Amoji 5:1 - O Mikanda Ikola

¹ Ivenu maka iá, mbimbi iami ngi i zangumuna mu ku mi dila enu, mu dibhata dia Izalaiele.

Amoji 5:1 ပူးပေါင်းရင်းမြစ်များ

Jelemiia 18:13

Uila kiki, Jihova uambe; ibhulenu kindala muʼaxaxi ka matumbu mba mukuahi uevile kima kala kiki? monʼa kilumba mu Izalaiele-ze ua bhange kima ki kuatesa uoma!

Jelemiia 7:29

Kolola jindemba ja mútue ué, u ji texi, u bhita-bhite ku matala ni kuta o nzôngo ia kudila; mbata Jihova ua ẋimbuka iú uehelela o muiji ua njinda iê.

Jelemiia 9:10

Ku milundu ngi tela-ku nzongo ia ku dila, mu ididi i dila o ibhaku mu kikangalakata ngi tela-mu jingololo; kuma mua jikata kiá, u bhita-mu ka moneka dingi; ki muala dingi ku tunda kukoma kua ibhaku; tundé ku jinjila ja bhulu, tulé ku iama, edi o bunganʼéel … ia a lenge-mu!

Jelemiia 9:17

Jihova dia Ilombo Ieta, uambe kiki: Xinganekenu, muʼixane oso adidi-a-jithambi, nda eze; tumenu ue kusota ahatu a dilongo, nda eze uâ.

Jelemiia 9:20

Ivenu-ze, enu, mu ahatu, o kizuelu kia Jihova, o matui menu ma tambule kizuelu ki tunda mu kanu diê; nda mu longe anʼenu a ilumba o kudila, kala kilumba a longe mukuá o ku-ta jingololo.

Jelemiia 9:9

Manhi mu ima íii ngeji ku i talela ngó sé ku i bhesa njumbu, Eme Jihova? inga muenhu uami u kamba kuvutula phonzo ku athu kala iá?

Izekiiele 19:1

Eie-phe o ilamba ia Izalaiele zangumuina-iu nzongo ia kudila,

Izekiiele 19:14

O ku luthangu luê lumoxi kua tundu túbhia tuoha o ibundu iê, katé ki kuala dingi luthangu ngó lumoxi lua kolo lu tokala kukala mbasá ia kutumina na-iu. Kuku kuene o ku di tenda kua kà xalela-ku.

Izekiiele 26:17

Hé a kà ta mbùndu ia ku ku dila, ni kuila: Kia bhiti kiebhi o kujikinisa, eie, tata, ua tungile kiambote, u mbanza ia fumana, ua kexile u kindanda mu musanza ua kalunga; eie ni athuʼoso a tungile momué, mua kuatesa jinga uôma ku oso eza ku mi hindula a tunda o makanga!

Izekiiele 27:2

Eie-phe monʼa diiala, tata! O Tilu mu tele jingololo.

Izekiiele 28:12

Eie monʼa diiala, ta dingi mbùndu ia kudila, kua sobha ia Tilu, nda u mu ambele, uixi: O Jihova Nzambi uambe, kiki: Eie, é-muene kiá uejiia o kusokelesa o dizongelu, uezala ni kuijiia, eie ua tenena mu kuuabha.

Izekiiele 32:16

O iá ene o madidilu a-nda kua kà dila-nâ; anʼa ahatu mu jixi a kà mu dila; kienhiki muene kiá-nda kua kà dila Ijitu ni mundu uê uoso, Ngana Nzambi muene ua ki zuela.

Izekiiele 32:2

Eʼmonʼa diiala, tá nzongo ia kudila Falaó, sobha ia Ijitu, u muʼambele, uixi: Eie ua di bhangele mukuâ ni kamona ka hoji, muʼaxaxe ka ifuẋi, eie uedile kala u kimudikixi muʼalunga, ua nemeka jinga o jingiji jé, o menha ua a vunza-vunza jinga ni inama ié, o jingiji jé ua jʼizalesa jinga divunze.

Amoji 3:1

Ivenu kizuelu kia Jihova, uala kuzuela mu kuzoka ni enu, mu anʼa Izalaiele, enuʼoso mu muiji nga mi tombola mu ixi ia Ijitu, kuamba:

Amoji 4:1

Kizueluʼiki ivenu-kiu, enu mu jingombe ja akaji mu Basane, muala ku mulundu ua Samádia, enu mua mu bhinjika o jingadiama, mu bhondeleka o jiphulungu a tate, anga mu kala mu kuambela anumiʼenu muixi: Beke-nu kunu, tu nue!

Amoji 5:16

Uila kiki, Jihova, Nzambi ia Ilômbo Ieta, o Ngana, uambe kiki: Mu jinzunga joso mua kà kala jingololo, ni mu jisengu joso a kèla Aiué, tatʼé! Aiué, tatʼé! Ni kidimakaji a kà mu ixana ue phala kudila jingololo! Akua kudila lujiji, ejiia kusânga, a kà exana mu kudila.

Amoji 8:14

Oso akua kulokela ku Dihamba dia Samádia, ni kuila: Kidi muene, mukua ni kiene kulaia o nzambi ié, eie Dane! mba ela: Kidi muene-ze, mukua ni kiene kulaiela kua ió uene ku ku kondeka, eie Bele-Seba. A kala kiki, a kà dibhala anga a xalela, ka kà tena dingi kubalumuka.

Mikeia 2:4

Mu kizuuʼokio a ka mi tela kixanga ni ngololo ia kudila, exi: Tua kakuka, tua suku! Ua mono ni mbandu ia tokala akua muiji uami, muene iú u i lungulula! Tala kia ngi bomona! mikáu ietu ua tu tambula-iu, iu uala ku i uanena athu engi!