Johana 13:8 - ÎVUKU RÎA ÛVORO MWARO

⁸ Nake Petero nîwaugire atîrî, “We ndûngînthambia magûrû!” Nake Jesû nîwamûcokerie atîrî, “Ethîrwa tîngûthambia magûrû, ndûgûcoka gûtuîka mûrutwa wakwa.”

Johana 13:8 ပူးပေါင်းရင်းမြစ်များ

Kîam 42:38

Nwatî Jakovu nîwaugire atîrî, “Tîmûthiî na mûvîcîwa, nîûndû mûrwang'ina nîwakwire. Benjamini nîke tu ndigîrîtwe. Avota kwona mûtino rûgendorî rûu mûthiîte na nwa ngue nîûndû wa kîeva na nî mûrona nîrî mûkûrû.”

2Sam 20:1

Kûu Giligali kwarî na mûndû warî kîmaramari wetagwa Sheba. Sheba aarî mûvîcî wa Bikiri wa kuuma mûvîrîga wa Benjamini. Sheba nîwavuvire karumbeta na akiuga atîrî, “Tue tûtikwenda Daudi! Tûtikûmûrûmîrîra! Andû a Isiraeli nîtwînûkeni wa mûndû gwake mûciî!”

1Atha 12:16

Rîrîa andû onthe a Isiraeli moonire atî mûthamaki ndaramathikîrîria, nîmaaugîrîrie atîrî, “Gûtirî kîndû tûrenda kuuma kûrî Daudi? Tûtirî na îgai kuuma kûrî mûvîcî wa Jesse. Andû a Isiraeli, twînûkeni! Daudi gitîra nyomba yaku we mwene!” Kwoguo Aisiraeli nîmeenûkire magemarî mao.

Thaburi 51:2

Nthambia waganu wakwa wonthe, ûnthambie mevia makwa!

Thaburi 51:7

Ntheria, na nî ngûthera; nthambia, na nî ngûcerûva gîkîra îra.

Isaia 4:4

Mwathani nîagaatuîra andû a Zayuni na atherie mevia ma Jerusalemu na nthakame îrîa îtûrûrîtwe kuo.

Ezek 36:25

Nîngaacoka nîmûminjaminjîrie manjî matheru, na nîmûkathera. Nîngaamûtheria kuuma kûrî maûndû monthe macûku na kuuma kûrî mîvuanano yonthe.

Zakaria 13:1

Ngai-Mûnene augîte atîrî, “Vîndî îrîa kavinda kau gagaakinya, karûnjî nîgakaavingûrwa ga kûthambia nyomba ya Daudi na andû arîa matûûraga Jerusalemu mevia mao na maûndû mao marîa macûku.

Mathaayo 16:22

Nake Petero nîwetire Jesû. Na maathiî ndundu, nîwambîrîrie kûmûkaania akîmwîraga atîrî, “Mwathani, ûguo gûtingîvotekeka kûrî we.”

Mathaayo 21:29

Nake nîwamûcokerie atîrî, ‘Tînthiî.’ Nwatî vuvarî nîwericûkirwe na akîthiî.

Mathaayo 26:33

Nake Petero nîwerire Jesû atîrî, “Wana arîa engî onthe mangîgagûtiganîria, nie ndigaagûtiganîria!”

Mathaayo 26:35

Nake Petero nîwamûcokerie atîrî, “Nie ndigaagûkaana wana ethîrwa nîkwa ngûraganîrua vamwe nawe!” Nao arutwa acio engî onthe nîmaaugire wa guo.

Johana 13:6

Nake Simoni Petero akinyîrîrwa nîwaûririe Jesû atîrî, “Mwathani, ûrenda kûnthambia magûrû?”

Johana 13:9

Nake Petero nîwamwîrire atîrî, “Mwathani, ndûkanthambie magûrû monga, nthambia wana njara na kîongo!”

Johana 3:5

Nake Jesû nîwamûcokerie atîrî, “Nîrakwîra na ma atî gûtirî mûndû ûngîtonya Ûthamakirî wa Ngai atambîte gûciarwa rîngî na manjî na Roho Mûtheru.

Ciîko 22:16

Na rîu wetererete Ndûî? Ûkîra ûvoe Ngai, ûvatithue na nîûkwoverwa mevia maku.’

1Akor 6:11

Andû amwe gatagatîrî kenyu methagîrwa mekariî ûguo, nwatî mue nîmwathambirue mûkiuma meviarî. Mûrî atherie na mûgatuwa agîrîru na njîra ya Mwathani Jesû Kristû na njîra ya Roho wa Ngai wetû.

Aefeso 5:26

Eekire ûguo nîguo awamûrîre Ngai na njîra ya kiugo gîake. Nîwatheririe kanitha na njîra ya kûûthambia na manjî.

Gûco 12:12

Nîmûgaakena mûrî mbere ya Ngai-Mûnene Ngai wenyu, mue, ciana cienyu, ndungata cienyu cia arûme na cia aka, na Mûlawi ûrîa ûrî îtûûrarî rîenyu, nîûndû tîmûgaîre kûndû gwa gûtûûra ta mue.

Akol 2:18

Mûtigetîkîre gûtuîrwa nî mûndû wa wonthe ûrîa wendaga kwînenevia akiugaga atî ke nîwonaga cioneki, na wendaga kwîyonania ûrîa arî mwînyivia na ûrîa agoocaga araika. Mûndû ta ûcio etîîaga atarî na gîtûmi nîûndû wa meciria make ma ûmûndû,

Akol 2:23

Mawatho mau monanagia ta marî na ûûgî nîûndû wa mîvoere îrîa maringagîrîria andû kûvoya nayo, wînyivia wa maveeni na kûverithia mwîrî. Nwatî matitethagia kûgirîrîria merirîria macûku ma mwîrî.

Tito 3:5

nîwatûvonokirie. Tûtiavonokirue nîûndû wa ûrîa twekîte ciîko mbaro, nwatî nîûndû wa ntha ciake. Aatûvonokirie na njîra ya Roho Mûtheru ûrîa watûtheririe, agîtûciara rîngî na agîtûva mwoyo mûcerû.

Ahib 10:22

Kwoguo nîtûthiîni vakuvî na Ngai tûrî na ûvoro wa ma ngororî cietû, wîtîkio wa ma na tûrî na ngoro ntheru na thamiri cietû itagwîcuka na mîîrî yetû îthambîtue na manjî matheru.

Kûguû 1:5

wana kuuma kûrî Jesû Kristû, Mûira ûrîa mwîvokeku, ûrîa wa mbere kûriûka na nwake Mwathi wa athamaki a nthî. Ke nîatwendete, na nîwatûkûûrire kuuma meviarî na nthakame yake

Kûguû 7:14

Nanie nînamûcokerie atîrî, “Mwathani, nie ndiîcî, we nîwe wîcî.” Nake nîwambîrire atîrî, “Andû aya nîo marîkîtie kûvîtûkîra mathînarî meengî. Nao nîmathambîtie nguo ciao na nthakame ya Gatûrûme igatuîka cia rangi njerû.