Ntha 18:11 - ÎVUKU RÎA ÛVORO MWARO

¹¹ Rîu nîmenyete atî Ngai-Mûnene nîke mûnene gûkîra ngai cionthe. Nîûndû nîwavonokirie andû ake kuuma kûrî andû aganu a Misiri.”

Ntha 18:11 ပူးပေါင်းရင်းမြစ်များ

1Atha 17:24

Nake mûndûmûka wa ndigwa nîwerire Elija atîrî, “Rîu nînetîkia atî wî mûndû wa Ngai na atî maûndû marîa Ngai-Mûnene aragia na njîra yaku nîma ma!”

2Atha 5:15

Nîwacokire marî na ndungata ciake kûrî mûrathi Elisha na akîra Elisha atîrî, “Rîu nînamenya atî gûkû nthî kuonthe gûtirî ngai îngî tiga Ngai wa Isiraeli. Kwoguo nakûthaitha wamûkîre kîveo kuuma kûrî nie.”

1Maû 16:25

Ngai-Mûnene nî mûnene na nîwagîrîrwe nî gûkumua mûno, nîwagîrîrwe nî kûvewa gîtîîo gûkîra ngai cionthe.

2Maû 2:5

Hekarû îrîa ngaatuma îkethîrwa îrî nene nîûndû Ngai wetû nî mûnene gûkîra ngai cionthe.

Nehemia 9:10

Nîwaringire ciama cia magegania cia kûregana na ûthamaki wa Misiri, atongoria ake onthe na andû onthe a vûrûri wake, nîûndû nîwamenyete ûrîa maavinyîrîrie methe metû ma tene. Nîwagîre na îgweta wata ûrîa kûrî ûmûnthî.

Nehemia 9:16

Nwatî methe metû ma tene nîmaaûmirie ciongo ciao na magîtuîka etîi, na nîmaaregire kwathîkîra maathani maku.

Nehemia 9:29

Nîwamakaanirie nîguo magarûrûkîre Watho waku. Kûnarî ûguo nîûndû wa mwîtîîo wao nîmaaregire kwathîkîra maathani maku. Nîmaareganire na mawatho maku marîa mûndû angîmathîkîra nwa atûûre mwoyo. Nîmaatuîkire aremi na makîûmia ciongo ciao, na nîmaaregire kwathîka.

Thaburi 119:21

We Ngai-Mûnene nîûgûkagia andû arîa etîi na arîa arume, acio matiganagîria maathani maku.

Thaburi 135:5

Nie nîmbicî atî Ngai-Mûnene nî mûnene, na Mwathani wetû nî mûnene gûkîra ngai cionthe.

Thaburi 31:23

Endani Ngai-Mûnene, mue andû onthe ake. Ngai-Mûnene nîagitagîra andû arîa evokeku, nwatî nîaverithagia arîa etîi wata ûrîa kwagîrîrîte.

Thaburi 95:3

Nîûndû Ngai-Mûnene, nî Ngai mûnene, na nî mûthamaki mûnene gûkîra ngai cionthe.

Thaburi 97:9

We Ngai-Mûnene, nîwe wathaga nthî yonthe; ûrî mûnene gûkîra ngai cionthe cia mîvuanano.

Ntha 1:10

Mbaara îngiumîra, andû aya nwa manyitanîre na nthû cietû magatûvoota, na nwamaûre makauma gûkû vûrûrirî. Nîtûcarie njîra îrîa îngîgiria mongerereke makîria.”

Ntha 1:16

Nîwamerire atîrî, “Vîndî îrîa mûgûtethia aka Ahibirania gûciara ûragagani kaana ethîrwa nî kavîcî, nwatî ethîrwa nî kerîtu mûkareka gatûûre.”

Ntha 1:22

Mûthiiarî mûthamaki nîwavecanire watho kûrî andû ake onthe akiuga atîrî, “Kaana wa konthe ga kavîcî gagaciaragwa nî aka a Ahibirania mûgagaikagia rûnjîrî rwa Nailo, nwatî twana tuonthe twa twîrîtu mûkareka tûtûûre.”

Ntha 10:3

Kwoguo Musa na Aroni nîmaathiîre kûrî mûthamaki wa Misiri na makîmwîra atîrî, “Ngai-Mûnene, Ngai wa Ahibirania augîte ‘Nî îvinda rîgana atîa ûgwîkara ûregete kûmwathîkîra? Tiga andû akwa mathiî nîguo makangooce.

Ntha 12:12

“Ûtukû ûcio nie nîngaavîtûkîrîra vûrûri wa Misiri na mbûrage marikithathi monthe ma njamba, ma andû wana ma nyamû, na mverithie ngai cionthe cia Misiri. Nie nî nie Ngai-Mûnene.

Ntha 14:18

Na vîndî îrîa ngaamavoota, andû a Misiri nîmakaamenya atî nie nînie Ngai-Mûnene.”

Ntha 14:8

Nake Ngai-Mûnene nîwatûmire ngoro ya mûthamaki wa Misiri yûma, na akîrûmîrîra andû a Isiraeli arîa maathiîre marî na ûmîrîru.

Ntha 15:11

Ngai-Mûnene, nî ngai îrîkû gatagatî ka ngai îkariî tawe? Nî ûrîkû wîkariî tawe, we ûrî ûthingu wa magegania? Nî ûrîkû ûngîringa ciama na ciîko cia vinya ta ciaku?

Ntha 5:2

Nake mûthamaki nîwaûririe atîrî, “Ngai-Mûnene nîke ûû, na nînîmûthikîrîria nîkî na mbîtîkîrie andû a Isiraeli mathiî? Nie ndiîcî Ngai-Mûnene ûcio na ndingîtîkîria andû a Isiraeli mathiî.”

Ntha 5:7

“Mûtigacoke kûvecaga andû rûûa rwa kûmba matuvarî, tiga andû mathiîcage gwîcarîria o ene.

Danieli 4:37

Na rîu, nie Mûthamaki Nebukadinezarû, nînîragooca, ngakumia na ngava Mûthamaki wa îgûrû riiri, nîûndû mawîra make monthe nî ma kîvooto, njîra ciake nî cia ma, na nîanyivagia arîa etîi.

Ndari 33:4

arîa maathikaga marikithathi ma anake marîa Ngai-Mûnene aaûragîte. Na njîra ya gîîko gîkî, Ngai-Mûnene nîwonanirie atî ke aarî na vinya gûkîra ngai cia Misiri.

Luka 1:51

Nî ekîte maûndû manene na njara ciake, nîanyagarûkanîtie arîa etîi wa na mîvango yao.

Jakuvu 4:6

Nwatî Ngai nîavecanaga wega mwîngî makîria, wata ûrîa mandîko matheru maugîte atî, “Ngai nîareganaga na andû arîa etîi, nwatî nîavecaga arîa enyivia wega wake.”

1Pet 5:5

Na njîra wata îo, wa namue andû ethî athîkagîrani andû arîa akûrû. Muonthe arîa mwîtîkîtie înyivanagîrieni nîguo mûtungatanagîre, nîûndû mandîko matheru maugaga atîrî, “Ngai nîareganaga na andû arîa etîi, nwatî nîendete arîa menyivagia.”

1Sam 2:3

Mûtigacoke kwaria na mwîtîîo rîngî. Tigani gwîtîîaga vîndî îrîa mûkwaria, nîûndû Ngai-Mûnene nîke Ngai ûrîa wicî maûndû, atucagîra andû onthe kûringana na ciîko ciao.