Gûco 32:36 - ÎVUKU RÎA ÛVORO MWARO

³⁶ Ngai-Mûnene nîakaarekereria andû ake, rîrîa akoona vinya wao wathira. Nîakeeguîra ntha andû onthe a Isiraeli, na gûtirî Mûisiraeli ûkeethîrwa atigarîte arî mwoyo, arî ngombo kana atarî ngombo.

Gûco 32:36 ပူးပေါင်းရင်းမြစ်များ

1Atha 14:10

Kwoguo nîngaaretithîria andû a nyomba ya Jeroboamu mûthiro na mbûrage arûme a nyomba yaku arîa marî Isiraeli, arîa ngombo na arîa matarî ngombo vûrûrirî wa Isiraeli. Nîngaathiria andû a mûciî wa Jeroboamu, ta ûrîa mûndû avîvagia mai makathira monthe.

1Atha 21:21

Kwoguo Ngai-Mûnene arakwîra, atî ‘Nîngaakûretere ûndû mûcûku. Nîngaakûthiria viû na nthirie arûme onthe aku arîa ngombo na arîa matarî ngombo vûrûrirî wa Isiraeli.

2Atha 14:26

Ngai-Mûnene nîwonire andû a Isiraeli makîthînîka mûno, nîûndû gûtiarî na mûndû wanarî ûmwe ûngîamatethirie.

2Atha 9:8

Andû onthe a nyomba ya Ahabu nwanginya magaakua; na nîngaaûraga arûme onthe a nyomba yake, arîa ngombo na arîa matarî ngombo.

Thaburi 106:45

Nîwaririkanire kîrîkanîro gîake nîûndû wao, na akîricûkwa nîûndû wa wendo wake mwîngî ûrîa ûtathiraga.

Thaburi 135:14

Ngai-Mûnene nîakaarîrîria andû ake, na eguîre ndungata ciake ntha.

Thaburi 50:4

Nîareta îgûrû na nthî ituîke aira, cione agîtuîra andû ake ciira.

Thaburi 7:8

We Ngai-Mûnene, nîwe ûtucagîra andû onthe, Ngai-Mûnene, nduîrîra kûringana na ûthingu wakwa, nîûndû gûtirî ûndû mûcûku mbîkîte.

Thaburi 90:13

We Ngai-Mûnene, nîwîkara ûrakarîte nîtue nginya rî? Coka na ûtwîguîre ntha, tue ndungata ciaku.

Thaburi 96:13

îkaaina îrî mbere ya Ngai-Mûnene rîrîa agaaûka. Nîûndû agaaûka gûtuîra andû a nthî ciira. Ke agaatuîra nthî na waragania na andû a nthî na kîvooto.

Ntha 32:14

Kwoguo Ngai-Mûnene nîwagarûrire meciria make na ndaaretera andû ake mûthiro ûrîa endeete kûmaretera.

Jeremia 20:11

Nwatî we Ngai-Mûnene ûrî vamwe nanie, kûrî nie we ûrî mûthigari njamba ya kûmakania; kwoguo arîa manyariraga matikamvoota, nîmagaconoka mûno nîûndû matikavootana. Gîconoko Kîamo nîgîtûûra tene na tene gîtikariganîra.

Jeremia 31:20

“Efiraimu nî mûvîcîwa ûrîa mendete. Ke nî mwana wakwa ûrîa mendete mûno. Nîûndû wana rîrîa ngûmûnegenia nwa nîmûririkanaga. Kwoguo ngoro yakwa nîîmwîriragîria; nama nîngamwîguîra ntha. Ûguo nîguo nie Ngai-Mûnene nîrauga.

Jeremia 42:10

Ethîrwa nîmûgwîkara gûkû vûrûrirî ûyû, nie nîngûmwaka na tînîmwomomora, nîngûmûvanda na tînîmûkûûra; nînîrirîte nîûndû wa maûndû macûku marîa mbîkîte mbere yenyu.

Danieli 12:7

Mûndû ûcio wekarîte mwena wa îgûrû wa rûnjî ekîrîte nguo mbaro, nîwaûkîrîrie njara ciake cioîrî na îgûrû. Nînaacokire ngîgua akîîvîta na rîîtwa rîa ûrîa ûtûûraga tene na tene akiuga atî, ‘Nî kavinda ka mîaka îthatû na nuthu. Vîndî îo andû arîa atheru a Ngai nîmagaatiga kûnyamarua na nîrîo maûndû monthe makethîrwa makîvinga.’

Joeli 2:14

Nwa kwîthîrwa Ngai-Mûnene Ngai wenyu nîakwîricûkwa, na amûve irathimo cia irio nyîngî, mûcoke mûmûrutîre matega ma irio cia mûgûnda na ndivei.

Joeli 2:18

Ngai-Mûnene nîwacokire akîonania wendo wa vûrûri wake, na akîguîra andû ake ntha.

Alawi 26:43

Nwatî mbere, andû nî makaauma vûrûrirî ûcio, naguo nîûkaavurûka na ûkûngûîre thavatû cia guo, na nwanginya makaaverithua nîûndû wa mevia mao ma kûregana na mawatho na irîra ciakwa.

Amosi 7:3

Ngai-Mûnene, Ngai nîwericûkirwe gwîka ûndû ûcio na akiuga atîrî, “Ûndû ûcio tîwîkîka.”

Amosi 7:6

Ngai-Mûnene Ngai nîwericûkirwe gwîka ûndû ûcio na akiuga atîrî, “Ûndû ûcio wanaguo tîwîkîka.”

Ahib 10:30

Tue nîtwîcî ûrîa waugire atîrî, “Kwîrîvîrîria nî gwakwa, nie nîngerîvîria,” na agîcoka akiuga, “Mwathani nîke ûgaatuîra andû ake.”

Atir 2:18

Vîndî îrîa Ngai-Mûnene ava Aisiraeli mûtongoria, Ngai-Mûnene nîwatethagia mûtongoria ûcio na nîwavonokagia Aisiraeli kuuma kûrî nthû ciao vîndî cionthe rîrîa mûtongoria ûcio ethagîrwa arî mwoyo. Ngai-Mûnene nîwegucagîra Aisiraeli ntha, nîûndû wa mathîna ma andû arîa maamavinyagîrîria.