Gûco 14:29 - ÎVUKU RÎA ÛVORO MWARO

²⁹ Irio ino nî cia Alawi nîûndû matiagaîrwa kûndû gwa gûtûûra gatagatîrî kenyu, ageni, ciana cia ndigwa, na aka a ndigwa arîa matûûraga matûûrarî menyu, nîguo monage gîa kûrîa makavaa. Mwîkage ûguo nîguo Ngai-Mûnene Ngai wenyu amûrathimage na akarathima wîra wenyu.

Gûco 14:29 ပူးပေါင်းရင်းမြစ်များ

Thaburi 41:1

Kûrathimwa nî andû arîa marûmbûyagia andû arîa athîni; Ngai-Mûnene nîakaamatethia vîndî îrîa makaagwatwa nî thîna.

Thaburi 41:2

Ngai-Mûnene nîamagitagîra na akamamenyerera ûtûûrorî wao; nîmagaatûûra marî akenu marî vûrûrirî; ke ndakaamatiganîria kûrî nthû ciao.

Thaburi 94:6

Maûragaga aka a ndigwa na ageni, na makaûraga ciana irîa itarî aciari;

Nthi 11:24

Andû amwe mavecanaga na ûtaana na makathiî na mbere gûtonga; nao arîa engî mativecanaga, nwatî nwakwa mathiîcaga na mbere kûthîna.

Nthi 19:17

Mûndû ûrîa ûvecaga mûthîni kîndû, nîta gûkovithia Ngai-Mûnene, Ngai-Mûnene nîakaamûrîva nîûndû wa ciîko ciake.

Isaia 1:17

na mwîrute gwîka maûndû maro. Rûmagîrîrani kîvooto, tigagani kûvinyanîrîria. Gitagîrani ciana cia ndigwa, na mwaragîrîrie aka a ndigwa.”

Alawi 19:34

Îkagani ageni arîa mûtûûranagia nao wata ûrîa mwîkaga Aisiraeli arîa engî na mûmendage wata ûrîa mwîyendete. Ririkanani vîndî îmwe mwarî ageni vûrûrirî wa Misiri. Nie nînie Ngai-Mûnene, Ngai wenyu.

Ndari 18:20

Ngai-Mûnene nîwerire Aroni atîrî, “Ndûkagaa wanarî kîndû vûrûri wa andû a Isiraeli, kana ûvewe gîcunjî wanarî kîmwe Kîam vûrûri ûcio. Nie nînie gîcunjî gîaku na îgai rîaku.”

Luka 11:41

Vandû va gwîka ûguo, vecagani athîni ûtethio na indo cionthe cienyu nî igûtuîka ntheru.

Luka 6:35

Vandû va ûguo, endagani nthû cienyu na mûciîkage waro na mûkombithanagie mûtakûgîa na mwîvoko wa gûkaarîvwa. Namue nîmûkaagîa na îgai rînene na mûtuîke ciana cia Ngai ûrîa ûrî Îgûrû Mûno. Nîûndû Ngai arî ntha kûrî andû arîa matarî ngatho na arîa methagîrwa marî na mîtugo mîcûku.

Gûco 10:9

Kwoguo andû a mûvîrîga wa Lawi matiagaîrwa vûrûri wa gûtûûra ta mîvîrîga îrîa îngî. Vandû va ûguo maagaire wîra wa gûtungatîra wata ûrîa Ngai-Mûnene Ngai wenyu aamerîrîte.)

Gûco 12:12

Nîmûgaakena mûrî mbere ya Ngai-Mûnene Ngai wenyu, mue, ciana cienyu, ndungata cienyu cia arûme na cia aka, na Mûlawi ûrîa ûrî îtûûrarî rîenyu, nîûndû tîmûgaîre kûndû gwa gûtûûra ta mue.

Gûco 14:27

“Mûtikariganîrwe nî Alawi arîa matûûraga matûûrarî menyu, nîûndû matiagaîrwa kûndû gwa gûtûûra.

Gûco 15:10

Vecagani mûndû ta ûcio na ûtaana na ngoro ntheru, na Ngai-Mûnene Ngai wenyu akaamûrathimaga mawîrarî menyu monthe.

Gûco 16:11

Kenagani mûrî mbere ya Ngai-Mûnene Ngai wenyu mûrî vamwe na ciana cienyu, ndungata cienyu, Alawi, ageni, ciana cia ndigwa na aka a ndigwa arîa matûûraga matûûrarî menyu. Îkagani ûguo mûrî varîa Ngai-Mûnene Ngai wenyu akaathuura va kûgoocagîrwa.

Gûco 16:14

Kûngûagîrani kîrugo kîu mûkenete mûrî na ciana cienyu, ndungata cienyu, Alawi, ageni, ciana cia ndigwa, na aka a ndigwa arîa matûûraga matûûrarî menyu.

Gûco 23:21

“Rîrîa werîra Ngai-Mûnene, Ngai waku ûndû na mwîvîtwa, ndûkarege kûûvingia; nîûndû Ngai-Mûnene, Ngai waku nîakenda ûvingie ûndû ûcio, na nî wîvia kûrega kûûvingia.

Gûco 28:8

“Ngai-Mûnene Ngai wenyu nîakaarathima mawîra menyu monthe, na atûme makûmbî menyu mecûre irio, acoke atûme mwîngîve mûrî vûrûrirî ûrîa akûmûva.

Gûco 6:11

Gûkethîrwa kûrî na nyomba ciîcûrîte indo mbaro irîa mûtekîra kuo, na gûkethîrwa kûrî na iriko irî na manjî irîa mûtenja, na mîgûnda ya mîthavibu na mîtamaiyû îrîa îciaraga matunda îrîa mûtaavanda. Vîndî îrîa Ngai-Mûnene akaamûvira vûrûrirî ûcio na mûrîe irio cia mûthemba wa wonthe ûrîa mûkenda,

Ahib 13:2

Ririkanagani kûgwata andû ûgeni kwenyu mîciî. Andû amwe nîmaagwatire araika ûgeni matakûmenya.

Jakuvu 1:27

Ndini îrîa Ngai Vava atucaga ntheru na îtarî na ûcuke nî kûmenyerera ciana cia ndigwa na aka a ndigwa mathînarî mao, na kwîgirîrîria maûndû marîa macûku ma nthî.