Mika 4:3 - ÎVUKU RÎA ÛVORO MWARO

³ Ngai nîagaatuithania maciira ma mavûrûri meengî, na egwithanie mavûrûri marîa marî vinya ma kûraca. Nîmagaatura mviû ciao ituîke macembe ma gûcimba, namo matumû matuîke tûviû twa gûcaa. Gûtirî vûrûri ûkaarûa na vûrûri wîngî, na gûtirî vûrûri ûkeevarîria nîûndû wa mbaara rîngî.

Mika 4:3 ပူးပေါင်းရင်းမြစ်များ

Thaburi 46:10

Augaga atîrî, “Vorerani, na mûmenye atî nînie Ngai, nînie mvetwe gîtîîo mavûrûrirî monthe, nînie ndîîtwe nthî yonthe.”

Thaburi 46:9

Nîathiragia mbaara kûndû kuonthe gûkû nthî, nîaunangaga mota, na agacûkangia matumû, na nîavîvagia ngo na mwaki.

Thaburi 72:3

Vûrûri ûrogîa na ûthiî wa na mbere, na ûgîe na maûndû ma ûthingu.

Thaburi 72:7

Ûthingu ûrothiî na mbere ûtûûrorî wake wonthe, na kûgîe na thayû tene na tene.

Thaburi 82:8

We Ngai, ûka ûtuîrîre nthî ciira; nîûndû mavûrûri monthe ma nthî nî maku.

Thaburi 96:13

îkaaina îrî mbere ya Ngai-Mûnene rîrîa agaaûka. Nîûndû agaaûka gûtuîra andû a nthî ciira. Ke agaatuîra nthî na waragania na andû a nthî na kîvooto.

Thaburi 98:9

mûrî mbere ya Ngai-Mûnene, nîûndû nîaûkîte gûtuîra nthî ciira. Ke agaatuîra andû na waragania na kîvooto.

Isaia 2:4

Ngai nîagaatuithania ciira gatagatî ka mavûrûri, na nîakeguîthania ndûrîrî nyîngî; magaatura mviû ciao cia njûra ituîke macembe ma mîraû, namo matumû mao matuîke tûviû twa gûcaa. Vûrûri ndûkaarûa na vûrûri ûrîa wîngî, kana merute kûrûa rîngî.

Isaia 25:3

Kwoguo andû arîa marî vinya nîmakaagûkumia; matûûra ma ndûrîrî irîa itarî ntha nîmagaagwîtigîra.

Isaia 51:5

Gûkûûrana gwakwa kûrî vakuvî, naguo ûvonokio wakwa nî mwambîrîriu kwoneka. Nie mwene nînie ngaatha mavûrûri; andû arîa matûûraga mavûrûrirî ma kûraca nîmambetererete, na mevokete nîmavonokie.

Isaia 60:12

Nwatî ndûrîrî kana ûthamaki ûrîa ûtagaagûtungatîra, nîkwa ikaathirua viû.

Isaia 65:25

Ciathi na ng'ondu ikaarîcaga vamwe; mînyambû îkaarîcaga nyaki ta ndegwa, nacio njoka ikaarîcaga mûthetu. Kûu kîrîmarî gîakwa kîonthe kîrîa kîtheru, gûtirî mûndû ûgaativia kana acûkangie ûrîa wîngî.”

Isaia 9:7

Wathani wake nîûkaathiî na mbere ûkînenevaga; vîndî cionthe ûkethagîrwa ûrî na thayû, na nîagaatuîka mûthamaki vuva wa Daudi. Nîakaaûrûngamia na aûmenyerere, akaathanaga na kîvooto na ûthingu, kuuma rîu nginya tene na tene. Ngai-Mûnene mwene vinya wonthe nîke ûkaavingia maûndû mama.

Danieli 2:44

Îvinda rîu rîa athamaki acio, Ngai ûrîa wî îgûrû nîakaarûngamia ûthamaki ûtakaathira. Ûthamaki ûcio ndûkaavotwa, na nîûgaacûkangia mothamaki mau mengî monthe mathire viû, ûcoke ûtûûre wathanaga tene na tene.

Hosea 2:18

Nîngarûtha kîrîkanîro na nyamû cia kîthaka, iconi cia rîerarî, vamwe na tûgunyû tûrîa tûkurumaga, na nîngathengutia ûta, rûviû, na indo cia mbaara vûrûrirî, na ndûme ûtûûre ûrî mûgitîre.

Hosea 2:20

Ta roria, na njîra ya wîvokeku nî ngakûvikia na nîûkaamenya atî nînie Ngai-Mûnene.”

Joeli 3:2

Nîngaûngania mavûrûri monthe vamwe, na nîmavire Kîamndarî gîa îtuîro. Vau nîvo ngaamatuîra, nîûndû wa maûndû marîa mekîte andû akwa. Nîmanyaganîtie Isiraeli mavûrûrirî mageni, na makagaania Isiraeli, vûrûri wakwa.

Mika 5:15

Nîûndû wa marakara makwa meengî, nîngaaverithia mavûrûri marîa mataambathîkîra.”

Zakaria 14:3

Ngai-Mûnene nîagaacoka atharîkîre ndûrîrî icio arûe nacio ta ûrîa aarûîte nacio mbere.

Zakaria 8:20

Ngai-Mûnene mwene vinya wonthe augîte atîrî, “Andû kuuma mavûrûrirî na matûûrarî meengî nîmagaaûka Jerusalemu.

Zakaria 9:10

Ngai mûnene nîakaathengutia ikaari cia mbaara ciume Efiraimu, na athengutie mbarathi cia mbaara ciume Jerusalemu, naguo ûta ûrîa ûvûthagîrwa vîndî ya mbaara nîûkaaunangwa. Mûthamaki nîagaatûma ndûrîrî igîe na thayû, wathani wake ûkaauma îriarî kûthiî nginya îriarî, na kuuma rûnjîrî nginya mîthiia ya nthî.

Ciîko 17:31

nîûndû nîatuîte mûthenya ûrîa agaatuîra andû onthe a nthî arî na kîvooto. Ke ageeka ûguo na njîra ya mûndû ûrîa athuurîte, na nîwonetie andû onthe atî ûvoro ûcio nî wa ma na njîra ya kûriûkia mûndû ûcio!”

Kûguû 19:11

Nînacokire ngîona îgûrû rîvingûkîte na kûrî na mbarathi ya rangi njerû. Ûrîa wathiîte amîkarîrîte etagwa Mwîvokeku na wa Ma. Na ûrîa atucanagîra ciira na akarûa mbaara na njîra ya kîvooto.

1Sam 2:10

Ngai-Mûnene nîagacûkangia nthû ciake, nîakaairiva na mûgambo ta wa ngwa arî îgûrû. Ngai-Mûnene nîagaacirithia andû onthe a nthî, na ave mûthamaki ûrîa ke athuurîte ûvoti, amûve vinya wa kûvootana.”