Jeremia 16:18 - ÎVUKU RÎA ÛVORO MWARO

¹⁸ Nîngatûma marîve thirî wa mevia mao maita maîrî, nîûndû nîmagwatîtie vûrûri wakwa mûgiro na ngai cia mîvuano irîa itarî mwoyo na magecûria vûrûri wakwa na maûndû marî magigi.”

Jeremia 16:18 ပူးပေါင်းရင်းမြစ်များ

Thaburi 106:38

Nîmeetûrûrire nthakame ya andû mataarî na mavîtia, nthakame ya anake na erîtu ao; arîa maarutire marî magongoona kûrî mîvuanano ya Kanaani, naguo vûrûri ûkîgwatwa nî mûgiro nîûndû wa nthakame îo.

Isaia 24:5

Andû arîa matûûraga gûkû nîmagwatîtie nthî mûgiro, nîûndû nîmaunîte mawatho ma Ngai, makarega kûrûmîrîra kîrîra gîake, na makauna kîrîkanîro gîa tene na tene.

Isaia 40:2

Arîriani andû a Jerusalemu na ûvoreri. Na mûmeere atî ûkomborî ûrîa mararî nîwathira, na mevia mao nîmoverwa. Na atî Ngai-Mûnene amaverithîtie kwîgana nîûndû wa mevia mao monthe.”

Isaia 61:7

Nîûndû wa ûrîa mwaconorithirue mûkaarîvwa maita maîrî, nîûndû wa kûrega gûtîîwa nîmûgaakenera îgai rîenyu, kwoguo nîmûgaatûûra vûrûrirî wenyu, na ûtonga wenyu wongerereke maita maîrî, na mûtûûre mûkenete tene na tene.

Isaia 65:6

“Nînduîte kûmaverithia na ngandîka, na ndingîkirîrîria rîngî, nwatî nduîte kûmaverithia

Isaia 65:7

nîûndû wa mevia mao na nîmaverithîrie mevia ma methe mao. Nîûndû nîmaavîvagîria ûbani îgûrû rîa irîma, na makanumaga marî îgûrû rîa tûrîma. Kwoguo nîmaverithia viû nîûndû wa maûndû marîa meekire tene.”

Jeremia 17:18

Arîa manyariraga maroconorithua, nwatî ndûgatûme njonorithua, marogîa na guoya, nwatî ndûgatûme ngîa na guoya, ûrotûma makinyîrwe nî mavinda ma thîna, maretithîrie mûthiro ûmathirie viû.

Jeremia 2:7

Nînamûretire vûrûrirî mûnoru, mûkenerere matunda ma guo, na maûndû mengî maro ma guo. Nwatî mwakinya kuo, nîmwaûgwatirie gîko, na mûkîgwatia vûrûri ûrîa namûveere mûgiro.

Jeremia 3:9

Ndoonaga ûmaraa ûrî ûndû mûnene, kwoguo nîwatûmire vûrûri ûgîe na mûgiro na agîka wîvia wa ûtharia na njîra ya kûgooca mathiga na mîtî.

Jeremia 44:4

Mavinda meengî nînatûmire arathi ndungata ciakwa kûrî mue, ngîmwîra atî, ‘Mûtigeke maûndû mama macûku ûguo nthûrîte!’

Jeremia 7:30

“Andû a Juda nîmekîte maûndû macûku mbere yakwa, nîmekîrîte mîvuanano hekarûrî yakwa na magatûma îgwatwa nî mûgiro.

Ezek 11:18

Rîrîa magaacoka vûrûrirî ûcio, nîmakaaruta indo cionthe irîa menete na mîvuanano yonthe kuuma kuo.

Ezek 11:21

Nwatî andû arîa ngoro ciao irûmagîrîra indo irîa njûku na kûvoya mîvuanano, nîngaamaverithia kûringana na maûndû mau macûku mekîte. Nie Ngai-Mûnene nînie mbugîte ûguo.”

Ezek 36:18

Kwoguo nînametûrûrîre marakara makwa nîûndû wa nthakame îrîa meetûrûrire vûrûrirî wao na nîûndû wa mûgiro ûrîa maagwatirie vûrûri na njîra ya kûgooca mîvuanano.

Ezek 5:11

“Kwoguo, nie Ngai-Mûnene, wata ûrîa ndûraga mwoyo, nîûndû nîmûgwatîtie nyomba yakwa mûgiro na njîra ya gwîka maûndû macûku, nîngaamûrega muonthe ndakwîguîra mûndû wana ûrîkû ntha.

Hosea 9:7

Mîthenya ya kûverithania nî mîkinyu, mîthenya ya kwîrîvîrîria nîmîkinyu; andû a Isiraeli nwa nginya mamenye mûthenya ûcio. Mue mugaga atî, “Mûrathi nî kîrimû na mûndû ûrîa ûrî na Roho arî na ngoma.” Mugaga ûguo nîûndû wa mevia menyu meengî, na nîûndû wa rûmena rwenyu rûnene îgûrû rîake.

Alawi 26:30

Nîngoomomora kûndû kûrîa mûgoocagîra mûrî îgûrû rîa irîma, nyomomore metha cienyu cia magongoona cia kûvîvîria ûbani na mbikie ciimba cienyu îgûrû rîa mîvuanano yenyu îno mîkuû, na nîmûnyarare.

Mika 2:10

Ûkîrani mûthiî, nîûndû gûkû gûtirî na gwa kûvurûka. Mevia menyu nîmatûmîte kûndû gûkû gûcûkangue.

Kûguû 18:6

Mwîke wata ûrîa ke agwîkîte, mûrîve maita maîrî ma ûrîa ke aagwîkire. Îcûria gîkombe gîake ndivei ndûrû maita maîrî ma îrîa ke amûthondekerete.