Jeremia 21:7 - ÎVUKU RÎA ÛVORO MWARO

⁷ Nie Ngai-Mûnene nîrauga atî vuva wa ûguo, nîngaavecana Zedekia mûthamaki wa Juda, ndungata ciake, na andû a îtûûra rîîrî, arîa magatigarua nî mîrimû, mbaara na yûra kûrî mûthamaki Nebukadinezarû wa Babuloni na nthû cienyu irîa ciendaga kûmûraga. Nebukadinezarû akamaûraga na rûviû na gûtirî mûndû ûgaatigara kana arekererue wana kana eguîrwa ntha.”

Jeremia 21:7 ပူးပေါင်းရင်းမြစ်များ

Isaia 27:11

Mvûa cia mîtî ya kuo nî nyûmû na ikaunîkanga, nao aka nîmathiîcaga kuna ngû cia mîtî îo. Andû aya a Isiraeli nî aritu. Kwoguo Ngai, ûrîa wamaûmbire ndakaameguîra ntha, ke ûrîa mûmaûmbi ndakaamatuga.

Isaia 47:6

Nînaarakarire nî andû akwa, ngîtûma andû arîa akwa manyitwe nî mûgiro. Nînamanenganîre kûrî we, nwatî we ndwameguîra ntha; wana arîa akûrû nîwamakinyîrîrie mûno.

Jeremia 13:14

Nîngamaringithania mûndû na mûndû ûrîa wîngî, methe nîaringithanie na avîcî ao. Ndikamakirîrîria, ndikamarekia, ndikameguîra ntha, nwatî nîngamacûkangia.”

Jeremia 14:12

Wana ethîrwa nîmarenyerekia, nie ndikegua mathaithana mao, na wana ethîrwa nîmarandutîra matega ma kûvîvua, na ma irio cia mûgûnda; ndikamamûkîra. Îthenya rîa ûguo, nîkwa ngamaûraga mathire na njîra ya mbaara, yûra na mîrimû.”

Jeremia 15:5

“Nîûrîkû ûgakwîguîra ntha we Jerusalemu? Nîûrîkû ûgagûcakaîra? Nîûrîkû ûkarûngama aûrie ûvoro wa wagîrîru wenyu?

Jeremia 15:9

Mûndûmûka ûrîa warî na îgweta rîa kwîthîrwa na twana mûgwanja, rîu nîtûrathirire tuonthe wa rîmwe, nî araikirie nthari, riûa rîake rîrathûire kûrî mûthenya. Nîatuîkîte wa gûconorithua na kûnyararwa, nao arîa maatigarire matarî akuû, nîngamatiganîria maûragwe nî nthû ciao. Ûguo nîguo nie Ngai-Mûnene nîrauga.”

Jeremia 19:7

Vandû ava nîvo ngaacûkangîria mîvango yonthe ya andû a Juda na Jerusalemu. Nîngatûma mavootwe nî nthû ciao marî mbaararî na imaûrage. Nîngatûma ciimba ciao irîwe nî iconi na nyamû cia kîthaka.

Jeremia 20:4

Nîûndû Ngai-Mûnene arauga atîrî, ‘Ta roria nîngatûma ûtuîke kiumo Kîam guoya kûrî we mwene na kûrî arata aku onthe. O nîmakaûragîrwa mbaararî nî nthû ciao ûkîonaga. Nîngavecana vûrûri wonthe wa Juda kûrî mûthamaki wa Babuloni. Nake nîakamoca amavire Babuloni marî mîgwate na nîakamaûraga.

Jeremia 22:25

Ngûvecane kûrî andû arîa mendaga gûkûûraga arîa wîtigîrîte, na ngûrekererie kûrî Nebukadinezarû mûthamaki wa Babuloni na kûrî Akalidei.

Jeremia 27:6

Rîu nîmvecanîte mavûrûri mama monthe kûrî Nebukadinezarû, mûthamaki wa Babuloni, ndungata yakwa, wana nînîmûvete nyamû cia kîthaka imûtungatagîre.

Jeremia 32:4

Zedekia mûthamaki wa Juda ndakaûra aume njararî cia Akalidei, nwatî nîakwonana nake ûthiû kwa ûthiû na maranîrie nake ke mwene.

Jeremia 34:3

We ndûkaavota kûra, nwatî nîûkaanyitwa na ûvirwe kûrî ke; nîûkonana na Mûthamaki wa Babuloni na mwaranîrie nake metho kwa metho, vuva wa ûguo nîûkaathiî Babuloni.

Jeremia 36:29

Nake Ngai-Mûnene nîwambîrire mbîre mûthamaki atîrî, ‘We nîûravîvirie îvuku rîa gîkûnjo ûkîûragia atî: Nîndûî gîtûmîte wandîke atî mûthamaki wa Babuloni nîagaaûka na acûkangie vûrûri ûyû, na aûrage andû na nyamû irîa irî kuo?’

Jeremia 37:17

mûthamaki Zedekia nîwatûmanire athiî etwe, na akîmûgwata ûgeni gwake. Nîmaathiîre vandû keverirî kûu gwake mûciî na akîmûria atîrî, “Kûrî na ndûmîrîri ûrî nayo kuuma kûrî Ngai-Mûnene?” Jeremia nîwamûcokerie atîrî, “Kûrî nayo.” Jeremia nîwacokire akiuga atîrî, “Nîûkaanenganîrwa kûrî mûthamaki wa Babulonia.”

Jeremia 50:17

Ngai-Mûnene arauga atîrî, “Andû a Isiraeli mekariî ta ng'ondu ivinyûrîtue na ikanyaganua nî mûnyambû. Maambire kûtharîkîrwa nî mûthamaki wa Asîria, magîcoka makîtharîkîrwa nî Nebukadinezarû mûthamaki wa Babuloni.

Maca 2:20

We Ngai-Mûnene thikîrîria! Kûrî andû engî wanaverithia ûû? Aka mararîa ciana ciao irîa mendete, nao athînjîri-Ngai na arathi maûragagîrwa hekarûrî ya Ngai-Mûnene.

Maca 2:22

Wetire nthû ciakwa kuuma mîena yonthe, nîmaûkire kûrî nie ta andû metîtwe kîrugorî; mûthenya ûrîa watumûkire na marakara, nthû ciaûragire ciana ciakwa, irîa njiarîte na ngarera.

Ezek 23:28

Mwathani Ngai arauga atîrî, “Nie nîngaakûrekereria kûrî andû arîa ûmenete, na wî kînyiria Kîamo.

Ezek 7:9

Ndigaagûcaîra kana ngwîguîra ntha, nîngakûverithia kûringana na mîthiîre yaku mîcûku. Nîûkaamenya atî nînie Ngai-Mûnene mverithanagia.”

Ezek 8:18

Kwoguo nîngamaverithia nîrî na marakara. Ndikaamacaîra kana nîmeguîra ntha. Wana mangîkaavoya maugîrîrîtie ndikaamathikîrîria.”

Ezek 9:10

Kwoguo nie, ndikaamarekera kana nîmeguîra ntha. Ngaamaverithia kûringana na ûrîa mekîte.”

Gûco 28:50

Vûrûri ûcio ûrî andû aganu mûno na matatîîaga andû akûrû kana meguîra andû ethî ntha.