Jeremia 23:5 - ÎVUKU RÎA ÛVORO MWARO

⁵ “Taroria, îvinda nîrîgakinya, rîrîa ngaathuura mûndû mûthingu wa rûciaro rwa Daudi atuîke mûthamaki, nake nîakaathana ecûrîtwe nî ûûgî. Nîakoonania kîvooto na waragania vûrûrirî wonthe.

Jeremia 23:5 ပူးပေါင်းရင်းမြစ်များ

2Sam 23:3

Ngai wa Isiraeli nîwaririe; Ke ûrîa Mûgitîri wa Isiraeli ambîrire atîrî, “Mûthamaki ûrîa wathanaga na kîvooto, ûrîa wathanaga etigîrîte Ngai,

Thaburi 45:4

Thiî ûrî ûnene na nîûkûvootana, ûgitîre ûûma na kîvooto, vinya waku nîûgûkûvotithia kûvootana!

Thaburi 80:15

Ûka ûvonokie mûthavibu ûrîa we wavandire, mûthavibu ûcio we watûmire ûkûre.

Thaburi 99:4

We mûthamaki mwene Vinya Wonthe, mwendi ûthingu; Nîwonanîtie kîvooto Isiraeli; nîwonanîtie ûthingu na waragania.

Isaia 33:5

Ngai-Mûnene nî mûnene, ke atûûraga îgûrû; nîagecûria Zayuni na kîvooto na ûthingu.

Isaia 4:2

Mûthenya ûcio, rûvûa rûrîa Ngai-Mûnene agaatûma rûmere rûkethîrwa rûrî rûthaka na rûrî na riiri. Namo maciaro ma nthî nîmakaaguna na makenagie andû a Isiraeli arîa matigarîte.

Isaia 42:6

Nînie Ngai-Mûnene ngwîtîte wîke maûndû na kîvooto, nîngûnyitîte njara na ngakûgitîra. Na njîra yaku nîndûthîte kîrîkanîro na andû onthe, we ûgaatuîka ûtheri wa mavûrûri.

Isaia 45:24

“Vîndî îo nîgûkeerwa îgûrû rîakwa atî: Ûthingu na vinya cionekaga kûrî Ngai-Mûnene; andû arîa onthe maamûrakarîrîte, nîmagaaûka kûrî ke na maconoke.”

Isaia 52:13

Ngai-Mûnene arauga atîrî, “Ndungata yakwa nîkaathatûkwa wîrarî wayo, nîkaanenevua, yambararue na nîkaavewa gîtîîo mûno.

Isaia 53:10

Ngai-Mûnene nîke wonire arî waro amûtivie, na atûme egue kîeva. Nîwarutire mwoyo ûtuîke îgongoona rîa kûtheria mevia, nîakoona rûciaro rwake, nîagaatûûra ûtûûro mûraca, na nîke ûkaavingia wendi wa Ngai-Mûnene.

Isaia 53:2

Nîûndû ndungata îo yake yakûrire îrî mbere yake ta mûtî mwîthî, ta mûri ûrî nthî îno nyûmagaru. Ndîarî na mûmbîre kana ûndû ûngîatûmire tûmîende, na ndîarî na ûthaka ûrîa ûngîatûmire tûmîrirîrie.

Isaia 9:5

Iratû cionthe cia athigari a mbaara arîa maatharîkagîra, na nguo ciao cionthe irîa irî na maroro ma nthakame, nîikaavîvua ta ngû.

Isaia 9:6

Nîûndû nîtûciarîrîtwe kaana. Nîtûvetwe kaana ga kavîcî. Na nîkavetwe vinya wa kwathana. Gageetwa, “Mûtaarani wa Magegania, Ngai mwene vinya wonthe, Vava wa Tene na tene, Mûthamaki wa Thayû.”

Isaia 9:7

Wathani wake nîûkaathiî na mbere ûkînenevaga; vîndî cionthe ûkethagîrwa ûrî na thayû, na nîagaatuîka mûthamaki vuva wa Daudi. Nîakaaûrûngamia na aûmenyerere, akaathanaga na kîvooto na ûthingu, kuuma rîu nginya tene na tene. Ngai-Mûnene mwene vinya wonthe nîke ûkaavingia maûndû mama.

Jeremia 22:15

Ûreciria we wî mûthamaki nîguo ûcindane na gûtuma nyomba na mîtarakwe? Aguo nîwarîre na akînyua, na akîonania kîvooto na ûthingu, na maûndû make maarî maro.

Jeremia 22:3

Nie Ngai-Mûnene nîramwatha mwîkage maûndû ma kîvooto na ma ûthingu. Mûvonokie andû onthe arîa macunîtwe indo ciao kuuma kûrî arîa mamavinyagîrîria. Mûtigeke ûndû mûcûku kana mûnyamaria ageni, ciana irîa itarî methe, mûndûmûka wa ndigwa kana mûrage mûndû ûtarî na wîvia vandû ava.

Jeremia 22:30

Ngai-Mûnene arauga atîrî, “Andîka mûndû ûyû atî ndarî ciana, mûndû ûtakagacîra ûtûûrorî wake, nîûndû gûtirî mûndû wanarî ûmwe wa rûciaro rwake, ûgekarîra gîtî Kîam ûthamaki Kîam Daudi, na athane rîngî vûrûrirî wa Juda.”

Jeremia 23:6

Îvindarî rîake andû a Juda nîmakavonokua, nao andû a Isiraeli matûûre marî na thayû. Agetagwa, ‘Ngai-Mûnene nîke ûthingu wetû.’

Jeremia 29:11

Nîûndû, nie Ngai-Mûnene nîmbîcî mîvango îrîa nîrî nayo kûrî mue, mîvango ya maûndû maro na tî maûndû macûku nîguo mûtûûrîre wenyu wa vîndî îrîa îgaûka wîthîrwe ûrî na kîîrîgîrîro.

Jeremia 30:3

Nîûndû îvinda nîrîgûkinya rîrîa ngatûma andû akwa a Isiraeli na a Juda arîa matwîre marî atave, magîe na mûtûûrîre mwaro na nîmacokie rîngî vûrûrirî ûrîa naveere methe mao mawîgwatîre ûtuîke wao. Nie Ngai-Mûnene nînie nauga ûguo.”

Jeremia 30:9

Nwatî nîmakaandungatîra nie Ngai-Mûnene Ngai wao, na matungatîre ûmwe wa njiarwa cia mûthamaki Daudi, ûrîa ngamathuurîra atuîke mûthamaki.

Jeremia 31:27

Ngai-Mûnene arauga atîrî, “Îvinda nîrîgakinya rîrîa ngecûria vûrûri wa Isiraeli na wa Juda andû na nyamû.

Ezek 21:27

Nîngûcûkangia îtûûra rîu viû na rîtigacoka kwonwa rîngî. Nwatî ndigwîka ûguo nginya agaûka ûrîa mwagîrîru nîrînenganîre kûrî ke.

Ezek 34:16

“Ng'ondu irîa ciûrîte nîngaaicaria, na irîa inyaganîtie nîngaaicokanîrîria vamwe. Irîa ikûthua nîngaaciova na mbîkîre vinya irîa itarî na vinya. Nwatî irîa noru na irî na vinya nîngaaicûkangia nîûndû nie ndîthagia na kîvooto.

Ezek 34:29

Nîngaaiva mîgûnda mîaro îgûkûra irio nîguo itigaacoke kûgîa na yûra vûrûrirî ûcio, na itigaacoka kûthekererwa nî ndûrîrî rîngî.

Ezek 45:8

Gîcunjî kîu gîgaatuîka îgai rîa mûnene ûrîa ûrathana vûrûrirî wa Isiraeli nîguo ndakavinyîrîrie andû akwa, nwatî areke andû magaîrwe vûrûri ûcio wîngî kûringana na mîvîrîga ya Isiraeli.”

Danieli 9:24

“ ‘Mîaka mûgwanja maita mîrongo mûgwanja, nî îvinda rîrîa Ngai amûrîte rîa kûthiria waganu, mevia; kwovera andû arîa mekîte maûndû macûku, kûrete thayû wa tene na tene, gwîtîkîra cioneki na ûrathi, na kûvaka vandû varîa vatheru Mûno maguta.

Hosea 1:11

Andû a Juda na Isiraeli nîmakaagomana vamwe na nîmakathuura mûtongoria wao ûmwe; nao nîmakoongereka kûu vûrûrirî wao. Mûthenya ûcio ûkethîrwa ûrî mûnene kûrî Jezireeli.

Hosea 3:5

Vuvarî, andû a Isiraeli nîmagacoka macarie Ngai-Mûnene Ngai wao na macarie mûthamaki wao wa rûciaro rwa Daudi. Nîmagacoka magoce Ngai-Mûnene Ngai wao na kwîvoka wega wake mavinda ma mûthiia.

Amosi 9:11

Mûthenya ûcio nîngaarûngamia ûthamaki wa Daudi ûrîa wagwîre. Nîngaatuma rîngî nthingo ciaguo irîa ciarî nyomomoku, ciîkare ta ûrîa ciekariî mbere.

Mika 5:3

Kwoguo Ngai-Mûnene nîagaatiganîria andû ake, nginya rîrîa mûndûmûka ûrîa ûrî îvu agaaciara kavîcî. Nao andû ao arîa marî îthamîriorî nîmagaacokanîrîra rîngî na andû a Isiraeli.

Zakaria 3:8

Tathikîrîria waro, we Joshua Mûthînjîri-Ngai mûnene. Wa namue athînjîri-Ngai arîa mûtungataga vamwe nake tathikîrîriani. Mue oni a maûndû ma mavinda marîa magaaûka tathikîrîriani. Nîngûreta ndungata yakwa îrîa îtagwa Rûvûa.

Zakaria 9:9

Mue andû a Zayuni kenani mûno; Mue andû a Jerusalemu ugîrîriani na vinya. Taroriani, mûthamaki wenyu nîaûkîte kûrî mue, aûkîte akenete na arî na ûvootani. Nî mwînyivia na akuuîtwe nî mvunda, akuuîtwe nî njaû ya mvunda.

Mathaayo 2:2

na makîûria andû atîrî, “Mwana ûrîa ûciarîtwe nîguo agaatuîka mûthamaki wa Ayahudi arî kû? Tue nîtûmenyithirue ûvoro wa gûciarwa gwake nî njata yumîte mwena wa îrathîro, na rîu twaûka kûmûgooca.”

Johana 1:45

Nake Filipu nîwonire Nathanieli na akîmwîra atîrî, “Tue nîtwona mûndû ûrîa ûvoro wake wandîkîtwe nî Musa îvukuurî rîa Watho na ûgacoka ûkandîkwa nî arathi. Ke nîke Jesû mûriû wa Josefu wa kuuma îtûûrarî rîa Nazarethi.”

Johana 1:49

Nathanieli nîwacokerie Jesû atîrî, “Mwarimû, we nîwe Mûriû wa Ngai! Nîwe Mûthamaki wa Isiraeli”

1Akor 1:30

Nwatî Ngai nîke kiumo Kîam ûûrûmwe wenyu na Jesû Kristû. Na njîra ya Kristû Ngai nîatûvecaga ûûgî na agatûtua athingu. Natue nîtûtuîkaga andû a Ngai na tûgakûrwa kuuma meviarî metû.

Ahib 8:8

Nwatî Ngai nîwonaga andû ake marî na mavîtia rîrîa akûmeera atîrî, “Mwathani arauga atî mîthenya nîgûkinya, rîrîa ngaathondeka kîrîkanîro gîcerû na andû a Isiraeli vamwe na andû a Juda.

Kûguû 19:11

Nînacokire ngîona îgûrû rîvingûkîte na kûrî na mbarathi ya rangi njerû. Ûrîa wathiîte amîkarîrîte etagwa Mwîvokeku na wa Ma. Na ûrîa atucanagîra ciira na akarûa mbaara na njîra ya kîvooto.