Jeremia 50:2 - ÎVUKU RÎA ÛVORO MWARO

² “Anîrîrani mavûrûrirî, îkîrani imenyithia na mwanîrîre, mûtikathithe wanarî ûndû; ugani atî: ‘Îtûûra rîa Babuloni nîrînyite! Beli ngai yarîo nînjonorithie, Merodaki ngai yarîo nîmbagagu; Mîvuanano ya ngai cia Babuloni nîmîconorithie.’

Jeremia 50:2 ပူးပေါင်းရင်းမြစ်များ

Thaburi 64:9

Andû onthe nîmagetigîra; nîmakerana maûndû marîa Ngai ekîte, na mecirie ûvoro wîgiî ciîko ciake.

Thaburi 96:3

Anîrîrani riiri wake mavûrûrirî, îrani andû onthe maûndû ma magegania marîa ekîte.

Thaburi 97:7

Andû onthe arîa magoocaga mîvuanano nî maconorithagua, arîa metîîaga na ngai cia maveeni; ngai cionthe ciînamagîrîria nthî ikagooca Ngai-Mûnene.

Isaia 12:4

Mûthenya ûcio nîmûkaaina atîrî, “Cokeriani Ngai-Mûnene ngatho! Mûvoeni mûkîgwetaga rîîtwa rîake. Menyithiani mavûrûri maûndû marîa ekîte, na mwanîrîre atî rîîtwa rîake nî rînene.

Isaia 13:2

Ngai augîte atîrî, “Vandani vendera îgûrû rîa kîrîma gîtarî na mîtî, ugîrîriani mwîte athigari, na mûmavenerie na njara, nîguo matonyere kîvingo gîa îtûûra rîa andû arîa marî îgweta.

Isaia 21:9

Taroria maûkîte matwîte mbarathi, na marî aîrî kwa aîrî. Mûrangîri ûcio nîwacokire akiuga atîrî, “Babuloni nîngwîu! Mîvuanano yonthe ya ngai ciakuo nîmiunange na îkagwîthua nthî.”

Isaia 37:19

na magaikia ngai ciao mwakirî nîûndû itiarî ngai cia ma, nwatî ciarî mîvuanano yaumîtue nî andû ya mîtî na ya mathiga; kwoguo nîciacûkangirue.

Isaia 39:1

Vîndî îo, Merodaki-baladani, mûthamaki wa Babuloni ûrîa warî mûvîcî wa Baladani, nîwatûmire anjaama mavirîre Hezekia maarûa na kîveo rîrîa egwire atî aarî mûrwaru na nîwavonete.

Isaia 46:1

“Beli nîînamîrîrîte, Nebo nî ngwîu nthî; mîvuanano ya ngai icio îkuuîtwe nî nyamû na ng'ombe, indo ino ititikithîtue mvunda, nî mîrigo îrî mîrukuthurî ya nyamû icio nogu.

Isaia 48:20

Umani Babuloni, ûrani mume kûrî Akalidei! Anîrîrani ûndû ûyû mûkenete, ûmenyithanieni mîthiiarî yonthe ya nthî: ugani atîrî, “Ngai-Mûnene nîavonoketie ndungata yake Jakovu!”

Isaia 48:6

“Maûndû marîa wegwire, rîu nîûramona monthe; ûrarega kûmetîkia nîkî? Kuuma rîu ngaakwonagia maûndû macerû, maûndû mathithe marîa ûtaicî.

Jeremia 10:11

Kwoguo nîmûkaamera atî: “ngai irîa itaûmba nthî na îgûrû nîikaathira cionthe gûkû nthî.”

Jeremia 10:15

Ngai icio nî cia mana na nî cia kînyarari; vîndî îrîa ikaverithua nî ikathirua.

Jeremia 31:10

Mue mavûrûri, tathikîrîriani kiugo Kîam Ngai-Mûnene, na mûkîanîrîre mavûrûrirî marîa marî kûraca, mûmeere atî: ‘Ûrîa wanyaganirie andû a Isiraeli, nîakaamacokanîrîria, akamamenyerera ta ûrîa mûrîthi amenyagîrîra ng'ondu ciake.’

Jeremia 4:16

Ûrera mavûrûri na ûkanîrîra Jerusalemu atî: “Atharîkîri maumîte vûrûrirî wa kûraca, makiugagîrîria ûrîa makûtharîkîra matûûra ma Juda.

Jeremia 4:6

Igani kîmenyithia njîrarî ya Zayuni! Vinyûrani mwîgitîre! Mûtigacererwe! Ngai-Mûnene nîakûrete mûthiro kuuma mwena wa rûgûrû, na gûcûkangua kûnene.

Jeremia 46:14

“Anîrîra vûrûrirî wa Misiri, na ûmenyithanie kûu Migidoli, anîrîra kûu Memufisi na Tahipanesi. Meere atî: ‘Îkarani mwîvarîrîtie, nîûndû mbaara nîgaacûkangia kûndû kuonthe.’

Jeremia 50:46

Rîrîa Babuloni îgatavwa, nthî yonthe nîîkathingitha na kîrîro gîake nîgîkeguwa nî mavûrûri marîa mengî.”

Jeremia 51:12

Vecanani kîmenyithia Kîam mbaara, nthingo cia Babuloni itharîkîrwe. Ongererani athigari a kûrîrangîra, vangani arangîri, athigari a kûtharîkîra nîmethithe. Ngai-Mûnene nîavangîte na ageka ûrîa aaugire wîgiî atûûri a Babuloni.

Jeremia 51:27

“Vandani vendera ya mbaara gûkû nthî, vuvani karumbeta mavûrûrirî; varîriani mavûrûri nîguo marûe mbaara nake. Îtani mothamaki ma Ararati, Mini na Ashikenazi maûke maûtharîkîre. Thuurani njamba ya kûrûa nake; rîretereni mbarathi ta ikundi cia ngige.

Jeremia 51:31

Anjaama maumanaga vuva mavinyûrîte, makamenyithie mûthamaki wa Babuloni, atî îtûûra rîake nîrîgwate rîonthe.

Jeremia 51:44

Nîngaverithia Beli ngai ya Babuloni, na ndûme îrute kîrîa îmeretie; mavûrûri matikaathiî kûrî ke rîngî. Rûthingo rwa Babuloni nîrwomomoku.

Jeremia 51:47

Kwoguo îvinda nîrîgûkinya, rîrîa ngananga mîvuanano ya Babuloni, vûrûri wa Babuloni wonthe ûconorithue, nao andû onthe a Babuloni maûragîrwe vûrûrirî wao.

Jeremia 51:52

Kwoguo nie Ngai-Mûnene nîrauga atîrî, “Kavinda nîgagûkinya rîrîa ngacûkangia mîvuanano ya Babuloni, naguo vûrûri wonthe wîcûre mûcao wa andû arîa mativangîtue.

Jeremia 51:8

Babuloni nîûgwîte wa rîmwe na ûkavootwa; ûcakaîreni! Carîriani ironda ciaguo ndawa, nwa kwîthîrwa nîûkûvona.

Jeremia 52:31

Mwaka wa mîrongo îthatû na mûgwanja, tarîki mîrongo îîrî na ithano mweri wa îkûmi na îîrî, Jehoiakini arî mûthamaki wa Juda, Evilimerodaki nîwatuîkire mûthamaki wa Babuloni. Mwaka wa ûcio nîweguîrîre Jehoiakini ntha na akîmûrekereria akiuma njera.

Jeremia 6:18

Kwoguo, thikîrîriani mue mavûrûri, na mûmenye ûndû ûrîa gûgekîka kûrî andû akwa.

Danieli 1:2

Nake Mwathani nîwarekererie Jehoiakimu anyitwe nî Nebukadinezarû. Nebukadinezarû nîwocire indo imwe irîa ciarî hekarûrî ya Ngai. Mûthamaki Nebukadinezarû nîwacokire Babuloni vamwe na mîgwate na nîwaigire indo icio hekarûrî ya ngai ciake.

Danieli 3:14

Nake nîwamerire atîrî, “Nî ûvoro wa ma atî, mue Shadiraka, Mîsheki na Abendinego, nîmûregete kûgooca ngai ciakwa na kwînamîrîra mûvuanano wa thaavu ûrîa naarûthithirie?

Zefania 2:11

Ngai-Mûnene akethîrwa arî wa kûmakania kûrî o, agaatua ngai cia nthî ta îtarî kîndû. Mavûrûri monthe ma nthî nîmakaamûtîîa, wa vûrûri ûrî vandû va guo.

Kûguû 18:2

Nake nîwaugîrîrie na mûgambo mûnene atîrî: “Nî rîgwîte, Babuloni îtûûra rîrîa rînene nî rîgwîte! Nî rîtuîkîte gîîkaro Kîam ndaimono na îkurungu rîa roho mûcûku, na iconi cionthe njûku na irî mûgiro itûûraga kuo.