Isaia 5:16 - ÎVUKU RÎA ÛVORO MWARO

¹⁶ Nwatî Ngai-Mûnene mwene vinya wonthe onanagia ûnene wake na njîra ya gûtuîra andû ciira na kîvooto, na akonania ûtheru wake na njîra ya ûthingu wake.

Isaia 5:16 ပူးပေါင်းရင်းမြစ်များ

1Maû 29:11

Ûnene, vinya, riiri, ûvootani na gîtîîo nî ciaku we Ngai-Mûnene. Îgûrû na nthî na indo cionthe irîa irî kuo, nî ciaku nîûndû ûthamaki nî waku we Ngai-Mûnene, na nîwe mûnene gûkîra anene onthe.

Thaburi 21:13

Ûrokumua, we Ngai-Mûnene, nîûndû wa vinya waku mûnene! Tûkaaina na tûkumie ûvoti waku.

Thaburi 46:10

Augaga atîrî, “Vorerani, na mûmenye atî nînie Ngai, nînie mvetwe gîtîîo mavûrûrirî monthe, nînie ndîîtwe nthî yonthe.”

Thaburi 9:16

Ngai-Mûnene nîemenyithanîtie na njîra ya gûtuîrîra andû na kîvooto, nao andû arîa aganu nî manyitîtwe nî ciîko cio o ene.

Isaia 12:4

Mûthenya ûcio nîmûkaaina atîrî, “Cokeriani Ngai-Mûnene ngatho! Mûvoeni mûkîgwetaga rîîtwa rîake. Menyithiani mavûrûri maûndû marîa ekîte, na mwanîrîre atî rîîtwa rîake nî rînene.

Isaia 2:11

Mwîtîîo wa andû nîûkaathirua, na mwîcaaro wa andû onthe ûcûkangue, na Ngai-Mûnene tu nîke ûgaakumua mûthenya ûcio.

Isaia 2:17

Mwîtîîo wonthe wa andû nîûkaanyivua, na mwîcaaro wa andû nîûkaathirua, na Ngai-Mûnene wenga tu nîke ûgaakumua mûthenya ûcio.

Isaia 2:9

Kwoguo wa mûndû nîakegwithua nthoni na aconorithue. We Ngai ndûkamovere wanarî vanini!

Isaia 28:17

Ngaatûmîra kîvooto kîrî kîthimi gîakwa, naguo ûthingu ûrî ta kavirû.” Mbura ya mbembe nîkaavata maveeni monthe, namo manjî macûkangie ûgitîri wenyu.

Isaia 29:23

Nîûndû rîrîa akoona ciana ciake, wîra wa njara ciakwa, nîmagaakumia rîîtwa rîakwa nie Ûrîa Mûtheru wa Jakovu; na metigîre Ngai wa Isiraeli.

Isaia 30:18

Kûnarî ûguo, Ngai-Mûnene nwa wetererete kûmwîguîra ntha, kwoguo nîevarîrîtie kûmûtuga. Nîûndû Ngai-Mûnene nî Ngai wîkaga maûndû ma kîvooto, kûrathimwa nî arîa onthe mamwetagîrîra.

Isaia 33:10

Ngai-Mûnene arauga atîrî, “Rîu nîngûkîra, rîu nîngwonania vinya wakwa, rîu nie nîngaakumua.

Isaia 33:5

Ngai-Mûnene nî mûnene, ke atûûraga îgûrû; nîagecûria Zayuni na kîvooto na ûthingu.

Isaia 57:15

“Ûguo nîguo Ke Ûrîa ûrî îgûrû mûno, Ke Ûrîa wambararîtue mûno, ûrîa ûtûûraga tene na tene na ûrîa wîtagwa Mûtheru arauga. “Nie mbîkaraga kûu îgûrû kûrîa kûtheru, mbîkaraga na andû athînîku na enyivia. Nîngekîra mîoyo arîa maarî enyivia, na gwîkîra vinya arîa enyivia.

Isaia 6:3

Wa ûmwe wa Aserafi acio etaga ûrîa wîngî akiugaga atîrî, “Mûtheru, mûtheru, mûtheru! Ngai-Mûnene, mwene vinya wonthe nî mûtheru! Riiri wake wîcûrîte nthî yonthe.”

Isaia 61:8

Ngai-Mûnene arauga atîrî, “Nie mendete waragania, na nînthûrîte ûcunani na ûkinyanîrîria. Nîngaatuga andû akwa na wîvokeku, na ndûthe kîrîkanîro gîa gûtûûra tene na tene nao.

Isaia 8:13

Nwatî ririkana, atî Ngai-Mûnene, mwene vinya wonthe, nînie nîngîkûmakia na nîmbagîrîrwe nî gwîtigîrwa.

Ezek 20:41

“Naamûruta kûrî ndûrîrî na mavûrûri marîa mûnyaganîrîtie na nîmûrete vamwe, nîngaamwamûkîra mûrî ta îgongoona rîrî na mûnungo mwaro wa kûngenia, nacio ndûrîrî nîikoona ûthingu wakwa.

Ezek 28:22

ûrîre atî Ngai-Mûnene Ngai augîte nîakûrûa narîo onanie riiri wake gatagatî ka rîo. Rîrîa ngoonania ûthingu wakwa na njîra ya kûrîverithia, andû nîmakaamenya atî nie nînie Ngai-Mûnene.

Ezek 28:25

Ngai-Mûnene Ngai arauga atîrî, “Nîngaûngania andû a Isiraeli na nîmacokanîrîrie vamwe kuuma mavûrûrirî marîa maanyaganîrîtue. Ngeeka ûguo nîguo andû a ndûrîrî mone ûthingu wakwa. Nao andû a Isiraeli nîmagacoka gûtûûra vûrûrirî ûrîa naveere Jakovu, ndungata yakwa.

Ezek 36:23

Rîîtwa rîakwa rîtheru rîrîa mwacambithirie gatagatîrî ka andû a ndûrîrî nîngaarîcokeria ûtheru warîo. Nacio ndûrîrî nîikaamenya atî, nie nînie Ngai-Mûnene. Nie Mwathani Ngai-Mûnene nînie mbugîte ûguo. Nîngaamûvûthîra monanie ûtheru wakwa mbere yao.

Ezek 38:16

Nîûkaatharîkîra andû akwa a Isiraeli ta ûrîa îtu rîkunîkagîra vûrûri. Vîndî îo nîngaakûrete ûtharîkîre vûrûri wakwa nîguo mavûrûri mamenye atî nîngûvûthîrîte we Gogu nîguo monanie ûtheru wakwa mbere yao.

Ezek 38:23

Kwoguo, mavûrûri meengî nîmakaamenya atî, nie nînie Ngai-Mûnene na nîngoonania ûnene na ûtheru wakwa kûrî ndûrîrî nyîngî.”

Danieli 4:37

Na rîu, nie Mûthamaki Nebukadinezarû, nînîragooca, ngakumia na ngava Mûthamaki wa îgûrû riiri, nîûndû mawîra make monthe nî ma kîvooto, njîra ciake nî cia ma, na nîanyivagia arîa etîi.

Alawi 10:3

Musa nîwacokire akîra Aroni atîrî, “Ûguo nîguo Ngai-Mûnene aaugire atî, ‘Andû onthe arîa mandungataga marî athînjîri-Ngai nwanginya mandîîage nîûndû wa ûtheru wakwa, na nîngoonania riiri wakwa kûrî andû onthe a Isiraeli.’ ” Nwatî Aroni ndaagamba.

Ndari 20:13

Ûndû ûyû wekîkîre Meriba, kûrîa andû a Isiraeli maateterie Ngai-Mûnene, na marî kûu nîwamoonirie ûtheru wake.

Aroma 2:5

Nwatî we ûrî na ngoro nyûmû na nîûregete kwîrira. Kwoguo nîûreîngîvîria îvera rîaku rîrîa rîgaakinya mûthenya ûrîa marakara ma Ngai na îtua rîake rîa ma rîkaguûranîrua.

1Pet 1:16

Mandîko matheru maugaga atîrî, “Tuîkani andû atheru, nîûndû wananie nîrî mûtheru.”

1Pet 2:15

Nîûndû wendi wa Ngai nî atî, na njîra ya maûndû maro marîa mwîkaga mûkaavotaga gûtûma andû arîa aritu matigane na mîario yao ya ûrimû.

1Pet 3:15

Nwatî ngororî cienyu vecagani Kristû gîtîîo kîrîa kîmwagîrîrîte ta Mwathani. Vîndî cionthe îthagîrwani mwîvarîrîtie gûcokeria mûndû wa wonthe ûrîa ûngîmûria mûmûtaarîrie ûvoro wîgiî mwîrîgîrîro ûrîa mûrî naguo.

Kûguû 3:7

“Andîka kûrî mûraika wa kanitha ûrîa ûrî Filadelifia atîrî: “Îno nîyo ndûmîrîri kuuma kûrî ûrîa mûtheru na wa ma. Ke arî na cavi îrîa yarî ya Daudi. Ke aravingûra mûrango gûtirî mûndû ûngîvota kûûvinga, na ke araûvinga gûtirî mûndû ûngîvota kûûvingûra.

Kûguû 4:8

Wa kîûmbe gatagatîrî ka icio inya ciarî mwoyo Kîamrî na mathagu matandatû na nîgîecûrîte metho kûndû kuonthe nja na ndaarî. Ûtukû na mûthenya nî cinaga itagûtigithîria ikiugaga atîrî: “Mûtheru, Mûtheru, Mûtheru, nî Mwathani Ngai mwene vinya wonthe, ûrîa warî kuo, ûrî kuo, na ûgaaûka.”