Malaki 2:9 - ÎVUKU RÎA ÛVORO MWARO

⁹ Kwoguo nîndûmîte mûnyararwe na mwagithue kîene mbere ya andû onthe a Isiraeli nîûndû mûtiarûmîrîra njîra ciakwa, nwatî mwîthîrîtwe mûkîthomithia watho na njîra ya kîmenyano.”

Malaki 2:9 ပူးပေါင်းရင်းမြစ်များ

1Atha 22:28

Mikaia nîwerire Ahabu atîrî, “Wona wacoka wîna thayû, Ngai-Mûnene ndanaria na njîra yakwa.” Nîwacokire akiuga atîrî, “Mue andû aya muonthe mûtikariganîrwe nî ûguo nauga!”

Ayubu 32:21

Nie ndikonania kîmenyano kûrî mûndû wanarî ûrîkû, kana nyûrûria mûndû.

Nthi 10:7

Andû nîmakenaga makîririkana mûndû ûrîa ûkuîte arî mûthingu, nwatî mûndû ûrîa mûcûku akua nîariganagîra.

Nthi 12:8

Mûndû mûûgî nîakumagua nî andû arîa engî, nwatî mûndû kîrimû nîkwa anyararagwa.

Ezek 13:21

Wana nîngatembûranga itambaa cia gwîkunîkîra, na mvonokie andû akwa kuuma njararî cienyu na matigacoka gûtuîka ta nyamû cia kûguîmwa nîmue rîngî na nîmûkaamenya atî, nie nînie Ngai-Mûnene.

Ezek 7:26

Maûndû macûku magaaûka marûmanîrîrîte. Ndûmîrîri cia maûndû macûku igaaûkaga irûmanîrîrîte. Nîmagaacaragia kîoneki kuuma kûrî arathi. Athînjîri-Ngai nîmagaatura ûndû wa kûthomithania, nao athuuri matikethîrwa marî na kîrîra.

Mika 3:11

Atucanîri ciira marutaga wîra wao nîguo mavewe îvaki, athînjîri-Ngai mathomithagia watho nîguo marîvwe, nao arathi mataûraga cioneki nîguo mavewe mbeca. Kûnarî ûguo nîmetîîaga megiritanîtie na Ngai-Mûnene makiugaga atîrî, “Ngai-Mûnene arî vamwe natue, na gûtirî ûndû mûcûku ûngîtûnyita!”

Nahumu 3:6

Nîngûgwikîria gîko, na ngwîke maûndû ma kînyûrûri, ngûtue kîndû gîcûku gîa kwîroragîrwa nî andû.

Malaki 2:3

Taroria, nîngaaverithia ciana cienyu, na nîûndû wa waganu wenyu, nîmûvake mothiû menyu mai ma nyamû irîa mûrutîte irî îtega kûrî nie. Nîngaacoka nîmwîngate ndige kûmwona.

Malaki 2:8

“Nwatî mue athînjîri-Ngai nîmûtiganîrîtie njîra ya ma. Maûndû marîa mûthomithanagia nîmatûmîte andû eengî mavîngwe. Nîmunîte kîrîkanîro kîrîa narîkanîre na Lawi.

Luka 10:29

Nwatî mwarimû ûcio wa watho nîwendaga kwîyarîrîria, kwoguo nîwaûririe Jesû atîrî, “Mûndû ûrîa tûtûûranîrîte nake nî ûrîkû?”

Luka 11:42

“Kaî mue Afarisai mûrî na thîna-î! Nîûndû mue mûrutagîra Ngai gîcunjî gîa îkûmi Kîam manyenyi ta ma rwoga, karîmî ka nthiia na nderamûkîa, nwatî mûgatiganîria ûthingu wa vamwe na kwenda Ngai. Maûndû mama mwagîrîrwe mûmekage mûtagûtiganîria marîa mengî.

Agal 2:6

Nwatî andû arîa moonekaga ta o atongoria gatagatîrî ka etîkia matianyongerera ûndû mûgeni. (Nîrauga ûguo nîûndû ndiramaka wana ethîrwa maarî atongoria kana mataarî, Ngai ndarî kîmenyano.)

Gûco 1:17

Mûtikathurûkanagie andû rîrîa mûkûmatuîra ciira. Thikagîrîriani ciira wa itonga na athîni ûndû ûmwe. Mûtigetigagîre mûndû, nîûndû îtua rîenyu nîrîo îtua rîa Ngai. Ciira ûrîa mûkaaremagwa nî gûtuithania, mûkaandetagîre ngaûtuithania.’

1Sam 2:30

Kwoguo nie Ngai-Mûnene, Ngai wa Isiraeli nînerîrîte andû a mûciî waku wana andû a mûvîrîga waku, atî makandungatagîra marî athînjîri-Ngai vîndî cionthe. Nwatî rîu nîrauga atî ûndû ûcio ndingîtîkîria ûthiî na mbere rîngî. Vandû va ûguo, nie ngatîîaga andû arîa mandîaga, nao arîa manyararaga ngaamatucaga ta andû matarî na vata.