Gûco 24:19 - ÎVUKU RÎA ÛVORO MWARO

¹⁹ “Rîrîa mwaketha irio na mwatigaria imwe kûu mûgûndarî mûtigaicokere. Icio ikethagîrwa irî cia ageni, ciana cia ndigwa, na aka a ndigwa; nake Ngai-Mûnene Ngai wenyu akaarathimaga mawîra menyu monthe.

Gûco 24:19 ပူးပေါင်းရင်းမြစ်များ

Ayubu 42:12

Ngai-Mûnene nîwarathimire Ayubu ûtûrorî wake wa mûthiia gûkîra ûrîa aamûrathimîte ûtûrorî wa mbere.

Thaburi 112:9

Arutaga na ûtaana, akava andû arîa athîni; ûtaana wake ûtûûraga tene na tene; ethagîrwa na vinya na nîwîtigîrîtwe.

Nthi 14:21

Mûndû ûrîa ûnyararaga mûndû ûrîa mariganîtie nake nî mwîvia, nwatî mûndû ûrîa wîgucagîra mûthîni ntha nîarathimagwa.

Nthi 19:17

Mûndû ûrîa ûvecaga mûthîni kîndû, nîta gûkovithia Ngai-Mûnene, Ngai-Mûnene nîakaamûrîva nîûndû wa ciîko ciake.

Isaia 32:8

Nwatî mûndû mûtîîku ekaga maûndû ma gîtîîo, na arûngamagîrîra ûma.

Alawi 23:22

“Vîndî îrîa mûgûketha maketha ma mîgûnda yenyu, mûtigakethage irio irîa irî rûtere rwa mîgûnda na mûtigacokage kûngania irio irîa itigaraga mîgûndarî. Mûgaaitigaga nîguo andû arîa matarî na irio cia kwîgana vamwe na ageni arîa mûtûûranagia nao maûnganagie. Nie nînie Ngai-Mûnene, Ngai wenyu.”

Luka 6:35

Vandû va ûguo, endagani nthû cienyu na mûciîkage waro na mûkombithanagie mûtakûgîa na mwîvoko wa gûkaarîvwa. Namue nîmûkaagîa na îgai rînene na mûtuîke ciana cia Ngai ûrîa ûrî Îgûrû Mûno. Nîûndû Ngai arî ntha kûrî andû arîa matarî ngatho na arîa methagîrwa marî na mîtugo mîcûku.

Luka 6:38

Vecanagani namue nîmûkaavewa iveo nî Ngai, mwîcûrîrîtue, igakindîrwa, ikainainua na ikathûmbwa. Nîûndû kîthimi kîrîa mûthimanagîra nakîo nîkîo Ngai akaamûthimîra nakîo.”

Gûco 14:29

Irio ino nî cia Alawi nîûndû matiagaîrwa kûndû gwa gûtûûra gatagatîrî kenyu, ageni, ciana cia ndigwa, na aka a ndigwa arîa matûûraga matûûrarî menyu, nîguo monage gîa kûrîa makavaa. Mwîkage ûguo nîguo Ngai-Mûnene Ngai wenyu amûrathimage na akarathima wîra wenyu.

Gûco 15:10

Vecagani mûndû ta ûcio na ûtaana na ngoro ntheru, na Ngai-Mûnene Ngai wenyu akaamûrathimaga mawîrarî menyu monthe.

Gûco 24:18

Ririkanani atî mwarî ngombo vûrûrirî wa Misiri na Ngai-Mûnene Ngai wenyu akîmûkûûra kuo. Kîu nîkîo gîtûmîte nîmwatha mwîke maûndû mama.

Gûco 26:13

Weka ûguo, nîûgaacoka uuge ûrî mbere ya Ngai-Mûnene, Ngai waku, ‘Nînaruta kîrîa kîtheru kuuma nyomba yakwa na nanengera Alawi, ageni, ciana cia ndigwa na aka a ndigwa, wata ûrîa wambathire mbîke. Ndirî munu rîathani wanarî rîmwe rîa Maathani maku kana ndiganîrwa nîmo.

Ruthu 2:16

Rutani cairi imwe ikûmbwarî mûmîrekie nthî nîûndû wake na mûreke amîrorie na mûtikamûgûkie.”

Ruthu 2:2

Ruthu ûcio warî Mûmoabu nîwerire Naomi atîrî, “Tiga nthiî mûgûndarî ngocanie cairi îrîa akethi maratigaria. Nîrî na ma atî nîngwona mûndû ûngîmbîtîkîria kûruta wîra gwake.” Nake Naomi nîwamûcokerie atîrî, “Îî thiî wîke guo mwarîwa.”