hozeia 4:11

O uhabhu, ni vinhu ni maluvu, a katula kilunji.

Hozeia 7:5

O bhu kizuua kia fesa ia sobha ietu, jingana ja di katesa ni vinhu, ià nuina enhoso kumoxi mu kilunga kia jisemenhi.

Amoji 2:8

U sanga a zeka kumoxi bhu mbanduʼa kalatódio koso-koso, ku thandu dia izuatu ia a ximbikila; o monzo ia jinzambi jâ muene mua nuina o vinhu ia kubhûnda.

Amoji 6:6

O vinhu mu i nuina mu jikopho ja makota; o mu ku di uaia kuenu ki kale ngó ni maji a te kitadi kiavulu; maji mua lémbua ku kala ni dilamba dia kusenguluka kua Zuze!

Mikeia 7:7

Eme-phe o Jihova muene-muène nga kà mu kinga, nga ka kinga kua Nzambi ia ubhulukilu uami; Nzambi iami ua kà ngʼivua.

Zakadiia 1:16

Kala kiki, Jihova uambe, uixi: Jeluzaleme nga mu lungulukila dingi ni jihenda; o inzu iami a kà i tunga dingi muenhomo, o kuthandu dia Jeluzaleme à ka zeleka-ku kamukolo, kiene kia tange Jihova dia Ilombo Ieta.

Matesu 26:50

Jezú-phe u mu ambela, uixi: Kamba bhanga kioso kia ku bheka! Ene anga a bhiẋila, Jezú a mu kuata, hé a mu kuta.

I Kolindo 10:21

Enu ki mu tena kunua mu kopho ia Ngana, ni mu kopho ia madimonho. Ki mu tena ue kudia ku meza ma Ngana ni ku meza ma madimonho.

I Kolindo 10:7

Mba kukala mu abhezi a iteka, kala ki a bhangele ene amoxi-mu. Uila kia ki soneka mu Mikanda Ikôla, exi: O mundu ua xikamene mu kudia ni kunua, kithangana a balumuka mu kukina.

I Phetele 4:3

Kuma o thembu ia bhiti-ku ia soko kiá ia kubhanga ioso ia uabhela kubhanga o matumbu, kejiia Nzambi. Mukonda mu thembuʼomo enu uenu mua kexi mu kuenda mu jiphànda, ni mu jihânji ja xitu, ni mu uhôlua, ni mu ufusa, ni mu jifesa ja kukodiua, ni mu isunji iaiibha ia kubheza o iteka.

Afundixi 10:16

Anga a tubhula o jinzambi ja jixi jengi muʼaxaxi kâ, a kala mu bhikila Jihova; muene anga u kala ni muẋima ua kuxinganeka o kusebuluka kua Izalaiele anga u kala ni henda iâ.

Afundixi 9:27

Anga aia ku mábhia, a muna mivide iâ, a titidila jiuva mu ditangi, a keta vinhu anga a kala mu bhanga kizokola, a bokona mʼonzo ia nzambi iâ, o mu fesa, Abimeleke enda ni ku mu longolola ni ku mu xinga.