Isaia 47:11 - ÎVUKU RÎA ÛVORO MWARO

¹¹ Nwatî nîûkaanyitwa nî maûndû macûku, na ndûkaavota kûmenya kûrîa maumîte. Nîûkaanyitwa nî mathîna, na ndûkaavota kûmathiria, maûndû ma gûkûthiria nîmagaaûka kûrî we wa rîmwe, marîa ûtanamenya ûvoro wamo.

Isaia 47:11 ပူးပေါင်းရင်းမြစ်များ

Nehemia 4:11

Nthû cietû cieciragia atî tûtikaamona kana tûmenya ûrîa maavangaga gûtumîrîra wa rîmwe na kwambîrîrie gûtûûraga nîguo wîra wetû ûkinyie mûthiia.

Thaburi 35:8

Maronyitwa nî mûthiro matevarîrîtie; maronyitwa nî mîtego yao îrîa maigîte, na mamîgwîre macûkangue!

Thaburi 50:22

“Îcirieni ûvoro ûyû, mue mûtatindanagîra nanie, mwarega nîmûcûkangie, na gûtirî mûndû ûkaamûvonokia.

Thaburi 55:15

Nthû ciakwa irokua itakinyîtie; marothiî kwa arîa akuû marî mwoyo, nîûndû mecûrîtwe nî waganu ngororî ciao.

Thaburi 73:19

Macûkangagua wa rîmwe; mathiragua nî imaûndû cia kûmakania.

Nthi 13:21

Mathîna marûmanagîrîra na mwîvia kûndû kuonthe, nwatî andû arîa athingu nîmakaarîvwa na maûndû maro.

Isaia 13:6

Rîrani, nîûndû mûthenya wa Ngai-Mûnene ûrî vakuvî, ûgaaûka wîkariî ta mûthiro kuuma kûrî mwene vinya wonthe.

Isaia 29:5

Nwatî gîkundi Kîam nthû ciaku gîkethîrwa gîkariî ta rûkûngû rûvinyu, nacio nthû ciaku irîa itarî ntha ikethîrwa ciîkariî ta macaki, makaagûrûkua nî rûkûngi wa rîmwe.

Isaia 30:13

kwoguo mevia nîmamûretera mûthiro, ta mwatûka wa rûthingo rûraca na îgûrû, rûkaagwa wa rîmwe.

Isaia 37:36

Mûraika wa Ngai-Mûnene nîwathiîre kûrîa Asîria maambîte magema mao na akîûraga athigari ngiri îgana rîmwe rîa mîrongo înana na ithano (185,000). Rîrîa andû maaramûkire kîraûko tene, andû acio onthe methîrîrue marî ciimba.

Isaia 45:7

Nînie ndûmaga kûgîe ûtheri na ngatûma kûgîe nduma; nînie ndûmaga kûgîe thayû na ngatûma kûgîe thîna. Nînie Ngai-Mûnene ûrîa wîkaga maûndû mau monthe.

Isaia 47:9

Maûndû mama moîrî magaaûka kûrî we wa rîmwe mûthenya ûmwe, gûkuîrwa nî ciana na gûtuîka mûndûmûka wa ndigwa, wana ethîrwa wî na ûrogi mwîngî, na wî na vinya mwîngî wa kûringa mbûgû.

Isaia 48:8

Ndwanamegua, na ndwanamenya ûvoro wamo, ndwanegua maûndû mau na matû maku kuuma tene. Nîûndû nînaicî atî we warî mwaganu mûno, na atî kuuma gûciarwa gwaku we wetagwa mûregi.

Isaia 57:1

Mûndû mûthingu nîakucaga na gûtirî mûndû ûmakaga; andû aro mangîkua, gûtirî mûndû ûmenyaga atî Ngai nîkwa amagitagîra matikanyitwe nî maûndû macûku.

Jeremia 51:29

Nthî nîîratetema na îkainaina nîûndû wa ûrûrû, nîûndû ûrîa Ngai-Mûnene avangîte gwîka Babuloni nwa nginya eke, atûme vûrûri wa Babuloni ûtuîke werû, kûndû gûtatûûragwa nî andû.

Jeremia 51:43

Matûûra ma Babuloni matuîkîte kîmako, vûrûri mûmagaru na werû, kûndû gûtatûûragwa nî andû, na kûndû gûtavîtûkagîrîrwa nî andû.

Jeremia 51:8

Babuloni nîûgwîte wa rîmwe na ûkavootwa; ûcakaîreni! Carîriani ironda ciaguo ndawa, nwa kwîthîrwa nîûkûvona.

Maca 1:21

“Tathikîrîria gûcakaya gwakwa, gûtirî mûndû wa kûmvoreria. Nthû ciakwa nîimenyete mathîna makwa, nîirakenerera kûthîna gwakwa, tûma nthû ciakwa cione mathîna ta nie.

Ezek 7:26

Maûndû macûku magaaûka marûmanîrîrîte. Ndûmîrîri cia maûndû macûku igaaûkaga irûmanîrîrîte. Nîmagaacaragia kîoneki kuuma kûrî arathi. Athînjîri-Ngai nîmagaatura ûndû wa kûthomithania, nao athuuri matikethîrwa marî na kîrîra.

Mathaayo 18:34

Nake mûthamaki nîwarakarire mûno na akîathana ndungata îo iikue njeera na îverithue nginya rîrîa îkaamûrîva thirî wake wonthe.”

Luka 12:59

Nîrakwîra na ma atî, ndûkaauma njeera ûtambîte kûrîva nginya gatururu ka mûthiia ka thendi irîa ûtuîrîrîtwe.”

Luka 17:27

Andû nîmaarîcaga na makanyua, makavikania na makavikua, nginya mûthenya ûrîa Nuhu aatonyire thavinarî na mbura ya kîvovoto îkiura na îkîmaûraga onthe.

1Ath 5:3

Rîrîa andû makeethîrwa makiugaga, “Tûrî na thayû na tûrî agitîre,” nîmagaacûkangua wa rîmwe wata ûrûrû ûrîa ûkaga kûrî mûndûmûka agîciara. Andû matikaavota kûra.

Kûguû 3:3

Ta ririkanani maûndû marîa mwathomithirue na marîa mwegwire. Marûmagîrîreni na mwîrire. Ethîrwa mue tî mûkîra, nie ngaûka kûrî mue ta mwîi na mûtikaamenya îthaa rîrîa ngaûka.