Hozeia 2:21 - O Mikanda Ikola

²¹ Kia kà bhita-phe mu kizuuʼokio, kuma eme nga kʼevua, eme ngi Jihova, nga kʼevua o maúlu anga ngʼa vutuila, ene ue a kʼevua kioso kiendi o ixi.

Hozeia 2:21 ပူးပေါင်းရင်းမြစ်များ

Izaía 55:10

Kala kisonoka o mvula bhoxi, ni neve kioso ki ia laúka ku diulu, ki i tena kuvutukila-ku dingi, kale itekela oxi, anga i bhekesa kuima, isabhukisa, hé i bhana o mbutu ku kidimakaji ua kunu, ni mbolo kua ió udia,

Izaía 62:4

Ki bhu kala dingi o ku ku luka exi: Na-Ubheka, ni oxi ié ka kà i luka dingi exi, Kibuila; inda a kà ku luka: Ngina-hate; oxi ié-phe exi, Sakani; mbata Jihova ua di-uabhela nʼeie, oxi ié ia kà sakana ni muene.

Izaía 62:5

Kala munzangala ua diiala kia sakana ni kilumba, kiene ue anʼé kia-nda kusakana nʼeie; kala ngaiàla kia sendukila o dibhanga, kiene ue Nzambi ié kia-nda ku ku sendukila eie.

Izaía 65:24

Anga kia kà bhita, kuila ene kiluua a zubha kuixana, eme nga kʼètaia kiá; kuila ene kiluua ngó a zubha kuzuela, eme ngevuʼami kiá.

Izekiiele 36:29

Kienhókio nga kà mi kula ku maufusa menu moso; hé nga kʼèxana o kúdia ni ngi ku sokolola, ki mungu dingi mu kala ni nzala ku thandu dienu.

Hozeia 14:7

Oso a tungile kiá mu kilembeketa kiê a-nda kuvutukila-mu dingi; ene-phe a-nda kutambula dingi muenhu mukuâ ni kiene kufuáfua o tiliku, anga ema ni kubhana itulu kala muvide; o kufumana kuâ a kʼèla kala kia fumana o vinhu ia Libano.

Jouele 2:19

Jihova ua kà tangela mundu uê, ua kà kumbulula, uixi: Talesa-ze, ngi mi tumikisa tiliku, ni vinhu ia ubhe ni maji, ima iosuʼiii ia kà mi kuma; ki ngà mi bhana dingi ku lusebhu mu kaxi ka akua jixi.

Zakadiia 13:9

Anga mbandu ia katatu iii nga kà i bhitisa mu túbhia, nga kà i zelesa mukua ni kiene kuzunza o utadi ua phalata, hé nga kà i lola kala kiene ku lola o ulu. Iene ki ia kà diundila dijina diami, eme ue nga kà ivua muene. Eme nga kà i ambela, ngixi: Iú uene o mundu uami; o iene ue ia kèla iexi: Jihova muene o Nzambi iami.

Zakadiia 8:12

Mukonda eme nga-nda ku kuua o kutululuka o mbutu ia kà kala ni kuzediua. Muvide ua kà lukula ibundu iê, o ixi ia kà bhana idima, o diulu dia kà bhana dimume diê mu kimene; anga ngi bhangesa kuila, o ima ioso iii ia kà biluka undundu ua ngene ua iá a subhuka ku muiji uenhú.

Zakadiia 8:8

Nga kèza-nâ; a kà tunga muʼaxaxi ka Jeluzaleme. Ene a kà kala mundu uami, eme nga kà kala ngi Nzambi iâ, mu kidi ni mu kufundisa kua iuka.

Malakiia 3:10

Bhekenu madijimu moso mʼonzo iami ia dilundilu, mʼonzo iami mu kale mákudia; o ki mu zubha ku ki bhanga, ngi lodienu kiá, eme ngi Jihova dia Ilombo Ieta, se ngi kamba ku mi jikuila jinjanena ja diulu, ni ku mi lunduluila dibesá, di mi soka anga di subhuka, di bhinga ki di kala ni nzôngo iê mu ku mi bhekela jimbote.

Malakiia 3:11

Mukonda dienu, ngi bazela kabamba uene mu kujeja, phala ki ka mi dile idima iaʼxi ienu; o muvide uenu mu mábhia ki u seluka ni ukambe kuima; Jihova dia Ifuẋi ua ki tange.

Matesu 6:33

Diangenu-phe kusota o Utuminu ua Nzambi ni uiukilu uê, nda ima ioso iii a mi kuiila-iu.

Loma 8:32

Nzambi uedile ni Monʼ ê muène ka mu fikixila, maji ua mu bhakuile mukonda dia etu-ene-oso! Nzambi se ua tu bhana Monʼ ê, u kamba kiebhi ku tu bhana mu ngoho, kumoxi ni muène, o ima ioso kiá?