Gûco 16:19 - ÎVUKU RÎA ÛVORO MWARO

¹⁹ Matiagîrîrwe nî kûregana na kîvooto kana marûtha kîmenyano, na matiagîrîrwe nî kwamûkîra îvaki, nîûndû îvaki rîtucaga mûndû mûûgî kîrimû akaremwa nî gûtua îtua ûrîa kwagîrîrîte.

Gûco 16:19 ပူးပေါင်းရင်းမြစ်များ

Thaburi 15:5

Makombithanagia na matiîtagia maciaro, na matangîvakîka nîguo mavecane ûira wa maveeni wîgiî mûndû ûtarî na mavîtia. Andû arîa mekaga maûndû mama matikenyenya.

Ntha 18:21

Nwatî îgûrû rîa maûndû mau monthe thuura andû gatagatî ka andû aya onthe. Ûthuure arûme arîa marî na ûvoti, na metigîrîte Ngai, evokeku na andû mathûrîte mavaki. Andû acio matue atongoria a andû. Amwe matongoragie ikundi cia andû ngiri, engî magana, na engî ikundi cia andû mîrongo îtano na engî makûmi.

Ntha 23:2

Ndûkanarûmîrîre mwîngî gwîka maûndû mûcûku, kana ûtongorue nî mwîngî rîrîa ûkûruta ûira wa maveeni îgootirî.

Ntha 23:3

Ndûkonanie mûthutûkanio ciirarî wa mûthîni.

Nthi 15:27

Andû arîa mendaga kûgîa ûtonga na njîra îtarî mbagîrîru matûmaga mîciî yao îgîe na thîna, nwatî andû arîa mathûrîte mavaki nî matûûraga îvinda îraca.

Nthi 17:23

Mûndû mwaganu ocaga îvaki na nthitho, nîguo ndakarûmîrîre kîvooto.

Nthi 18:5

Tî waro kwonia mûndû mwaganu kîmenyano, na tî waro kwima mûndû mwîvokeku kîvooto.

Nthi 24:23

Ino wana cio nî ciugo cia andû arîa aûgî: Tî waro gûtwithania ciira na kîmenyano.

Nthi 24:28

Ndûgatuîke mûira wa mûndû wîngî vatarî na gîtûmi kîganu, na ndûkaveenanie.

Nthi 31:5

Mangînyua, nîmariganagîrwa nî mawatho, na makariganîrwa nî ivooto cia arîa matarî vinya.

Mûvunjia 7:7

Kûvinyanîrîria gûtûmaga mûndû mûûgî atuîka kîrimû, kûvakana gûtûmaga meciria macûke.

Isaia 1:17

na mwîrute gwîka maûndû maro. Rûmagîrîrani kîvooto, tigagani kûvinyanîrîria. Gitagîrani ciana cia ndigwa, na mwaragîrîrie aka a ndigwa.”

Isaia 1:23

Atongoria enyu nî aremi na nî arata a aîi. Onthe nîmendete kûvakwa na nîmamûkagîra iveo. Matigitagîra ciana cia ndigwa, na matiaragîrîria aka a ndigwa.

Isaia 33:15

Nî mûndû ûrîa ûtûûraga na ûthingu na waragia ûma, ûrîa ûreganaga na umithio umanîte na kûvinyanîrîria. Ûrîa ûtendaga kwamûkîra mavaki, ûrîa ûtendaga kûthikîrîria ndeto cia ûûragani na ûtendaga kwona maûndû macûku.

Jeremia 5:28

nîanoru na nîarûngarû. Ciîko ciao njûku nîikîrîte njano, matitucagîra ciana cia ndigwa na kîvooto, na mationanagia waragania kûrî andû arîa avinyîrîrie.”

Ezek 18:8

Ethîrwa mûndû ûcio ndakovithanagia kîndû nîguo akaarîvwa kîndû kîu kîrî na umithio, nîerigagîrîria ndakavîtie, na atuithanagia ciira na kîvooto gatagatî ka mûndû ûrîa ûkovete na ûrîa ûkovithanîtie.

Ezek 22:12

Andû amwe enyu nîmetagia mavaki nîguo maûrage andû engî. Na engî nîmetagia umithio wa indo irîa makombithîtie andû ao, magacuuna andû indo na magetongia na njîra îrîa îtagîrîrîte na makariganîrwa Nînie.” Ûguo nîguo Ngai-Mûnene augîte.

Alawi 19:15

“Tuithanagiani maciira na kîvooto; mûtikonanie kîmenyano kûrî athîni kana mwîtigagîre itonga, nwatî tucagîrani andû arîa engî ciira na kîvooto.

Mika 7:3

Onthe nîmaicî waro gwîka maûndû marîa macûku; atongoria na acirithania metagia mavaki. Mûndû ûrî îgweta aragia maûndû macûku marîa marî ngororî yake, kwoguo mavangaga vamwe maûndû marîa makwenda.

Habakuku 1:4

Kwoguo watho ndûrî na vata, na kîvooto gîtirûmagîrîrwa. Andû arîa acûku mathiûrûrûkîrîtie andû arîa aro, kwoguo kîvooto gîtirûmagîrîrwa.

Ciîko 10:34

Petero nîwatumûrire kanyua na akiuga atîrî, “Rîu nie nînamenya na ma atî Ngai ndarî kîmenyano.

Ciîko 16:37

Nwatî Paûlo nîwerire athigari acio atîrî, “O maratûrivire na ivoko andû onthe maroretie, na tûtatuîrîrîtwe atî nîtwîkîte naaî, na tue tûrî Aaroma! O nîmaracokire matuikia njeera, na rîu marenda gûtûrekereria na nthitho. Ûguo tîkûvoteka! Tiga maûke marî o matûrekererie.”

Ciîko 23:3

Nake Paûlo nîwerire Anania atîrî, “Wa nawe Ngai nwanginya akûviûkie. We wîkariî ta rûthingo rûrî rûvake rangi njerû. Wîkarîte vau nîguo ûnduîre kûringana na watho, nwatî we nîkwa ûrauna watho na njîra ya kûmeera mamviûkie rûvî!”

Gûco 10:17

Nîûndû Ngai-Mûnene Ngai wenyu, nîke Ngai wa ngai irîa ciîngî, na Mwathani wa athani. Ke nî mûnene, arî vinya na nîwagîrîrwe nî gwîtigîrwa. Ke ndacagûranagia na ndamûkagîra mavaki.

Gûco 16:18

“Thuurani atucanîri ciira na anene kuuma matûûrarî menyu monthe marîa Ngai-Mûnene Ngai wenyu akûmûva kûringana na mîvîrîga yenyu. Andû acio magaatucagîra andû na waragania.

Gûco 24:17

“Mûtikaime ageni kana ciana cia ndigwa kîvooto Kîamo, kana mwoce nguo ya mûndûmûka wa ndigwa îrî kîndû gîa kûrûngamîrîra kîndû kîrîa akovithîtue.

Gûco 27:19

“ ‘Kûnyitwa nî kîrumi nî mûndû ûrîa ûcunaga ageni, ciana cia ndigwa, na aka a ndigwa kîvooto.’ “Nao andû onthe nîmakaauga, ‘Ameni!’

Gûco 27:25

“ ‘Kûnyitwa nî kîrumi nî mûndû ûrîa wamûkagîra mbeca nîguo aûrage mûndû ûtarî na mavîtia.’ “Nao andû onthe nîmakaauga, ‘Ameni!’

1Sam 12:3

Rîu nie nîrî ava. Ethîrwa kûrî na ûndû mûcûku naneka, nthitangani rîu tûrî mbere ya Ngai-Mûnene na mbere ya mûthamaki ûrîa ke eetîrîrie maguta. Nanaîa ng'ombe kana mvunda ya mûndû? Nanacuuna mûndû kîndû na njîra ya maveeni, kana ngakinyîrîria mûndû? Nanetîkîra gwoca îvaki kuuma kûrî mûndû wana ûrîkû? Ethîrwa naneka ûmwe wa maûndû mama, nie nîngûrîva.”

1Sam 8:1

Na rîrîa Samueli aakûrire nîwatwire anake ake atucanîri ciira a Isiraeli.

1Sam 8:3

Nwatî anake acio a Samueli matiarûmîrîra maûndû marîa îthe eekaga; maacaragia ûtonga tu; kwoguo nîmeetagia mavaki na matiatucaga ciira na kîvooto.