Tito 2:2 - ÎVUKU RÎA ÛVORO MWARO

² Îraga athuuri arîa akûrû mekarage meîguîte, marî na mîtugo mîaro, andû mangîvota kwînyitia maûndûrî, na methagîrwe marî na wîtîkio wa ma, marî na wendo na ûmîrîru.

Tito 2:2 ပူးပေါင်းရင်းမြစ်များ

Ayubu 12:12

Andû arîa akûrû nîo methagîrwa na ûûgî, na guo ûmenyo na arîa matûûrîte mîaka mîngî.

Thaburi 92:14

Îthiîcaga na mbere gûciara matunda wana îrî mîkûrû, vîndî cionthe îthagîrwa îrî na vinya na îrî mîruru.

Nthi 16:31

Mbuî nîta nthûmbî ya riiri, îvecagwa mûndû ûrîa ûtûûrîte na njîra ya ûthingu.

Isaia 65:20

Gûtikaagîa ciana igûkua irî ngenge rîngî, nao andû arîa akûrû matigaakua matakinyîtie kavinda kao. Mûndû angîkua akinyîtie ûkûrû wa mîaka îgana akoonagwa arî wa mwîthî, na angîkua atakinyîtie ûkûrû wa mîaka îgana akoonagwa arî mûrume.

Alawi 19:32

“Vecagani andû arîa akûrû gîtîîo, na mûmbathîkagîre; Nie nînie Ngai-Mûnene.

Maariko 5:15

Rîrîa maakinyire kûrî Jesû, nîmoonire mûndû ûcio wethîrîtwe arî na ngoma ekarîte vau nthî ekîrîte nguo na arî na kîongo Kîamro. Nao andû acio nîmaanyitirwe nî guoya.

Luka 8:35

Nao andû nîmaaumire mîciî kwao na makîthiî kwîyonera maûndû marîa meekîkîte. Na rîrîa andû acio maakinyire kûrî Jesû nî meegwire guoya nîûndû nîmeethîrîrie mûndû ûcio warutîtwe ngoma ekarîte nthî magûrûrî ma Jesû, ekîrîte nguo na arî na kîongo Kîamro.

Ciîko 24:25

Nwatî vîndî îrîa Paûlo aathiîcaga na mbere kwaria ûvoro wîgiî ûthingu, ûvoti wa kwatha merirîria ma mwîrî na mavinda marîa Mûthenya wa îtuîro ûgaakinya, Feliki nîwanyitirwe nî guoya na akiuga atîrî, “We nwa ûthiî rîu. Nagîa na kanya nîngaagwîta rîngî.”

Aroma 12:3

Nîûndû wa wega ûrîa naveerwe nî Ngai, muonthe nîramwîra atîrî: Mûtigetue anene gûkîra ûrîa mwagîrîrwe nî kwîthîrwa mûrî. Vandû va ûguo îthagîrwani mûrî na meciria matarî ma mwîtîîo, kûringana na wîtîkio ûrîa Ngai avete wa mûndû wa mûndû.

1Akor 15:34

Ambîrîriani gûtûmîra meciria menyu na njîra îrîa yagîrîrîte, na mûtige kwîvagia. Amwe gatagatîrî kenyu matiîcî Ngai. Nîrauga ûguo nîguo mûconoke.

1Akor 9:25

Mûvinyûri wa wonthe akîîmenyeria ûrîa akaavinyûra mîthakorî nîwîathaga maûndûrî monthe. Ekaga ûguo nîguo akaavewa nthûmbî îrîa îthiraga, nwatî tue twîkaga ûguo nîguo tûkaavewa nthûmbî îrîa îtathiraga.

2Akor 5:13

Nîûndû ethîrwa tûrî na meciria matarî maro, tûrî namo nîûndû wa Ngai; na ethîrwa tûrî na meciria maro, tûrî namo nîûndû wenyu.

Agal 5:23

ûvoreri na kwîrigîrîria merirîria ma kîîmwîrî. Gûtirî watho ûreganîte na maûndû ta mama.

Afil 4:8

Ngîrîkîrîria Ariû na aarî a îthe wetû, îcirieni ûvoro wîgiî maûndû marîa maro na mangîgathîrîrua: maûndû marîa ma ma, matîîku, ma kîvooto, matheru, ma kwendeka na ma ûvoreri.

1Ath 5:6

Kwoguo tûtiagîrîrwe nî kwîthîrwa tûmamîte ta andû arîa engî, twagîrîrwe twîthagîrwe twîîguîte na tûterigîtwe.

1Ath 5:8

Nwatî tûrî andû a mûthenya. Kwoguo nîtwagîrîrwe nîgwîkara twîîguîte. Twagîrîrwe nîgwîkîra wîtîkio na wendani nîguo ituîke ta ngo ya cuuma ya kûgitîra kîthûri, na tûgîe na mwîrîgîrîro wa kûvonoka ûrî ta ngovia ya cuuma twîkîrîte ya kûgitîra kîongo.

1Tim 1:10

Watho watuirwe nî ûndû wa imaramari, arûme arîa mamenyanaga kîîmwîrî na arûme arîa engî, andû arîa mendagia andû arîa engî, arîa maveenanagia na makaruta ûira wa maveeni kana andû arîa mekaga maûndû marîa mataringanîte na kîrîra kîrîa Kîam ma.

1Tim 1:14

Nake Mwathani wetû nîamonetie wega wake mwîngî na nînîmwîtîkîtie na ngamwenda nîûndû wa kûgîa na ngwatanîro na Jesû Kristû.

1Tim 1:2

nîrandîka maarûa îno kûrî we Timotheo mwana wakwa wa ma wîtîkiorî: ûrogîa na wega, ntha na thayû kuuma kûrî Ngai îthe na kûrî Mwathani wetû Jesû Kristû.

1Tim 1:5

Nîrakwatha ûguo nîguo mûrurumûkie wendo ûrîa umaga ngororî ntheru, thamirirî mbaro na wîtîkiorî wa ma.

1Tim 3:11

Aka ao nao magîrîrwe nîkwîthîrwa marî na mîtugo mîaro na matarî na ngutû. Nwa nginya methîrwe marî andû meîguîte na marî evokeku maûndûrî monthe.

1Tim 3:2

Mûtongoria wa kanitha nwa nginya ethîrwe atarî na ûcuke, nwa nginya ethîrwe avikîtie mûndûmûka ûmwe tu, mûndû wîîguîte, mûndû ûrî na ûvoti wa kwatha merirîria ma mwîrî, mûndû ûrî na mîthiîre mîaro, mûndû ûgwataga andû ûgeni gwake mûciî, mûndû ûngîvota kûthomithia.

1Tim 3:4

Nwa nginya ethîrwe arî mûndû ûvotete kûmenyerera mûciî wake waro na ûvotete gûtûma ciana ciake imwathîkîre na imûtîîe na njîra cionthe.

1Tim 3:8

Atungati a kanitha wa nao, nwa nginya methagîrwe marî na mîtugo mîaro na marî evokeku. Matiagîrîrwe nî kûnyua ndivei nyîngî kana gûkorokera mbeca.

1Tim 5:1

Ndûkagûkie mûndû mûkûrû, nwatî mwarîrie ta ûrîa ûngîarîria aguo, nao anake ûmonage ta aa mûrwanyûkwe.

Tito 1:13

Arathi maarîtie ûvoro wa ma. Kwoguo nwa nginya ûmakaanie na vinya mûno nîguo magîe na wîtîkio mûkinyanîru,

Tito 1:8

Mûtongoria wa kanitha agîrîrwe nîkwîthîrwa arî mûndû mûtugani, mûndû wendete maûndû marîa maro, mwînyitia maûndûrî, mûndû mûrûngîrîru, mûndû mûtheru na mûndû wîyathîte.

Tito 2:7

Maûndûrî monthe, nwa nginya we wîthagîrwe ûrî kîonereria Kîam mîtugo mîaro. Vîndî îrîa ûrathomithia, onanagia ûgima na wîthagîrwe ûrî na gîtîîo.

File 1:9

Nwatî vandû va ûguo nînîrakûthaitha nîûndû nîngwendete. Nie Paûlo nîreka ûguo wana ethîrwa rîu nîrî mûthuuri mûkûrû na rîu njovetwe njeera nîûndû wa Jesû Kristû.

1Pet 1:13

Kwoguo îcirieni waro îgûrû rîa ûrîa mûgeere gwîka. Îkaragani mwîîguîte na mwigîte mwîrîgîrîro wenyu wonthe kûrî kîveo Kîam Wega wa Ngai. Mûkaavewa kîveo kîu rîrîa Jesû Kristû akaaguûrua.

1Pet 4:7

Îthirîro rîa indo cionthe rîrî vakuvî. Îkaragani mwîîguîte na mwîvarîrîtie, nîguo mûvotage kûvoya.

1Pet 5:8

Îkaragani mwîîguîte na mwîvarîrîtie! Nthû yenyu, na nîke Ngoma, araûrûra akîraramaga ta mûnyambû agîcaragia mûndû wa gûcûkangia.

2Pet 1:6

ûmenyorî wenyu mwongagîrîre kwînyitia merirîria ma mwîrî, kwînyitia merirîria ma mwîrî mwongagîrîre ûmîrîru, ûmîrîrurî wenyu mwongagîrîre ûngai,