Gûco 7:13 - ÎVUKU RÎA ÛVORO MWARO

¹³ Akaamwendaga, amûrathimage, na atûme mwongerereke mûtuîke rûrîrî rûnene. Ngai-Mûnene nîakaarathima ciana cienyu na mîgûnda yenyu, na maciaro ma mîgûnda yenyu nîguo mwîthagîrwe mûrî na ndivei na maguta, na amûrathime na ng'ombe na ng'ondu nyîngî. Ngai-Mûnene nîakaamûrathima na indo icio cionthe mûrî vûrûrirî ûrîa eerîre methe menyu atî nîakaamûva.

Gûco 7:13 ပူးပေါင်းရင်းမြစ်များ

Nehemia 9:32

“Kwoguo, Ngai wetû ûrî Ngai mûnene na wî vinya! Wî Ngai wa kûmakania na nîûvingagia kîrîkanîro gîaku na wendo ûtathiraga. Mathîna marîa maûkîte kûrî tue na kûrî athamaki etû, kûrî anene etû na athînjîri-Ngai etû, arathi etû na kûrî methe metû, na andû onthe etû kuuma vîndî ya athamaki a Asîria, nginya ûmûnthî ndûkariganîrwe nîmo!

Ayubu 1:10

Nîkwa ûmûgitagîra ke, mûciî wake, wana indo ciake cionthe. Ûndû wa wonthe ekaga we nîûmûrathimaga. Ndîthia ciake cia mbûri na ng'ombe ciîcûrîte vûrûri wonthe.

Ayubu 42:12

Ngai-Mûnene nîwarathimire Ayubu ûtûrorî wake wa mûthiia gûkîra ûrîa aamûrathimîte ûtûrorî wa mbere.

Thaburi 1:3

Eekariî ta mûtî ûrîa ûkûraga rûtererî rwa rûnjî, ûrîa ûciaraga maciaro îvinda rîrîa rîagîrîru, na mathangû ma guo matiûmaga. Nîathatûkagwa wîrarî wonthe ûrîa arutaga.

Thaburi 107:38

Nîwarathimire andû ake na makîongerereka mûno, na agîtûma ndîthia yao ya ng'ombe yongerereke.

Thaburi 11:7

Ngai-Mûnene nî mûthingu na nîendete ciîko cia ûthingu, andû arîa mekaga ciîko cia ûthingu nî magaatûûrania nake.

Thaburi 127:3

Ciana, nî îgai kuuma kûrî Ngai-Mûnene; ciana nî kîveo kuuma kûrî ke.

Thaburi 146:8

na nîavingûraga ndumumu metho. Nîaûkagîrîria arîa avinyîrîrie, na nîendete arîa athingu.

Ntha 23:25

Ethîrwa nîmûkaangooca nie Ngai-Mûnene, Ngai wenyu, nîngaamûrathima na irio na manjî, na nîmûthengutîria mîrimû gatagatîrî kenyu.

Nthi 10:22

Irathimo cia Ngai-Mûnene nîcio itûmaga mûndû atonge, na ndarî kîeva aretanagîria na irathimo icio.

Nthi 15:9

Ngai-Mûnene nîathûrîte mîthiîre ya andû arîa aganu, nwatî nîendete arîa mekaga maûndû ma ûthingu.

Alawi 26:9

Nîngaamûrathima na ndûme mwongerereke na nîngaavingia kîrîkanîro kîrîa naarûthire namue.

Mathaayo 6:33

Nwatî ambani mûcarie Ûthamaki wa Ngai na ûthingu wake, nake nî akaamûva indo icio ciîngî cionthe.

Johana 14:21

“Mûndû wa wonthe wamûkagîra maathani makwa na akamathîkîra nîke ûmendete. Vava akendaga mûndû ûrîa ûmendete, wa nanie ngaamwendaga na ngeyonithanagia kûrî ke.”

Johana 15:10

Mwathîkîra maathani makwa mûgekaraga mûrî wendorî wakwa, wata ûrîa mbathîkîrîte maathani ma Vava na ngekara nîrî wendorî wake.

Johana 16:27

Vava ke mwene nîamwendete. Amwendete nîûndû nîmûmendete na nîmwîtîkîtie atî naumire kûrî Ngai.

Gûco 1:8

Taroriani, nîngûmûva vûrûri ûyû wonthe mûrona ûrîa Nie, Ngai-Mûnene nerîîre methe menyu ma tene: Iburahimu, Isaka na Jakovu vamwe na njiarwa ciao na mwîvîtwa atî nîngaamava. Thiîni mwînyitîre guo.’ ”

Gûco 13:17

Mûtikeigîre kîndû wanarî kîmwe Kîam irîa ciathanirwe icûkangue, nîguo Ngai-Mûnene athirwe nî marakara. Nîagaacoka amwîguîre ntha na atûme mwîngîve wata ûrîa eerîre methe menyu,

Gûco 28:1

“Ethîrwa nî mûkwathîkîra Ngai-Mûnene, Ngai wenyu, na mûrûmagîrîre na kinyi maathani make monthe marîa ngûkwatha ûmûnthî, Ke nîakaamûtua rûrîrî rûnene gûkîra ndûrîrî cionthe cia nthî.

Gûco 28:11

Ngai-Mûnene nîagaatûma mûthatûkwe; nîmûkaagîa na ciana nyîngî, ndîthia nene ya ng'ombe, na irio nyîngî cia mûgûnda mûrî vûrûrirî ûrîa Ngai-Mûnene eerîre methe menyu atî nîakaamûva.

Gûco 30:5

Ngai-Mûnene Ngai wenyu nîakaamûcokia vûrûrirî ûrîa warî wa methe menyu nîguo mûwîgwatîre rîngî; nîagaatûma mûthatûkwe mûno na mwîngîve makîria gûkîra methe menyu.

Gûco 7:7

“Ngai-Mûnene ndaamwendire na akîmûthuura nîûndû wa ûrîa mwarî eengî gûkîra andû a mavûrûri marîa mengî, nama mwarî anini mûno gûkîra mavûrûri marîa mengî ma nthî.