Dijingunuinu 20:12 - O Mikanda Ikola

¹² Anga ngi mona ue o madifundu, makota ni jindenge, emana bhu pholo ia kiandu. Anga a jikula madivulu, ni divulu dia mukuá a di jikula, diene o divulu dia muenhu. O madifundu anga a a fundisa o ima ioso iosonèke mu madivulu, hé a a bhana kioso kia tokala mu imbamba iâ ia bhanga jinga.

Dijingunuinu 20:12 ပူးပေါင်းရင်းမြစ်များ

Jisálamu 28:4

A bhange kala kioso kia bhanga jinga ene, kioso kia tokala mu kukalakala kuâ kua kubhukumuka; a bhane muene kia soko mu ufunu ua maku mâ, a fute, Ngana, kioso kia a tokala.

Jisálamu 62:12

Ni kulenduka kua ku tokala, eie Ngana; kuma eie-muène u vutuila o muthu kala kioso kia fuama mu kukalakala kuê.

Jisálamu 69:28

A jimuene, Ngana, o majina mu divulu dia muenhu; ka a soneke dingi kumoxi ni athu a iuka.

Jisabhu 24:12

O ki uila uixi: Manhì diâ! manhi ió mukua kutala o miẋima, kanda ku ki bhanga konda? Ió mukua kulonda o muenhu ué, ka-nda ku kʼijiia? manhi muene muthu kioso ki a bhanga ki kiene kia mu vutuila?

Jisabhu 24:29

Kana kuila, uixi: Kioso kia ngi bhange muene, eme ue kiene ki nga-nda ku mu bhanga, mukonda kala muthu ngi mu vutuila kiafuama mu ima ioso ia ikalakalu iê.

Ndongixi 12:14

Mbata Nzambi hádia o ikalakalu ioso ua kà i bheka bhu kibhuna kia kufundisa, katé ni ioio iòsueke, kixi ia uabha mba ia iibha.

Jelemiia 17:10

Eme ngi Jihova eme ngi solokota o muẋima, eme ngi tungula o ilunji; ngi ki bhangela-phe kumona o futu ia tokala kubhana kala muthu kia fuama ku mauendelu mê, ni kia fuama ku ibundu ia ibhangelu iê.

Jelemiia 32:19

Ukola mu kaiula, Munéne mu ima ia bhanga! mukonda o mesu mé ma jikuka ni ku kengelela ku thandu dia jinjila joso ja anʼathu, phala kubhana muthu ni muthu kala kia fuama o jinjila jê ni kioso kiala o ibundu ia ibhangelu iê.

Daniiele 7:10

Bhu pholo iê bhu kunguluka ngiji ia túbhia. Jimidi ja jimidi ja kuata ku mu xibhidila, jifuku ni jifuku jemana bhu pholo iê. Kufundisa kueza-bhu, madivulu a ma jikula.

Matesu 11:22

Ngi mi ambela-phe kuma, inda Tilu ni Sidónia, Nzambi ua kà a lendukila mu kizuua kia kufundisa, enu kana!

Matesu 16:27

Mbata Monʼa Muthu ua kèza mu kijingu kia Tata iê, kumoxi ni ji-anju jê; Thembuʼoio, kala muthu, ua kà mu vutuila kioso kia tokala mu ikalakalu iê.

Luka 10:20

Maji-phe kana kusangulukila o madimonho ma mi tolokela; inda mu sangulukila o majina menu kuma a ma soneka ku diulu.

Jipoxolo 24:15

Ngala ue ni kudielela kua Nzambi, ni ene iá na-ku, kuma hádia kukala difukunukinu dia athu aiuka ni athu abhukumuka.

Loma 2:6

Kuma muène ua kà uanena athu oso kala kia tokala mu imbamba iâ ia bhanga jinga.

I Kolindo 4:5

Uila kiki, kana kuêlesa muthu kiluua a bhixila bhu thembu iê. Kingenu o kufundisa kua kà suka-ku kia kéza Ngana. Muène uà kʼela iosueke mua vundu u i bheka bhua zele, ni ixinganeku iala mu miẋima ia athu u i tukulula. Kiene muthu ni muthu kia ka tambula kua Nzambi o diximanu diê dioso dia mu tokala.

II Kolindo 5:10

Kuma etu ene oso tua bhingi hadia tu tukulukila bhu kibhuna kia Kristu phala ku tu fundisa kuala muène. Kala muthu phala a tambule kioso kia fuama mu imbamba ioso ia bhanga jinga ku mukutu, kixi iambote, kixi iaiibha.

Filipe 4:3

Ni eie ue u soko diami dia kidi, nga ku diondo, ua a kuatekesa, ahatu enʼió. Kuma ene a ngi bande mu sedivisu ia kusambukisa o Njimbu Iambote, kumoxi ni Kelemende ue, ni amukuâ dingi u nga kalakala-nâ, majima mâ moso mala mu divulu dia muenhu, dia tokala Nzambi.

Dijingunuinu 11:18

O ifuẋi ia kambe kuijiia Nzambi ia salumuka ni njinda iavulu, mukonda kithangana kié, u Nzambi, kia kubhana kaxtiku kia bhixila! Kumbi dieza-bhu dia kufundisa athu oso a fua kiá! Kithangana kia tuta-bhu kia kuuanena o jiselevende jé jipolofeta o kisakidilu kiâ! Kumbi dieza-bhu kiá dia kubhana o futu ku athuʼé aiuka, ni ku mundu ué uoso ene mu ku ku xila, ni jindenge ni makota! Thembu ia bhiẋila-bhu kiá, ia kubuikisa ió oso ene mu kubuikisa oxi!

Dijingunuinu 13:8

O ene oso a tungu mu ngongo a kà kala mu ku mu bheza, ió ene oso a kambe o ku a soneka o majina mâ tundé ku dimatekenu dia ʼxi mu divulu dia muenhu diangene dia Kambudi, ió a mu jibhile.

Dijingunuinu 17:8

O kiama ki ua mono, kia kexile ni muenhu, maji o kiki, ki kianda kulaia dingi kiavulu. Mukonda o kiama kiki, hinu kia kà tunda mu dikungu ki di moneka hole, anga a kà mu buikisa. Athu a tungu mu ngongo, oso a kambe ku a soneka o majina mâ mu divulu dia muenhu tundé ku dimatekenu dia ʼxi, a-nda kua kà diuana ki a kà talesa o kiama. Mukonda o kiama ua kexile kiá ku muenhu, o kiki muenhu ua u lémbua, maji hinu ua kà tukuluka dingi.

Dijingunuinu 19:5

Kienhókio, bhu kiandu anga bhu tunda dízui, dixi: Ximanenu Nzambi ietu! Mu ximanienu enu oso mu jiselevende jê, enu mua mu kuatela uôma, jindenge ni makota!

Dijingunuinu 2:23

Anʼê ngʼa jibha ni dibhebhu, Jingeleja joso anga jʼijiie kuma ememuène ngi tungula o jihânji ni miẋima ia athu. Hinu enu oso ngi mi uanena o futu ioso ia tokala mu imbamba ienu i mu bhanga.

Dijingunuinu 20:11

Kia bhiti imʼíii, nga mono kiandu kia dikota kizela, ni muène ua xikama-bhu. O mu kulenga pholo iê, oxi ni diulu ia jimuka, ki ia moneka dingi ku mesu.

Dijingunuinu 20:13

O musanza ua kalunga anga u bhana oso madifundu ala-mu. O kùfua ni kalungʼa-ngombe, anga a bhana uâ ni madifundu mâ ma jikilile bhoxi dia kutena kuâ. Ene oso hé a a fundisa mu umoxi-umoxi, kala kia tokala mu imbamba iâ ia bhanga jinga.

Dijingunuinu 20:15

Uoso a mu mono, ua kambe ku mu soneka mu divulu dia muenhu, a mu takula ue mu kizanga kia túbhia.

Dijingunuinu 21:27

Maji o muene-phe ki mu bokona ngó kima kioso-kioso kia ufusa, mba muthu u bhanga isunji, ni ió u zuela makutu. A kà bokona mu mbana, ki kale ene ngó a a soneka o majina mâ mu divulu dia muenhu dia Kambudi.

Dijingunuinu 22:12

Jezú uixi: Bhulakanenu! Eme ngi lenguluka kuiza! Ni kifutilu kiami nganda kuiza na-kiu, mu kuuanena athu oso kioso kia tokala mu ima iâ ioso ia bhanga jinga.

Dijingunuinu 3:5

Uoso u tolola, a mu kembesa kiki ni izuatu izela; kana, kana, ki ngi mu jimuna dijina diê mu divulu dia muenhu. Hinu ngi mu fisala dijina diê bhu pholo ia Tata iami, ni bhu pholo ia ji-anju jê, kuila ua ngi tokala.