Hozeia 14:3 - O Mikanda Ikola

³ Asídia ki muene ua-nda ku tu bhulula; o ku jikabalu ue ki tua-nda kumondala-ku dingi; o kima kia bhange kuala makuʼetu, ki tua-nda ku ki tangela dingi, kuamba: Eie, eie kiá u Nzambi ietu; mukonda o monʼa kitungu, ua kambe tata ni mama, kiadi u ki bongela momué.

Hozeia 14:3 ပူးပေါင်းရင်းမြစ်များ

II Malunda 16:7

Mu kithangana kieneʼokio muene, Hanani mukua lumono ueza kua Aza, sobha ia Juda, uixi: Kuma eie ua dielela kua sobha ia Sídia, o kudielela Jihova, Nzambi ié, kana, kuabhu-phe o kifuẋi kia masoladi ma sobha ia Sídia kia ku sutunuka bhu maku.

Jisálamu 10:14

Eie-phe ua ki mono; kuma u mukua kutala o ikalakalu ia athu ni malamba mâ moso; phala eie u ki kuate muene konda bhu maku mé; eie muene hinu u zuela ku mulonga uâ; kokué kuene ku di bhakula uoso ua lémbua kubhânga; eie muene u dilemba dia jihukunhi.

Jisálamu 146:3

Kana kudielela jingana mu ngongo, mba monʼa muthu ua lémbua kubhandulula, kuma ku monʼa muthu kana-ku kubhuluka kua kima.

Jisálamu 146:9

Jihova u langa jinzuángiza; u tambula konda ia jihukunhi ni atudi; maji o njila-phe ia ísueia u i bhengeleka.

Jisálamu 33:17

Kabalu makutu, ku mu dielela ku ita; o nguzu iê ni kulenga kuê, ki ku bhana muthu muenhu.

Jisálamu 68:5

Tata ia jihukunhi, o dilemba dia ahatu a xala atudi, muene Nzambiʼó ku mbanza iê ikôla.

Izaía 1:29

Kuma sonhi ja kà mi kuata, mukonda dia luimbi luenu lua mixi ia mikaluvadiu i mua kôlesa, pholo ia kà mi sonoka mukonda dia mábhia a itulu u mua solo phala kubhezela.

Izaía 2:20

Mu kizuua kieneʼokio, o muthu ua kà takuila ku jiphukulu ni ku madima o iteka iê ia phalata ni iteka iê ia ulu, ia bhangele phala ene ku i diundila.

Izaía 27:9

Kienhiki-phe, o kikuma kioso kia Jakobo, a kà ki bhuisa-ku ni kiamenga; o kiki kia kà kala kiene o kibundu kia kukatula o kituxi kiê kioso, kioso. O Jihova muene kia-nda kubhanga o matadi oso a kalatódio kala matadi ma hala a ma bula-bula; kieneʼokio ue, o mixitu ni iteka ia lumbidile o dikumbi, ki ia kà tena dingi kuimana.

Izaía 30:16

Mukonda enu-phe muambe, muexi: Lémbue! Sembele tua di te ku jikabalu ni tu lenge; kiene kia-nda ku mi lengesʼokio; muexi, tu mondala kiá jingelenge; kiene-phe kianda kusakalela ue o jinguma jenu mu ku mi bhesa o lusolo.

Izaía 30:2

Hé a kulumuka mu Ijitu, kene ku ngʼibhula dingi kioso ki tunda mu kanu diami; a bhangela ku di-fikidila ni undanda ua Falaó, phala kudielela o kilembeketa kia Ijitu.

Izaía 31:1

Kokolo dia ió oso a kulumuka ku Ijitu mu ku sota-ku dikuatekesu, anga a ta o muẋima ku jikabalu; a dielela o makalu mukonda a di-xala, ni a-mondadi ala i-mazonda ionéne; maji ka xikina kusuua Dilemba dia Izalaiele; ka xikina ku sota Jihova.

Izaía 31:3

Kuma akua-Ijitu, ki Nzambi, kana, athu ngó; o jikabalu jâ, xitu ngó, ki nzumbi kana; o kioso Jihova kia kà sunununa lukuaku luê, ku tale o mukuatekexi uixi iú a mu mu kuatekesa, ene oso a kà di bhala bhoxi anga a kà buikila kumoxi.

Izaía 36:8

Hé kima-phe, bhana ilôlo kua muadiami, i kale ku ungunji, kua sobha ia Asídia, eme-phe ngi ku bhana midi jiiadi ja jikabalu, se eie utena kusanga makuenze a ji mondala joso.

Jelemiia 49:11

Jihukunhi jé xisa naju, eme ngʼa bhaka ku muenhu; o atudiʼé a-nda ku ngi dielela eme.

Izekiiele 36:25

Kienhókio nga kà mi pusuila menha a zele ku thandu dienu, anga mu-bhua o dixidilu dioso; nga kà mi zelesa muene ku maufusa menu moso, ni ku mahamba menu moso.

Izekiiele 37:23

Ene ue ki mungu a di kasanesa dingi ni mahamba mâ, mba ni maufusa mâ, mba o makutondala mâ, hé nga kà a kudila mu ididi ioso ia mautungilu mâ, usatela jinga o ituxi, hé nga kà a zelesa; kiokio kiá ene a kà kala mundu uami, o eme ngi kala ngi Nzambi iâ.

Hozeia 12:1

Ifalaíme uala ku di dikila ni kitembu, kumbi dioso dia kambamba u kaiela kitembu kia thunda; u nangena ku vudisa makutu ni kibuika izuua ioso; o kikutu u ki ta ni Asídia, maji mê uia mu ku mabheka ku Ijito, kuma diene o dibhôko dia mu bhana.

Hozeia 13:2

O kiki-phe ituxi ia mu di vuala dingi, a nomona ku phalata iâ anga a di bhangela kiteka kia kuzunza, a di bhangela muene iteka ia solo ku miẋima iâ, iene ioso-phe ima iòkalakale ku maku ma jihete ja ufunu, anga aia ni kuila: Enu mu athu satelenu ku jinzambi jiji, bhanenu jibeju ku tungombe tutu.

Hozeia 14:8

Ifalaíme ua kʼèla, uixi: Eme bhu ngalʼabha o iteka nga kuata na-iu kima kiahi? Eme-phe ngi mu suua, o kia zulʼokio ngi ki ivua muene. Mbata eme nga di bhange kala ngi mufuáia ua buingita mu thembu joso, o ibundu ié u i sanga jinga momuami.

Hozeia 2:17

O majina ma mahamba mê, mu kanu diê nga-nda ku ma katula-mu, majina ma iteka ioio ka kà muiza dingi mu kilunji kiê.

Hozeia 4:12

Mundu uami a zambuila ku kiximbu kia muẋi, o mbangala iâ anga ienda ni ku a lomboluela; mukonda o nzumbi ia uhabhu iala kuia ni ku a nganala, ene anga aia ni ku di kasanesa, o Nzambi iâ a mu xisa dikanga.

Hozeia 5:13

Kioso Ifalaíme kia mono o uhaxi uê, ni Juda kia mono dibhebhu diê, Ifalaíme ua bande kusota Asídia, ua tumu muene jiphunga kua sobha Jalebe, phala nʼa tene ku a kudila; maji muenephe ka tena ku mi saka, né ngó ku miʼlula o dibhebhu dienu.

Hozeia 7:11

Ifalaíme ue uedi kala diembe dia kilalu, kilunji kala na-kiu; a di tenda kua Ijito, aia ni ku di texila kua Asídia.

Hozeia 8:6

O kiki ue kia tundu kua Izalaiele; hete ia ufunu ua Já iudika. Iene ki Nzambi, kana. A-nda ku ki sasujula-phe anga kibhua-bhu kia kangombe ka Samádia.

Hozeia 8:9

Mbata a bandele ku Asídia mu kukuata-nê ukamba; ua di bhange mukua ni mukete ku milundu ubheka uê mu ku dʼimanena; maji Ifalaíme uala kuta uenji ua jisaii.

Jona 2:10

Kienhokio-phe Ngana u zuelela o mbiji, iene hé iia i lusila Jona ku ndundu ia kalunga ku kanga.

Zakadiia 13:2

Bhu kizuuʼokio-phe, kia kà kala kiki: Kuma majina ma iteka mu ngongo nga kà ma bhuisa-mu; o iteka ki bhuà kala dingi uoso u i xinganeka, Jihova dia Ilombo Ieta ua ki tange. Ni jipolofeta ja makutu mu ngongo nga kà ji kaiesa-mu, ki ja kà kala-mu dingi; ni nzumbi ioso ia ufusa ue ia kà tunda.

Nzuá 14:18

Ki nga-nda ku mi xisa ubheka kala mu jihukunhu, hinu ngi mi sanga ni ngi kale jinga ni enu.

Matendelelu 17:16

O muene-phe ka di vudixile jikabalu; kana kuvutukisa o mundu mu Ijitu, mu kuvudisa dingi jikabalu; mukonda Jihova ua mi ambela, kuila: Njila iii ki mungu dingi mu i vutukila.