Jeremia 11:7 - ÎVUKU RÎA ÛVORO MWARO

⁷ Nîûndû rîrîa narutire methe mao Misiri, nînamerire na kinyi mambathîkîre na nginya ûmûnthî nînîmeraga mambathîkîre.

Jeremia 11:7 ပူးပေါင်းရင်းမြစ်များ

2Atha 17:13

Ngai-Mûnene nîwakaanîtie andû a Isiraeli na a Juda na njîra ya arathi onthe na oni akameera atîrî, “Tiganani na mîtugo yenyu mîcûku na mûrûmîrîre maathani makwa na irîra ciakwa, wata ûrîa mandîkîtwe wathorî ûrîa naveere methe menyu na marîa naamûtûmîre kûvîtûkîrîra kûrî arathi, ndungata ciakwa.”

2Maû 36:15

Ngai-Mûnene, Ngai wa methe mao nîwatûmanîte kûrî o maita meengî kûvîtûkîra kûrî anjaama ake, nîûndû nîwamegucagîra ntha wa vamwe na hekarû yake.

Ntha 15:26

Nîwacokire akîmeera atîrî, “Nie nînie Ngai-Mûnene, Ngai wenyu na nînie nîmûvonagia. Ethîrwa mue mûkambathîkagîra na kinyi na mwîkage ûrîa kwagîrîrîte methorî makwa, nie ndikaamûtûmîra mîrimû ta îrîa naatûmîre andû a Misiri.”

Jeremia 11:4

kîrîa narûthire na methe menyu vîndî îrîa namarutire Misiri vûrûri ûrîa wekariî ta mwaki mûnene ûkîrîrîmbûka. Nînamerire mathikîrîrie mûgambo wakwa, na mekage ûrîa wonthe ngûmatha nîguo matuîke andû akwa nanie nduîke Ngai wao.

Jeremia 25:3

“Îvinda rîa mîaka mîrongo îîrî na îthatû (23) kuuma mwaka wa îkûmi na îthatû Josia mûvîcî wa Amoni, arî mûthamaki wa Juda nginya ûmûnthî, Ngai-Mûnene ethîrîtwe akîmbarîria. Vîndî îo yonthe mbîthîrîtwe ngîmûva ndûmîrîri îo ndagûtigithîrîria, nwatî mue nîmwaregire kûmîthikîrîria.

Jeremia 25:4

Mue mûtienda kûmîgua kana kûmîthikîrîria wana ethîrwa Ngai-Mûnene atûûraga amûtûmagîra arathi ndungata ciake atagûtigithîrîria.”

Jeremia 31:32

Kîrîkanîro kîu gîtikethîrwa gîkariî ta kîrîa narûthire na methe mao vîndî îrîa naamarutire Misiri na njara yakwa nie mwene. Nîmaaregire kwathîkîra kîrîkanîro kîu, wana ethîrwa nie narî ta mûthuuri kûrî o.

Jeremia 32:23

Nao nîmaatonyire vûrûri ûcio makîwîgwatîra, nwatî matiakwathîkîra kana marûmîrîra watho waku. Matianeka ûndû wanarî ûmwe wa marîa wamaathire. Kwoguo nîûtûmîte manyitwe nî mathîna mama monthe.

Jeremia 34:14

‘Wa mîaka mûgwanja yathira, nwa nginya mûrekagîrîrie Mûhibirania ûcio wendetue arî ngombo na ûgûtungatîte mîaka îtandatû. Mwagîrîrwe nî kûmarekereria matikarute wîra kwenyu rîngî.’ Nwatî methe menyu matianthikîrîria kana mambîgua.

Jeremia 35:14

Maûndû marîa Jonadabu mûvîcî wa Rekabu aathire ciana ciake, atî matikanyue ndivei, nîmaamarûmîrîre, na nginya ûmûnthî matiananyua ndivei nîûndû nîmathîkîrîte watho wa îthe wao. Nwatî mbîthîrîtwe ngîaria namue mavinda kwa mavinda na mûtimbîgucaga.

Jeremia 35:15

Nînîmûtûmîrîte arathi ndungata ciakwa, na nîo arathi mavinda kwa mavinda nîguo meere wa ûmwe wa cienyu atigane na waganu wake, arûnge mîthiîre yake na atige kûgooca ngai cia mîvuanano nîguo mûtûûre na thayû vûrûrirî ûrîa namûveere mue wana methe menyu, nwatî mûtianthikîrîria kana mûmbîgua.

Jeremia 7:13

Mue nîmwîkîte maûndû mama monthe, na mavinda meengî na namwarîrie na mûkîrega kûmbîgua, na namwîta mûkîrega kûmbîtîka.

Hosea 4:1

Ta thikîrîriani kiugo Kîam Ngai-Mûnene mue andû a Isiraeli, nîûndû Ngai-Mûnene nîarathitanga atûûri a vûrûri ûyû. “Gûtirî na wîvokeku kana ntha vûrûrirî ûyû, gûtirî mûndû ûmenyete Ngai-Mûnene vûrûrirî ûyû.

Hosea 5:1

Ta thikîrîriani ûvoro ûyû, mue athînjîri-Ngai! Tegani matû mue andû a Isiraeli! Ta thikîrîriani, mue nyomba ya mûthamaki! Mue mwagîrîrwe nî kûrûmîrîra kîvooto, îthenya rîa ûguo mwîthîrîtwe mûrî mûtego kûu Mizipa, ta neti ya kûmûnyita yarîtwe kîrîmarî Kîam Taboru.

Zakaria 1:4

Mûtigekare ta methe menyu ma tene arîa meerirwe nî arathi arîa maarî kuo mbere matigane na mîthiîre yao mîcûku na ciîko ciao njûku, nwatî matianthikîrîria kana mambathîkîra nie Ngai-Mûnene mwene vinya wonthe.

Aefeso 4:17

Na rîîtwa rîa Mwathani nîramûkaania mûtikathiî na mbere gwîkara ta andû a Ndûrîrî. Meciria mao nî ma mana.

Gûco 12:32

“Menyagîrîrani mwîkage maûndû monthe marîa ngûmwatha; mûtikongerere kana mûrute wanarî ûndû.

Gûco 30:20

Mwenda Ngai-Mûnene Ngai wenyu na mwamwathîkîra na mûtuîke evokeku kûrî ke, nî mûgûtûûra vîndî ndaca vûrûrirî ûrîa Ngai-Mûnene Ngai wenyu eerîre methe menyu: Iburahimu Isaka na Jakovu na mwîvîtwa atî nîakaamava.”

Gûco 4:6

Mathîkagîreni na kinyi na mûmavingagie. Ûndû ûyû nîguo ûgaatûmaga mwonwe nî andû a mavûrûri marîa mengî mûrî aûgî na mûrî na ûmenyo mwîngî. Andû megua mawatho mau monthe makaaugaga, ‘Nama andû aya a vûrûri ûyû marî na ûûgî na ûmenyo mwîngî mûno!’

Gûco 5:29

Naarî kethîrwa mageciragia ûguo vîndî cionthe, mandîîage na mathîkagîre maathani makwa! Mangîka ûguo, maûndû mao monthe na ma njiarwa ciao makethagîrwa marî maro tene na tene.

Gûco 6:2

Mavinda monthe marîa mue na njiarwa cienyu mûgûtûûra mwoyo, mûgetigagîra Ngai-Mûnene, Ngai wenyu na mwathîkagîre irîra ciake cionthe na mawatho marîa ngûmûva, nîguo mûtûûre îvinda îraca vûrûrirî ûcio ngûmûva.

Gûco 8:6

Kwoguo athîkagîrani maathani ma Ngai-Mûnene, Ngai wenyu na mûrûmagîrîre njîra ciake mûkîmwîtigagîra.

2Ath 3:12

Na rîîtwa rîa Mwathani wetû Jesû Kristû, nîtûkwatha andû acio na tûmere atî mekarage na mîtugo mîaro na marutage wîra nîguo meyonagîre kîndû gîa gwîtethia mûtûûrîrerî wao.

1Sam 8:9

Kwoguo îtîkîra ûrîa magûkwîra, nwatî ûmataare mûno na ûmonererie maûndû megiî ûrîa mûthamaki ûcio wao akaamatha.”