Isaia 38:19 - ÎVUKU RÎA ÛVORO MWARO

¹⁹ Arîa marî mwoyo nîo magûcokagîria ngatho, ta ûrîa nie nîragûcokeria ngatho rîu, îthe wa ciana nîke ûimenyithagia ûvoro wa wîvokeku waku.

Isaia 38:19 ပူးပေါင်းရင်းမြစ်များ

Kîam 18:19

Nie nîmûthuurîte nîguo athe ciana ciake na njiarwa ciake imbathîkagîre, na ciîkage maûndû ma ûthingu na ma kîvooto. Ethîrwa nîmagwîka ûguo nîngaavingia maûndû monthe marîa nerîre Iburahimu.”

Thaburi 118:17

Nie ndigaakua, nwatî nîngatûûra mwoyo, ngîanagîrîra ûrîa Ngai-Mûnene ekîte.

Thaburi 119:175

Tiga ndûûre mwoyo nîguo ngûkumagie; na ûreke matuîro maku ma ciira mandethagie.

Thaburi 145:4

Rûciaro rûmwe nîrûkaaganagîra rûciaro rûrîa rwîngî wîra waku; na nîmakaanîrîra ciîko ciaku cia vinya.

Thaburi 146:2

Ngaakumagia Ngai-Mûnene ûtûûrorî wakwa wonthe; ngainagîra Ngai ûtûûrorî wakwa wonthe.

Ntha 10:2

Mue nîmûkaavota kwîra ciana cienyu wana ciana ciao maûndû ma vinya marîa nekire na ciama irîa naringîre andû a Misiri. Na mue muonthe nîmûkaamenya atî nie nînie Ngai-Mûnene.”

Mûvunjia 9:10

Rutaga wîra waku na vinya yaku yonthe nîûndû kwa arîa akuû gûtirî kûruta wîra, kana gwîciiria, gûtirî ûmenyo kana ûûgî na kûu nîkuo ûthiîte.

Joeli 1:3

Îrani ciana cienyu maûndû mau, tiga ciana cienyu ciîre ciana ciao, nacio ciana ciao ciîre ciana irîa irûmîrîrîte.

Johana 9:4

Rîrîa kûrî mûthenya nwa nginya twîkare tûkîrutaga wîra wa ûrîa wandûmire. Ûtukû nîûgûkinya rîrîa gûtarî mûndû ûngîvota kûruta wîra.

Gûco 11:19

Thomithagiani ciana cienyu maathani mama. Thomithagiani ciana cienyu rîrîa mûrî mîciî, rîrîa mûrî kûraca na mîciî, mûkîthiî toro na rîrîa mwaramûka.

Gûco 4:10

Mamenyithagieni ûvoro wa mûthenya ûrîa mwarûngamire mbere ya Ngai-Mûnene, Ngai wenyu kîrîmarî Kîam Horebu, rîrîa aambîrire, ‘Îta andû a Isiraeli vamwe. Nîrenda megue ûrîa nguga, nîguo mamenye kûmbathîkagîra mavinda marîa monthe magûtûûra nthî, na mathomithagie ciana ciao gwîka guo.’

Gûco 4:9

Îîmenyagîrîreni na mûtikariganîrwe nî maûndû marîa mwîyonerete na metho menyu; maririkanageni ûtûûrorî wenyu wonthe. Mamenyithanagieni kûrî ciana cienyu na kûrî ciana cia ciana cienyu.

Gûco 6:7

Menyagîrîrani mûmathomithanagie kûrî ciana cienyu vîndî cionthe, rîrîa mûrî mîciî, rîrîa mûrî kûraca na mîciî, rîrîa mûkûthiî toro na rîrîa mûkûramûka.